Ẹkûfre Mbon Oro Mîwọrọke An̄wautom Aba
1. Ntak emi ikpesịnde udọn̄ inọ mbon oro mîwọrọke an̄wautom aba?
1 Ndi ọmọfiọk owo ekededi oro mîwọrọke an̄wautom aba? Ekeme ndidi enye ama etre ndibuana ye esop onyụn̄ ọfiọrọ ọkpọn̄ usụn̄. Ekeme ndidi afo okosobo ye utọ owo emi ke ini akabuanade ke utom ukwọrọikọ eke ufọk ke ufọk. Ana nnyịn iti ite ke owo emi osụk edi eyenete nnyịn. Oyom nnyịn inam enye ọdiọn̄ọ ke isụk imama enye, n̄ko oyom in̄wam enye afiak odụk esop onyụn̄ afiak etiene ‘andibọk ye andise mban̄a ukpọn̄ nnyịn.’—1 Pet. 2:25.
2. Didie ke ikeme ndisịn udọn̄ nnọ mbon oro mîwọrọke an̄wautom aba?
2 Wụt ke Emenyene Udọn̄ ke Idemmọ: Nditịn̄ ikọ ye owo oro mîwọrọke an̄wautom aba ke urụk ukopikọ m̀mê ndika n̄kese enye oyowụt ke nnyịn ifreke enye. Nso ke ikpetịn̄? Ndidọhọ enye ke nnyịn ke isụk ikekere iban̄a enye ekeme ndisịn udọn̄ nnọ enye. Nam nneme oro etie inem inem onyụn̄ edi se ibọpde-bọp. (Phil. 4:8) Imekeme nditịn̄ mban̄a akpan n̄kpọ oro ẹkenemede ke mbono esop ke ndondo emi. Imekeme n̄ko ndinọ enye ikot edibuana ke mbono esop m̀mê mbono oro edidide, inyụn̄ idọhọ ke iyenịm itie inọ enye, mîdịghe ke iyekpe usụn̄ inọ enye.
3. Didie ke ẹkenam eyenete an̄wan kiet afiak ọsọn̄ idem ke esop?
3 Ke efakutom kiet, ẹma ẹkụt eyenete an̄wan oro mîwọrọke an̄wautom aba ke n̄kpọ nte isua edịp. Okposụkedi enye mîkenyịmeke ukpepn̄kpọ Bible, eyenete an̄wan oro okokụtde enye ama esika ekese enye ndien ndien, esinyụn̄ ọnọ enye mbufa magazine. Ke mbono district ama okokụre, asuanetop oro ama eneme ndusụk akpan n̄kpọ oro ẹkenemede ke mbono ye eyenete an̄wan oro, ndien ke akpatre, emi ama anam enye afiak ọsọn̄ idem ke esop.
4. Didie ke ikpanam n̄kpọ ye owo oro afiakde ọtọn̄ọ ndibuana ke mme mbono esop?
4 Ke Ini Owo Afiakde Edi: Ke ini owo oro mîwọrọke an̄wautom aba afiakde ọtọn̄ọ ndidụk mme mbono esop, didie ke ikpanam n̄kpọ ye enye? Ọfọn, didie ke Jesus akanam n̄kpọ ye mme mbet esie ke ini mmọ ẹkekpọn̄de enye ke ibio ini? Enye ke ima ima usụn̄ ọkọdọhọ ke mmọ ẹdi “nditọete” imọ onyụn̄ owụt ke imenyene mbuọtidem ke idem mmọ. Enye ama akam ọnọ mmọ akpan utom. (Matt. 28:10, 18, 19) Esisịt ini ke oro ebede, mmọ ẹma ẹsịn ifịk ẹtan̄a eti mbụk ye unana “edikpa mba.”—Utom 5:42.
5. Siak mme idaha oro ikpenyenede nditịn̄ nnọ mbiowo mban̄a owo oro mîwọrọke an̄wautom aba.
5 Ikpenyene ndiyom ndausụn̄ mbiowo mbemiso itọn̄ọde ukpepn̄kpọ Bible ye eyenete oro mîwọrọke an̄wautom aba ke anyan ini m̀mê mbemiso idọhọde enye edisan̄a ye nnyịn ke an̄wautom. Edieke ikụtde asuanetop oro mîwọrọke an̄wautom aba ke efakutom, nnyịn ikpenyene ndisian mbiowo man mmọ ẹnọ enye un̄wam oro odotde.
6. Nso ikeme ndidi utịp edieke in̄wamde mbon oro mîwọrọke an̄wautom aba?
6 Bible owụt in̄wan̄-in̄wan̄ ke ẹdinyan̄a sụk mbon oro ẹfehede mbuba ẹkesịm utịt. (Matt. 24:13) Ke ntre, yom mbon oro ẹkemede ndidi ẹma ẹtuak ukot ẹduọn̄ọ m̀mê oro ẹkefiọrọde ẹkpọn̄ usụn̄. Edieke iwụtde utọ mbon oro ukem ima oro Jehovah amade nnyịn, inyụn̄ inamde mmọ ẹdiọn̄ọ ke imenen̄ede inyene udọn̄ ke idem mmọ, iyokop inemesịt ndikụt mmọ ẹfiakde ẹdiana ye nnyịn ẹnam edisana utom.—Luke 15:4-10.