Ami Mmoyom Ukpepn̄kpọ Bible!
1 Ediwak nnyịn imesiwụt udọn̄ ndinyene ukpepn̄kpọ Bible, ndien ye eti ntak. Ke utom edikpep Bible ke nnyịn isịm utịtmbuba nnyịn eke edinam mbufa mbet. (Matt. 28:19, 20) Ndien kpa ye oro ediwak nnyịn imodu ke ediwak ọfiọn̄, ndusụk ediwak isua, ye unana edinyene san̄asan̄a idatesịt oro otode edikpep owo akpanikọ. Nso ke nnyịn ikeme ndinam mban̄a emi ke November? Sia ẹnọde n̄wed Ifiọk ke ọfiọn̄ emi, nnyịn imekeme ndisịn akpan ukeme ndida enye ntọn̄ọ mbufa ukpepn̄kpọ Bible.
2 Sio Utịturua Kiet m̀mê Awakde Akan Oro Nịm: Nnyịn imesịn udọn̄ inọ kpukpru owo ndisio ini nnịm ke ọfiọn̄ emi man ẹwụk ntịn̄enyịn ke nditọn̄ọ obufa ukpepn̄kpọ Bible. Mme ada Ukpepn̄kpọ N̄wed Esop ẹkpenyene ndimek (mme) utịturua oro ẹdidade ẹnam n̄kpọ akpan akpan kaban̄a uduak emi ndien ekem ẹtịm mme otu mmọ ndidiana kiet nsịn ukeme ke utom mfiakn̄ka.
3 Da mme n̄wetnnịm n̄kpọ mfiakn̄ka fo di mme mbono an̄wautom ẹmi. Ndien waha bịne kpukpru mbon oro ẹkewụtde udọn̄, ẹkebọde n̄wed, m̀mê ẹkedụkde mme mbono esop. Waha bịne owo kiet kiet ye akpan uduak nditọn̄ọ ukpepn̄kpọ.
4 Nam Ukpepn̄kpọ Bible Wụt: Ke mme mbono an̄wautom oro ẹsatde-sat, ẹkpenyene ndinam nnamn̄wụt oro ẹtịmde idem mfọn mfọn, owụtde nte ẹkemede nditọn̄ọ ukpepn̄kpọ ke mfiakn̄ka. Afo emekeme ndidọhọ: “Ediwak owo ẹnyene Bible, edi mmọ ifiọkke nte ke enye ọbọrọ mme akpan mbụme oro kpukpru nnyịn isobode ke uwem. [Wụt se isịnede ke n̄wed Ifiọk, nyụn̄ kot mme enyịn̄ ibuotikọ ke ibuot 3, 5, 6, 8, ye 9.] Ke idade un̄wam ukpepn̄kpọ emi ke hour kiet m̀mê n̄kpọ ntre ke urua, afo emekeme ndinyene akpan ifiọk Bible ke ọfiọn̄ ifan̄ kpọt. Edieke afo akpamade ndimek kiet ke otu ibuotikọ ẹmi, ami nyokop inemesịt ndiwụt fi nte ndutịm emi enyenede ufọn.” Edieke owo oro emen̄ede ndikpep n̄kpọ ke ntak enyenede ndutịm oro ọyọhọde ye utom, nam an̄wan̄a nte ke imenyene ndutịm oro edide ibio ibio n̄ko. Men ediye uduot ekpri n̄wed Oyom wụt, nyịme ndikpep ibio ibio ukpepn̄kpọ kiet ke minit 15-30 ke urua kiet.
5 Edieke kpukpru nnyịn idianade kiet ke ndisịn ukeme nditọn̄ọ ukpepn̄kpọ, edieke nnyịn inyụn̄ ibọn̄de akam iyom edidiọn̄ Jehovah ke ukeme nnyịn, ke akpanikọ nnyịn iyenyene mbufa ukpepn̄kpọ! (1 John 5:14, 15) Edieke afo oyomde ukpepn̄kpọ Bible, eyedi emi edi ifet afo nditọn̄ọ kiet.