Ekebe Mbụme

◼ Nte osụk edi se idotde ndinịm ukpepn̄kpọ Bible ye eyenete eren m̀mê n̄wan oro mînamke utom aba ke ini kiet ke otu mme andibuana ke Kọmiti Utom Esop ọnọde ndausụn̄ ete ẹnam ntre?

Mbiowo ẹnyene mbiomo ndikpeme esop, esịnede andibuana ekededi emi mînamke utom aba. Mmọ ẹsika ẹkese utọ mbon ẹmi ẹnyụn̄ ẹbiere orụk ọkpọkpọ un̄wam oro ẹyomde. Ke ebiet odotde, emi ekeme ndibuana edinam owo emi mînamke utom aba ọbọ ufọn ọkpọkpọ ukpepn̄kpọ Bible. Ẹtịm Man Inam Utom Nnyịn Ima, page 103, anam an̄wan̄a ete ke Kọmiti Utom Esop edibiere enye emi ekemede ndibọ ufọn nto utọ ndutịm emi.

Esenyịn utom edibiere enye emi edikemede ndinọ mfọnn̄kan un̄wam, ibuotikọ ẹkpenyenede ndikpep, ye n̄wed edinen̄erede enyene ufọn. Eyedi owo emi ekekpepde n̄kpọ ye owo oro ke akpa m̀mê owo emi enye ọdiọn̄ọde onyụn̄ okponode edidu ke eti idaha ndinọ un̄wam. Ẹkeme ndidọhọ eyenete an̄wan emi enyenede ukeme onyụn̄ ọkọride esịm ọyọhọ idaha an̄wam eyenete an̄wan emi mînamke utom aba. Nte ido edide, iyomke asuanetop efen asan̄a ye ada ukpepn̄kpọ oro ẹnọde. Ke ẹnọde, asuanetop emi adade ukpepn̄kpọ ekeme ndibat ini, mme mfiakn̄ka, ye ukpepn̄kpọ oro.—Se Utom Obio Ubọn̄ Nnyịn eke February 1989, page 1-2.

Sia eyen ukpepn̄kpọ edide owo emi ama akana baptism, ke ofụri ofụri iyomke ukpepn̄kpọ aka iso ke anyan ini. Uduak edi ndin̄wam owo emi mînamke utom aba afiak ọtọn̄ọ ndidụk kpukpru mbono esop onyụn̄ edi asuanetop eti mbụk ofụri ini. Esenyịn utom eyese aban̄a n̄kọri utọ ukpepn̄kpọ oro. Utịp ima ima un̄wam emi ekpedi man nditọete iren ye iban ẹmi ẹkeme ndibiom mbiomo mmọ ke iso Jehovah “ẹnyụn̄ ẹmụm n̄kam ẹnyụn̄ ẹsọn̄ọ ẹwụhọ” ke akpanikọ.—Eph. 3:17; Gal. 6:5.