Ntak Emi Nnyịn Ikade Iso Ndifiak N̄ka?
1 Ndi akanam afo omobụp idemfo mbụme oro, iso-ọfọn nte afo ekeben̄ede idem ọnọ utom ukwọrọikọ? Ke ndusụk itie ẹmi ẹnamde utom ndien ndien ke efakutom nnyịn, mme enyeneufọk ẹkeme ndidiọn̄ọ mbon ẹmi nnyịn idide ẹnyụn̄ ẹsisọp ndibịn nnyịn. Ibat ibat owo kpọt ẹkeme ndinam n̄kpọ ke eti usụn̄. Edi ediwak okopodudu ntak ẹdu ẹmi anamde nnyịn ika iso ndifiak n̄ka.
2 Akpa, ẹwụk nnyịn ndika iso n̄kwọrọ etop Obio Ubọn̄ tutu utịt edi. (Matt. 24:14; 28:19, 20) Prọfet Isaiah ama obụp m̀mê imọ idinam utom ukwọrọikọ imọ ibịghi adan̄a didie. Ẹwet ibọrọ oro ẹkenọde enye ke Isaiah 6:11. Eyịghe idụhe iban̄a oro—ẹma ẹsian enye ẹte aka iso ada etop Abasi aka ebịne mme owo. Kpasụk ntre mfịn, okposụkedi mmọ ẹkemede ndibịn nnyịn, Jehovah odori enyịn nnyịn ndika iso n̄waha mbịne mme owo oro ẹdụn̄de ke efakutom nnyịn. (Ezek. 3:10, 11) Emi edi edisana utom oro ẹnọde nnyịn.—1 Cor. 9:17.
3 Ntak efen emi anamde nnyịn ika iso ndifiak n̄ka edi nte ke emi ọnọ nnyịn ifet ndiwụt udomo utuakibuot oro ituakde inọ Jehovah. (1 John 5:3) Akan oro, ke ini ikerede iban̄a se n̄kpet n̄kpet ini iso akamade ọnọ ubonowo, didie ke nnyịn ikeme nditre ndidomo ke ima nditọt mbọhọidụn̄ nnyịn? (2 Tim. 4:2; Jas. 2:8) Nnyịn ndinam utom nnyịn ke edinam akpanikọ ọnọ mmọ ifet ndien ndien ndinam n̄kpọ mban̄a etop edinyan̄a Abasi, man otodo mmọ ẹkûkeme ndidọhọ ke owo ikọtọtke mmimọ.—Ezek. 5:13.
4 Adianade do, nnyịn ifiọkke ini oro ndusụk owo ẹdikpụhọde esịt. Enye ekeme ndito ukpụhọde ke mme ọkpọkpọ idaha mmọ, nnama ke ubon mmọ, m̀mê mme idaha ererimbot ẹmi ẹnamde mmọ ẹtịm ẹkere ẹban̄a ini iso mmọ. Ndien n̄ko, n̄kpọ oro itịn̄de ke enyịnusụn̄ mmọ ekeme ndinam ẹnam n̄kpọ ke eti usụn̄. (Eccl. 9:11; 1 Cor. 7:31) N̄ko, mme owo ẹsikpụhọ itieidụn̄. Nnyịn imekeme ndikụt mbufa mme andidụn̄ ke efakutom nnyịn ẹmi ẹdinyịmede eti mbụk—iso-ọfọn n̄kparawa owo ẹmi ẹdụn̄de ikpọn̄ idahaemi ke ẹnyụn̄ ẹtịm ẹkere ẹban̄a uduak mmọ ke uwem.
5 Nte nnyịn iyaka iso ndifiak n̄ka? Ih! N̄wed Abasi ọnọ nnyịn nsịnudọn̄ oro ekemde ndifiak n̄ka mbịne mme owo ndien ndien. Ke akpatre, ke ini ẹkụrede utom ukwọrọikọ, Jehovah ọyọdiọn̄ nnyịn kaban̄a n̄kaiso ukeme nnyịn ke utom ukwọrọikọ, ndien enye ọyọdiọn̄ mbon ẹmi ẹkenamde n̄kpọ ye esịtekọm ẹban̄a eti mbụk Obio Ubọn̄.—1 Tim. 4:16.