Ubọp Ufọkmbono Obio Ubọn̄ Ofụri Ererimbot ke Ndusụk Idụt Europe
1 Ke mme iduọk isua ndondo emi, ẹma ẹkpan utom Mme Ntiense Jehovah ke ediwak idụt ke Europe, ọkọrọ ye N̄kan̄ Edem Usiahautịn Europe. Ke ata ediwak idaha, ukpan emi ama enen̄ede ọsọn̄ ubọk. Owo ikekemeke ndinịm mme mbono esop an̄wan̄wa, ndien edinyene mme Ufọkmbono Obio Ubọn̄ ekedi ata ọkpọsọn̄ n̄kpọ. Nte ededi, ke mme isua ndondo emi, “Jehovah amanam ikpọ n̄kpọ ye nnyịn; esịt ke adat nnyịn.”—Ps. 126:3.
2 Ọtọn̄ọde ke 1983, ọkpọsọn̄ ufịk oro ẹkefịkde Mme Ntiense Jehovah ama ọtọn̄ọ ndisụhọde ubọk. Etisịm 1989, Poland ye Hungary ẹma ẹnọ Mme Ntiense Jehovah unyịme oro ekemde ye ibet. Ke 1991, ẹma ẹnyịme Mme Ntiense Jehovah ẹsịn enyịn̄ ke n̄wed nte ekemde ye ibet ke Russia. Ọtọn̄ọde ke ini oro, utom ke ọkọri ke Russia ye ke mme obio ukara akani Soviet Union. Ke March 1996 esịm October 1998, Otu Ukara ama ọnọ unyịme ke eben̄e oro ẹkesịnde ẹyom ebuọt okụk ndibọp Ufọkmbono Obio Ubọn̄ 359, oro ẹketode mme ọfis n̄kọk itieutom oro ẹsede ẹban̄a mme idụt 11 ke Europe.
3 Nte afo esede mme ndise ẹdude ke esịne-esịt emi, kere ban̄a ikpọ utịben̄kpọ oro Jehovah anamde ọnọ ikọt esie. (Ps. 136:4) Afo oyokop inemesịt ndifiọk nte ke ẹda mme etịbe nditọete ofụri ererimbot ẹnam n̄kpọ ke eti usụn̄, owụtde se Jesus eketịn̄de, nte ẹwetde ke John 13:35: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”
4 Romania emi ẹbọpde Ufọkmbono Obio Ubọn̄ 36 tọn̄ọde ke July 2000 edi kiet ke otu mme idụt Europe emi ẹbọde ufọn ẹto ndutịm edin̄wam ẹbọp mme Ufọkmbono Obio Ubọn̄ ke mme idụt emi ẹnyenede esisịt okụk. Ke ndida orụk mbuwed ubọpufọk kiet mbọp se ikperede ndidi kpukpru Ufọkmbono Obio Ubọn̄ mmọ, ẹma ẹbọp Ufọkmbono Obio Ubọn̄ 61 ke Ukraine ke isua 2001 ye 76 efen ke 2002. Ye un̄wam Okụk Ufọkmbono Obio Ubọn̄ oro ẹtịpde, ẹbọp ediwak Ufọkmbono Obio Ubọn̄ ke Bulgaria, Croatia, Macedonia, Moldova, Russia, ye Serbia ye Montenegro.
5 Idịghe mmemmem ndibọp Ufọkmbono Obio Ubọn̄ ke ndusụk idụt, ndien ẹnyene ndisịn ekese ukeme mbemiso ẹkemede nditọn̄ọ ata ata ubọpn̄kpọ. Ndutịm emi esiwak ndida ini. Adianade do, okụk oro ẹdade ẹbọp Ufọkmbono Obio Ubọn̄ kiet ke ikpehe Europe n̄kan̄ oro enen̄ede awak akan se ẹdade ẹbọp ke ediwak ikpehe ke Africa m̀mê Edem Usụk America. Nte ededi, ke ntak akwa n̄kọri ke ibat mbon oro ẹtuakde ibuot ẹnọ Jehovah, ke ẹsụk ẹyoyom ediwak Ufọkmbono Obio Ubọn̄ efen efen ke mme idụt Europe emi ẹnyenede esisịt okụk!
6 Edi utịben̄kpọ didie ntem ndikụt utọ usọp usọp n̄kọri emi ke edibọp mme Ufọkmbono Obio Ubọn̄ emi! Ẹnọ utịbe utịbe ikọ ntiense ke mme n̄kann̄kụk emi ẹbọpde mmọ, nte mme ifiọkutom ẹwụtde. Ke ndusụk ikpehe, ukara n̄kann̄kụk okop inemesịt ndikụt edu unyịmesịt oro ẹwụtde ke nditiene ndausụn̄ ubọpn̄kpọ oro ẹnọde.
7 Nte odotde, Isaiah ama etịn̄ ntịn̄nnịm ikọ aban̄a n̄kọri ke utuakibuot akpanikọ mfịn. Ebede ke prọfet emi, Abasi ama ebem iso etịn̄ ete: “Ami Jehovah nyanam enye awara ke ekem ini esie.” (Isa. 60:2) Ke akpanikọ, Jehovah anam n̄kọri odu ke Edem Usiahautịn Europe ke isua duop emi ẹbede. Jehovah akpakam aka iso ndidiọn̄ nnyịn uwak uwak ke ukeme oro nnyịn isịnde ndinam edibọp mme Ufọkmbono Obio Ubọn̄ awara ke ediwak idụt nte nnyịn ikade iso nditịp Okụk Ufọkmbono Obio Ubọn̄! Emi ayanam ẹkeme ndibọp mme Ufọkmbono Obio Ubọn̄ efen efen ke mme idụt emi ẹnyenede esisịt okụk. Enye eyetịp esịn ke ndinam edisana utuakibuot ọkọri ke ediwak ikpehe ke Europe ye ke ndinọ akwa ikọ ntiense tutu “esịm ke utịt ererimbot.”—Utom 13:47.
[Mme ndise ke page 3]
Okụre Ufọkmbono Obio Ubọn̄ Moscow, Russia
[Mme ndise ke page 4-6]
Mbufa Ufọkmbono Obio Ubọn̄ ke Edem Usiahautịn Europe
Strumica, Macedonia
Daruvar, Croatia
Bitola, Macedonia
Sokal, N̄kann̄kụk Lviv, Ukraine
Sofia, Bulgaria
Krasnooktyabrskiy, Ikpehe Maykop, Russia
Bački Petrovac, Serbia ye Montenegro
Plovdiv, Bulgaria
Tlumach, N̄kann̄kụk Ivano-Frankivsk, Ukraine
Rava-Ruska, N̄kann̄kụk Lviv, Ukraine
Stara Pazova, Serbia ye Montenegro
Zenica, Bosnia ye Herzegovina
Sokal, N̄kann̄kụk Lviv, Ukraine
Zhydachiv, N̄kann̄kụk Lviv, Ukraine