Ndinọ N̄wed ke Efakutom oro Ẹsemde Ediwak Usem
1. Ntak emi oyomde ediwak esop ẹnyene mme n̄wed ke usem esenidụt?
1 Ke ediwak ebiet, ẹtọn̄ọ ndinyene mme owo oro ẹtode mme idụt efen. Ediwak ke otu mmọ ẹsibọ akpanikọ usọp usọp ẹnyụn̄ ẹnyene ntotụn̄ọ ifiọk ke ini ẹkpepde mmọ n̄kpọ ke usem emana mmọ. Mme ndutịm ewe ke ẹnam man ẹnọ mbon oro ẹnyenede udọn̄ mme n̄wed oro ẹkọn̄ọde ke Bible ke usem oro mmọ ẹtịmde ẹmehe?
2. Nso ke oyom ẹdiana kiet ẹnam ke ini esop iba m̀mê awakde akan oro emi ẹsemde nsio nsio usem ẹnamde utom ke efakutom kiet?
2 Ini Emi Ẹkpenọde N̄wed: Ke ini esop iba m̀mê awakde akan oro emi ẹsemde nsio nsio usem ẹnamde utom ke efakutom kiet, mme otu mbiowo ke mme esop emi ẹyediana kiet ye mme esenyịn utom ke ndinam ndutịm oro kpukpru owo ẹnyịmede man otodo ẹnọ otu usem kiet kiet ọyọhọ ọyọhọ ikọ ntiense. Ke ini ẹkwọrọde ikọ ke ufọk ke ufọk, mme asuanetop idinọhọ mme n̄wed ke usem esop efen nte ẹkam ẹsinọde. Nte ededi, ke ini mme asuanetop ẹnọde ikọ ntiense ido nneme m̀mê ke an̄wan̄wa itie, mmọ ẹkeme ndinọ mme n̄wed ke mme usem obio oro.
3. Ini ewe ke esop ekpenyene mme n̄wed usem esenidụt ke itie unịmn̄wed?
3 Ini Emi Ẹkpenyenede Mme N̄wed ke Itie Unịmn̄wed: Nso ke ẹkpenam ke ini mbon oro ẹsemde usem esenidụt ẹwakde ke n̄kann̄kụk emi esop oro esemde usem oro mîdụhe? Ke utọ mme idaha oro, mme esop ẹkeme ndinyene esisịt ibat n̄wed oro ẹyomde emi ẹdude ke usem oro, utọ nte mme tract, ndiye uduot n̄kpri n̄wed Oyom, Usụn̄ Oro Adade Ẹsịm Uwem, ye Ufan Abasi, ye n̄wed Ifiọk. Mme asuanetop ẹkeme ndinọ mme n̄wed emi ke ini ekededi oro mmọ ẹsobode ye mbon oro ẹkemede ndikot usem oro.
4. Ẹkpesan̄a didie ẹnyene mme n̄wed usem esenidụt oro mîdụhe ke itie unịmn̄wed esop?
4 Nte Ẹkpetobode N̄wed: Edieke esop mînyeneke n̄wed ke itie unịmn̄wed ke usem oro owo emi enyenede udọn̄ ekemede ndikot, ẹkpesan̄a didie ẹnyene mme n̄wed ke usem oro? Asuanetop ekpenyene ndibụp asan̄autom emi akamade n̄wed mban̄a mme n̄wed emi ẹdude ke usem oro man ẹkpetobo mme n̄kpọ oro ẹyomde ke ini efen oro esop editobode n̄wed.
5. Nso idi uduak nnyịn ke ndisuan mme n̄wed Christian?
5 Nnyịn ikpakam ida mme n̄wed Christian nnyịn inam n̄kpọ ke eti usụn̄ ndin̄wam “kpukpru orụk owo,” inamke n̄kpọ m̀mê mmọ ẹsem ewe usem, man mmọ ‘ẹsịm ifiọk akpanikọ ẹnyụn̄ ẹnyene edinyan̄a.’—1 Tim. 2:3, 4.