Ekebe Mbụme

◼ Didie ke ikeme ndinen̄ede n̄n̄wam mme asiakusụn̄?

N̄kpọ nte mme asiakusụn̄ ofụri ini ye mme akpan asiakusụn̄ 800,000 ke ikenyene ke ofụri ererimbot ke isua utom 2009. Mme asan̄autom uyọhọ ini emi ẹsinen̄ede ẹda ini mmọ, ofụri ukeme mmọ, ye inyene mmọ, ẹkwọrọ eti mbụk Obio Ubọn̄. (N̄ke 3:9) Ifịk mmọ esinem Jehovah esịt didie ntem! Didie ke ikeme ndidara mmọ nte Jehovah adarade, nnyụn̄ nnam mmọ ẹkop inem utom mmọ man ẹka iso ke utom emi?

Nti ikọ emi itịn̄de ẹkeme ndisịn udọn̄ nnọ mmọ ẹka iso ẹsiak usụn̄. (N̄ke 25:11) Ndi imekeme ndinam ukpụhọde ke ndutịm nnyịn eke urua ke urua man ikeme ndisan̄a ye mmọ ke an̄wautom? Edieke oyomde, ndi nnyịn imekeme ndimen mmọ ke n̄kpọisan̄ nnyịn mîdịghe ikpe usụn̄ inọ mmọ? (1 Cor. 13:5; Phil. 2:4) Usụn̄ en̄wen emi ikemede ndin̄wam mmọ edi nditat ubọk nnyụn̄ n̄kot mmọ edi udia ke ufọk nnyịn ke ini ke ini.—1 Pet. 4:8, 9.

N̄wed Abasi ọdọhọ ke Jehovah ọn̄wọn̄ọ ndinọ mbon emi ẹbemde iso ẹyom Obio Ubọn̄ esie mme n̄kpọ oro mmọ ẹyomde ke uwem. (Ps. 37:25; Matt. 6:33) Usụn̄ kiet emi enye esidade anam emi esidi ndida ima ima nditọete Christian nnyịn nsu un̄wọn̄ọ emi. (1 John 3:16-18) Edi akpanikọ, mme asiakusụn̄ isidorike enyịn mbon en̄wen ndimen mbiomo mmọ mbiom. Ndien ekeme ndidi mmọ idibemke iso itịn̄ inọ mbon en̄wen nte ke mmimọ imoyom un̄wam. Edi imekeme ndin̄wam mme anam-akpanikọ asiakusụn̄ emi “ke unana mmọ” edieke isitịn̄de enyịn.—2 Cor. 8:14, 15.

Ke ini Phoebe, ifịk ifịk ọkwọrọ eti mbụk ke akpa isua ikie ke Esop Cenchreae, akakade Rome, Paul ama esịn udọn̄ ọnọ nditọete ke Rome ete ‘ẹdara enye ke Ọbọn̄ ke usụn̄ oro odotde ndisana owo, ẹnyụn̄ ẹn̄wam enye ke n̄kpọ ekededi emi enye oyomde un̄wam mmọ.’ (Rome 16:1, 2) Nnyịn imenyene ifet ndinọ ifịk ifịk mme asiakusụn̄ ofụri ini ye mme akpan asiakusụn̄ emi ẹdude ke esop nnyịn ukem ima ima un̄wam oro.—Utom 5:42.