Ukpụhọde ke Ibat Hour Oro Ẹyomde Ẹto Mme Asiakusụn̄
1 Kpukpru nnyịn imama ndinyene mme asiakusụn̄ ofụri ini ye eke unọ un̄wam oro ẹnamde utom ọkpọsọn̄ ke esop. Idem ke ebiet emi efakutom mîkponke ẹnyụn̄ ẹnamde utom ọyọhọ ọyọhọ kpukpru ini, mme asiakusụn̄ ẹnịm eti uwụtn̄kpọ ebe ke ifịk ifịk utom Obio Ubọn̄ mmọ. Mmọ ẹsịn udọn̄ ẹnọ kpukpru asuanetop ndika iso nyọhọ ye utom ke ndiyom mbon ẹmi “ẹkenịmde ẹnọ nsinsi uwem.”—Utom 13:48.
2 N̄ka okụt ikpọ mfịna oro mme asiakusụn̄ ẹsobode, akpan akpan kaban̄a edikụt utom idịbi udia eke ibio ini emi ediyakde mmọ ẹse ẹban̄a ọkpọkpọ udọn̄ mmọ nte ekemde man ẹka iso ke utom uyọhọ ini. Idaha ndutịm uforo eke idahaemi ke ediwak idụt n̄ko anam enye akaka iso edi ọkpọsọn̄ n̄kpọ ọnọ mbon eken ndidụk utom usiakusụn̄, idem okposụkedi oro edide udọn̄ ofụri esịt mmọ. Ke mme ọfiọn̄ ndondo ẹmi, ẹmetịm ẹkere ẹban̄a ẹmi ye mme n̄kpọ eken.
3 Ke ntre, ke ẹkerede ẹban̄a se idude ke enyọn̄ emi, N̄ka osụhọde ibat hour oro ẹyomde ẹto mme asiakusụn̄ ofụri ini ye eke unọ un̄wam. Ọtọn̄ọde ke isua 1999, se ẹyomde ẹto mme asiakusụn̄ ofụri ini edidi hour 70 ke ọfiọn̄ kiet kiet, m̀mê hour 840 ke isua. Se ẹyomde ẹto mme asiakusụn̄ unọ un̄wam ke ọfiọn̄ ke ọfiọn̄ edidi hour 50. Owo ikpụhọkede ibat hour oro ẹyomde ẹto mme akpan asiakusụn̄ ye mme isụn̄utom, sia edide N̄ka anam ndutịm ndin̄wam mmọ ẹse ẹban̄a mme akpan n̄kpọ obụkidem oro mmọ ẹyomde. Ntem, mmọ ẹkeme ndiwụk ntịn̄enyịn ọyọhọ ọyọhọ ke ukwọrọikọ ye utom unam mbet mmọ.
4 Ẹdori enyịn nte ke ukpụhọde ke ibat hour emi ayanam ediwak mme asiakusụn̄ ẹsọn̄ọ ẹmụm ọsọn̄urua ifetutom emi ẹkama. Enye n̄ko ekpenyene ndiberede usụn̄ nnọ ediwak mme asuanetop efen efen ndidụk utom usiakusụn̄ uyọhọ ini ye eke unọ un̄wam. Nso edidiọn̄ ke emi enyene ndidi ntem nnọ kpukpru owo ke esop!