Ekebe Mbụme

◼ Ntak emi mîfọnke ẹnyene nneme ke Intanet ye owo oro nnyịn mîfiọkke?

Ẹnam ediwak Ndutịm Intanet man mme owo ẹda ẹneme nneme. Ndusụk ndutịm emi ẹsinam mme owo ẹwet n̄kpọ ẹban̄a idemmọ, ndien ẹkeme n̄ko ndisịn ndise ye mme n̄kpọ eken. Mbon oro ẹkụtde ndise oro ye se ẹwetde ẹdian ẹkeme ndinyene nneme ye mme andinyene ndise oro. Mme uyen ẹsinen̄ede ẹma ndika mme utọ ikpehe Intanet emi, ndien ndusụk uyen ke esop ẹsida enye ẹnyene nneme ye mbon oro ẹdọhọde ke idi Mme Ntiense Jehovah.

Isọn̄ke owo oro nnyịn inemede nneme ke Intanet ndibian̄a nnyịn mban̄a orụk owo emi enye edide, idaha esie ke esop, m̀mê se enye aduakde. (Ps. 26:4) Owo oro ọdọhọde ke idi kiet ke otu Mme Ntiense Jehovah ekeme ndikam ndi owo oro mînịmke ke akpanikọ, owo mbịn mfep, m̀mê idem owo mfiakedem. (Gal. 2:4) Ẹdọhọ ke ediwak mbon oro ẹsidan̄de nditọwọn̄ ẹsida mme ikpehe emi ẹnyene mmọ.

Idem ọkpọkọm imenen̄ede inịm ke mbon oro idade ineme nneme ẹnyene eti idaha ke esop, nneme oro ẹnemede ke Intanet ẹkeme ndiwaha ndụk idiọk afan̄. Emi edi koro mme owo ẹsiwak ndinam n̄kpọ ke isio isio usụn̄ ye mbon oro mmọ mîsoboke iso ye iso. Mmọ ẹkeme n̄ko ndikere ke nneme Intanet edi ọkpọkpọ mbubehe mmimọ ndien ke mbon en̄wen, utọ nte ete ye eka mmimọ ye mbiowo idifiọkke se ededi oro mmimọ inemede. Edi n̄kpọ mfụhọ nditịn̄ nte ke ediwak uyen Christian ẹmeduọ ẹdụk afia emi ẹsinyụn̄ ẹtọn̄ọ nditịn̄ ndiọi ikọ. (Eph. 5:3, 4; Col. 3:8) Mbon eken ẹsidọn̄ mme ndise oro ẹdemerede owo udọn̄ idan̄, enyịn̄ ima, m̀mê mme itie oro ẹkemede ndikụt mme ikwọ vidio oro ẹdemerede owo udọn̄ idan̄ ke Intanet.

Ke ikerede iban̄a se inemede emi, mme ete ye eka ẹkpenyene ndikpeme se nditọ mmọ ẹnamde ke kọmputa. (N̄ke 29:15) Ikpọfọnke ndiberede usụn̄ ufọk nnyịn nnọ owo oro nnyịn mîfiọkke m̀mê ndiyak enye etie ikpọn̄ ye nditọ nnyịn. Kpasụk ntre, ifọnke nnyịn m̀mê nditọ nnyịn inam ufan ke Intanet ye mbon oro nnyịn mîfiọkke, idem ọkpọkọm mmọ ẹdọhọ ke idi Mme Ntiense Jehovah.—N̄ke 22:3.