Nte Afo Emekeme Ndinọ Ufọk Fo?
1 Ke akpa isua ikie, ediwak Christian ẹma ẹsinyịme ẹnịm mme mbono esop ke ufọk mmimọ. (1 Cor. 16:19; Col. 4:15; Philem. 1, 2) Ke ndusụk esop mfịn, mme itie idụhe ikem ndida nnịm Ukpepn̄kpọ N̄wed Esop ye mme mbono an̄wautom. Emi ekeme ndinam ndusụk otu ukpepn̄kpọ n̄wed ẹnyene owo 30 m̀mê awakde akan oro, emi enen̄erede ebe n̄kpọ nte owo 15 oro ẹkenọde ekikere ẹban̄a.
2 Eti Ifet: Ndi afo emekere ndinọ ufọk fo ẹda ẹnịm Ukpepn̄kpọ N̄wed Esop? Ubet oro okponde ekem onyụn̄ asanade, emi un̄wana ye ofụm ẹdụkde ọfọn oyodot ndida nnam emi. Ndinịm ukpepn̄kpọ n̄wed ke ufọk fo edi eti ifet sia enye edide mbono esop ye ubak ndutịm Jehovah ndinọ ikọt esie ukpep. Ediwak owo ẹtịn̄ ke mmimọ imọbọ ufọn ke n̄kan̄ eke spirit ke ndinọ ufọk mmimọ ẹda ẹnam emi.
3 Edieke ekerede ke ufọk imọ odot, mbọk nam mbiowo ẹfiọk ẹban̄a. Ekeme ndidi mmọ ke ẹyom mme itie efen efen. Edieke owo mîkemeke ndinịm ukpepn̄kpọ n̄wed ke ufọk fo, nte ẹkeme ndida enye nnịm mme mbono an̄wautom? Idem ọkpọkọm owo iyomke enye idahaemi, mbiowo ẹyekop inemesịt ndifiọk nte ke ẹkeme ndinịm ukpepn̄kpọ ke ufọk fo. Afo emekeme ndinyene ifet emi ke ini iso.
4 Ndiwụt Nti Edu: Ke ini ẹsopde idem ke ufọk owo, kpukpru mme andidụk ẹkpenyene ndiwụt ukpono nnọ mme n̄kpọ enyeneufọk. Mme ete ye eka ẹkpenyene ndikụt ke nditọ mmimọ ẹdụk ẹtre ke ebiet oro ẹnịmde ẹnọ ukpepn̄kpọ emi, inyụn̄ ibehe idụk mme itie efen ke ufọk oro. Ẹkpenyene n̄ko ndikere mban̄a mme mbọhọidụn̄, ẹkpemede mbak ẹdifịna mmọ nte mîdotke.—2 Cor. 6:3, 4; 1 Pet. 2:12.
5 Mme Hebrew 13:16 esịn udọn̄ ọnọ nnyịn ete ikûfre “ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” Ndinọ ufọk fo ẹda ẹnịm mbono esop edi eti usụn̄ ndibuana nti n̄kpọ ye mbon efen ndinyụn̄ ‘n̄kpono Jehovah ke inyene fo.’—N̄ke 3:9.