Nte Afo Emenen̄ede Owụt Esịtekọm Aban̄a Mme Edidiọn̄ Jehovah?
KENICHI, akparawa emi odude ke ufọt ufọt isua emana, ama aka itie unyam ibọk ndidep ibọk ke ntak ekpri obufịp. Ke ini enye ama ekemen ibọk oro, emi ama afịna enye anamde ofụri idem esie edebe onyụn̄ obụp. Ye unana n̄kpaidem, Kenichi ama ọtọn̄ọ ndiyịk m̀mê anyam ibọk oro ama ọnọ ntịn̄enyịn oro ekemde ke mme udọn̄ imọ.
Ndusụk owo ẹkeme ndikere mban̄a Jehovah Abasi ke ukem usụn̄ oro Kenichi ekesede anyam ibọk oro. Mmọ ẹyịk m̀mê ata ọkpọsọn̄ Abasi, Jehovah, enen̄ede enyene udọn̄ ke idem nnyịn nte mme owo. Okposụkedi nte mmọ ẹfiọkde ke Abasi ọfọn, mmọ inen̄ekede inịm ke akpanikọ nte ke enye ekere aban̄a nnyịn owo kiet kiet. Emi enen̄ede edi akpanikọ edieke n̄kpọ mîkaha iso nte ọfọnde inọ mmọ m̀mê ke ini mmọ ndisọn̄ọ nnyịre ye mme edumbet Bible asan̄ade ye n̄kpọsọn̄ mfịna. Ke ntak unana mbufiọk, mmọ ẹse mme mfịna mmọ nte mfat oro ekedebede ye idem oro okobụpde Kenichi ke mbuari, nte n̄kpọ eke ẹdọhọde ke edi ndudue Abasi ke usụn̄ ekededi.—Mme N̄ke 19:3.
Owo ikpemenke Jehovah idomo ye mme anana-mfọnmma owo. Mme owo ẹnyene adan̄a ke ifiọk ye ukeme. Mmọ ẹkpu nditịm ndiọn̄ọ mme ata udọn̄ mmọ en̄wen, nte owo oro akanyamde ibọk ọnọ Kenichi okokpude. Ke edide isio ye oro, n̄kpọ ndomokiet idịbeke ke enyịn Jehovah. Jehovah esiwak ndin̄wam nnyịn ye unana nnyịn ndikụt nnyụn̄ mfiọk akpanikọ oro koro nnyịn inyenede ntụhọ edisọn̄ọ nyịre ke mme n̄kpọ oro nnyịn mînyeneke nnyụn̄ mfụmi uwak edidiọn̄ oro nnyịn inyenede. Utu ke ndisọp nduọhọ Jehovah ke mfịna ekededi oro nnyịn isobode, akpana nnyịn in̄wana ndidiọn̄ọ mme edidiọn̄ ẹtode Jehovah oro nnyịn idarade.
Nte ekemde ye Webster’s Ninth New Collegiate Dictionary, ẹkeme ndidọhọ ke “edidiọn̄” ọwọrọ “n̄kpọ emi adade inemesịt m̀mê mfọnọn̄kpọ edi.” Nte afo ọmọfiọk nte ke emi enen̄ede edi akpanikọ aban̄a mme edidiọn̄ ẹtode Jehovah?
Inyeneke Mbiet nte Andinọ
Ke ini n̄wanndọ ọdọhọde ke ebe imọ edi eti andinọ, ikọ esie ke ofụri ofụri ọwọrọ nte ke enye ekere nte odotde aban̄a mme udọn̄ ubon, ọnọde udia oro ekemde, itie udakibuot, ye edisịnen̄kpọ kaban̄a inemesịt ye mfọnọn̄kpọ ubon. Didie ke Jehovah ọfọn nte Andinọ nnyịn? Tịm se ekondo Isọn̄ nnyịn, ebietidụn̄ ubonowo. Enye odu oyom usụn̄ ke kilomita 150,000,000 ọkpọn̄ utịn, ata nnennen uniọn̄ ndinam ẹnyene idaha ufiop eyo oro ekemde ndinam uwem odu ke isọn̄. Ẹtịm ekondo nnyịn ke mfọnmma usụn̄ nditụhọ ke degree 23.5, osụn̄ọde ke nsio nsio ini ẹmi ẹtịpde n̄kpọ ẹsịn ke akpakịp idọk. Nte utịp, isọn̄ ọbọk se iwakde ikan owo biliọn ition. Jehovah ke akpanikọ edi utịbe utịbe Andinọ!
Akan oro, Bible ọsọn̄ọ ọnọ nnyịn nte ke Jehovah enyene ntotụn̄ọ udọn̄ ke idem nnyịn nte owo kiet kiet ye ke mfọnọn̄kpọ nnyịn. Kam kere, Jehovah ọfiọk kiet kiet ke otu ediwak biliọn ntantaọfiọn̄ ke enyịn̄, ndien ekpri inuen kiet ikam iduọhọ ke isọn̄ ye unana enye ndidiọn̄ọ. (Isaiah 40:26; Matthew 10:29-31) Adan̄a didie akan oro ke enye ekere ntem aban̄a mme owo ẹmi ẹmade enye ẹkenyụn̄ ẹdepde ke ọsọn̄urua iyịp edima Eyen esie, kpa Jesus Christ! (Utom 20:28) Enyene-ọniọn̄ owo oro ama atan̄a nte enende ete: “Edi ufọn Jehovah ofori owo, enye inyụn̄ idianke afanikọn̄ ke esịt.”—Mme N̄ke 10:22.
Mme Edidiọn̄ Oro Ẹforide Nnyịn
Nnyịn imenyene ọsọn̄urua n̄kpọ emi ikpowụtde ntotụn̄ọ esịtekọm iban̄a. Nso ke enye edi? Bible anam ẹdiọn̄ọ enye ke ini enye ọdọhọde ete: “[Ibet, NW] inua fo ọfọn mi akan mme tọsịn gold ye silver.” (Psalm 119:72; Mme N̄ke 8:10) Yak eti gold ọsọn̄ urua nte edisọsọn̄, ibet Jehovah edi se ẹkpetịmde ẹyom ẹkan. Nnennen ifiọk ibet esie ọkọrọ ye ikike ye mbufiọk emi Jehovah ọnọde mbon oro ẹyomde akpanikọ ke ofụri esịt ẹdi se ẹkpedade ke ọsọn̄urua n̄kpọ. Mmọ ẹn̄wam nnyịn ndikpeme idem nnyịn, ndiyọ n̄kpọsọn̄ idaha, ndise mban̄a mme mfịna uforo uforo, ndinyụn̄ n̄kop uyụhọ ye inemesịt.
Emi edi akpanikọ idem ye ata n̄kpri owo. Kere nte ekpri eyenan̄wan ọkọkọkde mme mfịna esie ke nditiene ibet Jehovah. Eyenan̄wan oro, Akemi, odụn̄ ekpere Tokyo. Ete ye eka esie ẹma ẹda mme edumbet Bible ẹsịn ke edinam ke ndinọ enye ukpep ndien ebede ke ikọ ye ke uwụtn̄kpọ ẹma ẹn̄wam eyen mmọ ndikọri ima nnọ Jehovah ye mbọhọidụn̄. Ke ẹdade ẹkụt mme mfịna emi enye edisobode ke ufọkn̄wed, mmọ ẹma ẹn̄wana nditịm enye idem nte ẹkekeme. Ke ini Akemi okodụkde ufọkn̄wed praimari, nte ededi, ndusụk nsan̄a ubet ukpepn̄kpọ esie ẹkese enye nte edide “isio” koro enye ekesibọn̄de akam mbemiso udia onyụn̄ etrede ndibuana ke ndusụk edinam ẹmi mîkemke ye N̄wed Abasi ke ntak ubieresịt esie. Ikebịghike enye ama akabade edi iso en̄wan ọnọ otu mbon mfiomo ẹmi ẹkesidụride enye ẹdụk nditụn̄ọ kiet ke n̄wed asuanade ẹnyụn̄ ẹmia enye ufia ke iso, ẹfian̄ade enye ubọk, ẹnyụn̄ ẹda enye ẹnam n̄kpọ mbubru.
Ekpri Akemi ikosioho usiene, ikonyụn̄ idịgheke ke iso mme anditụhọde enye. Utu ke oro, enye ama an̄wana ndida se enye ekekpepde nsịn ke edinam. Nte utịp eti edu uwem ye uko esie, ekemmọ nditọ ufọkn̄wed ẹma ẹkpono enye. Ẹma ẹnam andikpep ọdiọn̄ọ aban̄a emi, ndien tọn̄ọ ke usen oro, Akemi ikosoboke aba n̄kaiso esuene ke ufọkn̄wed.
Nso ikan̄wam Akemi ndiyọ ọkpọsọn̄ idaha emi uforo uforo? Nnennen ifiọk, ikike, ye ọniọn̄ otode Jehovah emi ete ye eka esie ẹketemede enye. Enye ama etịm emehe ye ime Jesus, ndien oro ama an̄wam enye ndikpebe uwụtn̄kpọ esie. Bible ama onụk enye ndifiọk nte ke ndusụk owo ẹsinam ndiọi n̄kpọ ke unana ifiọk, ndien emi ama esịn udọn̄ ọnọ enye ndisua idiọk oro mbon mfiomo oro ẹkenamde ye unana edisua mme owo oro ke idem mmọ.—Luke 23:34; Rome 12:9, 17-21.
Ke akpanikọ, idụhe ete ye eka oro ẹkpeyomde ndikụt eyen mmọ nte edide n̄kpọ nsahi ye isụn̄i. Kpa ye oro, afo emekeme ndikere nte ete ye eka Akemi ẹkenemde esịt ke ini mmọ ẹkekopde ofụri ofụri se iketịbede. Utọ nditọ oro ẹnen̄ede ẹdi edidiọn̄ otode Jehovah.—Psalm 127:3; 1 Peter 1:6, 7.
Ndibet Jehovah ke Ime
Mbemiso afo ọbọde mme edidiọn̄ Jehovah, nte ededi, ndusụk ini ana afo ebet ini esie. Jehovah ọfiọk idaha fo onyụn̄ ọnọ se afo oyomde ke ini enye edinyenede ufọn ikan. (Psalm 145:16; Ecclesiastes 3:1; James 1:17) Afo emekeme ndima mfri, edi nso ke afo ekpekere aban̄a enyeneufọk emi ọkọnọde fi mfri mbemiso ini ndidia enye ekemde? Edide apple, sokoro, m̀mê n̄kpọ efen, afo akpama mfri fo adat, enyene mmọn̄, onyụn̄ enịn̄e. Ukem ntre, Jehovah ọnọ se afo oyomde ke nnennen ini—ibakke ikaha inyụn̄ ibehe ini ikaha.
Ti ifiọk n̄kpọntịbe Joseph. Ke mîtoho ke ndudue esie, enye ama okụt idemesie ke n̄kịmn̄kịm ufọk-n̄kpọkọbi idakisọn̄ ke Egypt. Ekemmọ owo n̄kpọkọbi, akama wine Pharaoh, ama odori enyịn ndidi se ẹsanade ẹyak onyụn̄ ọn̄wọn̄ọ ndinam Pharaoh okop ikọ Joseph. Edi ke ẹma ẹkesana ẹyak enye ama efre ofụri ofụri aban̄a Joseph. Eketie nte ẹma ẹsịn Joseph. Nte ededi, ke ofụri isua iba ẹma ẹkebe, ẹma ẹsio enye ke ufọk-n̄kpọkọbi ke akpatre ndien nte ini akade ẹnam akabade edi udiana andikara ke Egypt. Utu ke ndinana ime, Joseph ama ebet Jehovah. Ke ntak emi, ẹma ẹdiọn̄ enye ke usụn̄ emi ọkọwọrọde edinịm nditọ Israel ye nditọ Egypt uwem.—Genesis 39:1–41:57.
Masashi ekedi ebiowo ke esop ke edere edere Japan. Enye ikodụhe ke n̄kịmn̄kịm ufọk-n̄kpọkọbi idakisọn̄, edi enye ekenyene ndibet Jehovah. Ntak-a? Tọn̄ọ nte ẹketọn̄ọ Ufọkn̄wed Unọ Mme Asan̄autom Ukpep, ufọkn̄wed ẹmi ẹnọde mme asan̄autom Christian ẹmi ẹdotde ukpep, ke Japan, enye ama anam emi edi utịtmbuba ofụri esịt ndika. Enye ama ọbọn̄ akam ọkpọsọn̄ ọkpọsọn̄ aban̄a ifet oro. Ẹma ẹkot nsan̄a asiakusụn̄ esie, edi kpa ye ọkpọsọn̄ udọn̄ esie, owo ikokotke Masashi. Enye ama okụt edikpu idiọk idiọk.
Kpa ye oro, enye ama anam mme usio-ukot ndiyọ mme ntụk esie. Enye ama ekpep Bible ye mme n̄wed oro Watch Tower Society emịn̄de, owụkde ntịn̄enyịn ke mme utọ ibuot nneme nte edisụhọde idem ye owo ndikara mme ntụk esie. Enye ama enen̄ede ekikere esie onyụn̄ okụt ekese uyụhọ ke utom esie. Ekem, ke ini mîkodorike enyịn, enye ama ọbọ ikot ndika ufọkn̄wed oro.
Ke ama ọkọkọri utọ edu nte ime ye nsụhọdeidem, enye ama ọbọ ufọn akan oto ufọkn̄wed oro. Ke ukperedem, ẹma ẹnọ Masashi ifet ndisan̄a n̄kese nditọete esie nte esenyịn oro asan̄ade-san̄a. Ih, Jehovah ama ọdiọn̄ọ se Masashi okoyomde onyụn̄ ọnọ enye ke ini enye edinyenede ufọn ikan.
Yom Mme Edidiọn̄ Esie
Ntem, Jehovah itiehe nte anyam ibọk oro. Okposụkedi nnyịn ikemede nditre ndifiọk ukpeme ye edikere mban̄a Jehovah, mfọnido esie ẹsịm nnyịn ke nsio nsio usụn̄—ke mme ini ye mme usụn̄ ẹmi ẹnọde nnyịn ufọn ẹkan. Ntre ka iso ndiyom mme edidiọn̄ esie. Ti nte ke afo emenyenyene ediwak ntak ndiwụt esịtekọm. Ẹdiọn̄ fi ye akpan enọ ndika iso ndu uwem ke isọn̄. Ẹnọ fi ifiọk Jehovah ye eke mfọnmma usụn̄ esie. Ẹnọ fi ikike. Afo n̄ko emenyene mbufiọk. Kpukpru mmọ ẹmi ẹtịp ẹsịn ke mfọnọn̄kpọ ye inemesịt fo.
Man adara mme edidiọn̄ Jehovah ọyọhọ ọyọhọ, ka iso ndikpep Bible kpukpru ini. Ben̄e Jehovah an̄wam fi ndifiọk nnyụn̄ nda mme ọsọn̄urua ukpepn̄kpọ Ikọ esie eke odudu spirit nsịn ke edinam. Mmọ ẹyefori fi ke akpanikọ, man afo okûnana baba n̄kpọ kiet. Ih, mmọ ẹdiwọrọ inemesịt ye uyụhọ fo idahaemi ye akpakịp uwem ke obufa ererimbot emi edide.—John 10:10; 1 Timothy 4:8, 9.
[Ndise ke page 23]
Edidiọn̄ Jehovah ọsọn̄ urua akan gold