“Ke Inua Nseknditọ”
KE INI Samuel ekedide ekpri eyen, enye ama ọsọn̄ọ omụm ndinen edumbet akama kpa ye idiọkido nditọ Akwa Oku Eli. (1 Samuel 2:22; 3:1) Ke eyo Elisha, ekpri eyenan̄wan Israel oro ẹkemụmde ke ukat ke Syria ama ọnọ ekaufọk esie uko uko ikọ ntiense. (2 Ndidem 5:2-4) Ke ini Jesus ekedide isua 12 ke emana, enye ama etịn̄ ikọ uko uko ọnọ mme andikpep Israel, obụpde mme mbụme onyụn̄ ọnọde mme ibọrọ oro ẹkekpade mme andida nse idem. (Luke 2:46-48) Ke ofụri mbụk n̄kpri mme andituak ibuot nnọ Jehovah ẹsinam n̄kpọ esie ke edinam akpanikọ.
Ndi n̄kpri owo mfịn ẹwụt ukem edu edinam akpanikọ oro? Ke akpanikọ, ẹwụt! Ntọt ẹtode mme ọfis n̄kọk itieutom Watch Tower Society ẹwụt nte ke ata ediwak n̄kpri owo oro ẹnịmde ke akpanikọ “ẹnọ idemmọ unyịme unyịme” ke utom Jehovah. (Psalm 110:3, NW) Nti utịp ẹsụn̄ọde ẹto ukeme mmọ ẹnọ kpukpru Christian nsịnudọn̄, n̄kpri ye ikpọ ete, “[ẹkûkpa] mba ke edinam eti n̄kpọ.”—Galatia 6:9.
Eti uwụtn̄kpọ kiet edi Ayumi, ekpri eyenan̄wan otode Japan emi akakabarede edi asuanetop ke ini ekedide isua itiokiet ke emana okonyụn̄ anamde edi utịtmbuba esie ndinọ kpukpru owo ke ubet ukpepn̄kpọ esie ikọ ntiense. Enye ama ọbọ unyịme ndidọn̄ nsio nsio n̄wed ke itie ubonn̄wed ubet ukpepn̄kpọ, otịmde idem ndibọrọ mbụme ekededi oro nsan̄a ufọkn̄wed esie ẹdibụpde. Ekpere ndidi kpukpru nditọ ubet ukpepn̄kpọ esie ọkọrọ ye andikpep ẹma ẹdimehe ye mme n̄wed ẹmi. Ke isua itiokiet emi enye okodude ke ufọkn̄wed primari, Ayumi ama anam ndutịm ọnọ ukpepn̄kpọ Bible 13. Enye akana baptism ke adan̄aemi okodude ke n̄wed inan̄, ndien kiet ke otu mme ufan esie emi enye akadade ukpepn̄kpọ akana baptism ke ini okodude ke n̄wed itiokiet. Akande oro, eka ye ikpọ nditọeka iban eyen ukpepn̄kpọ Bible emi iba n̄ko ẹma ẹkpep n̄kpọ ẹnyụn̄ ẹna baptism.
Eti Eduuwem Ọnọ Ikọ Ntiense
Apostle Peter ọkọdọhọ ete: “Ẹkama idem nte odotde ke iso mme Gentile,” ndien n̄kpri owo ẹdide Christian ẹda ewụhọ emi ke akpan n̄kpọ. (1 Peter 2:12) Nte utịp, eti eduuwem mmọ esinọ eti ikọ ntiense. Ke idụt Cameroon ke Africa, eren kiet ama edi mbonoesop Mme Ntiense Jehovah ọyọhọ utịm ikaba onyụn̄ etie adiana ekpri eyenan̄wan kiet. Ke ini etịn̄ikọ ọkọdọhọde otuowo ẹkụbọde itie ke Bible, eren emi ama okụt nte ke ekpri eyenan̄wan emi ama ọsọsọp okụt ufan̄ikọ emi ke Bible esiemmọ onyụn̄ etiene okot ye ntịn̄enyịn. Edu eyenan̄wan emi ama otụk enye tutu ke ini mbonoesop ama akasuana, enye ama aka ebịne etịn̄ikọ oro onyụn̄ ọkọdọhọ ete: “Ekpri eyenan̄wan emi amanam nyom ndikpep Bible ye mbufo.”
Ufọkn̄wed kiet emi nditọ ufọkn̄wed 25 ẹdide nditọ Mme Ntiense Jehovah odu ke South Africa. Eti eduuwem mmọ omosụn̄ọ ke Mme Ntiense Jehovah ndinyene eti enyịn̄. Andikpep kiet eketịn̄ ọnọ eka edide Ntiense ete ke imọ ifiọkke nte Mme Ntiense ẹsikpepde nditọ mmọ n̄kpọ ọfọn ntre, akpan akpan sia edide ufọkabasi imọ omokpu ndin̄wam n̄kpri owo. Obufa andikpep ama edi ndin̄wam ke ufọkn̄wed emi ndien enye ama ọsọp okụt eti eduuwem nditọ ẹdide Ntiense mi. N̄wan emi ama obụp ekpri eyeneren Ntiense kiet se imọ idinamde man ikabade idi kiet ke otu Mme Ntiense Jehovah. Enye ama anam an̄wan̄a nte ke ẹnyene ndikpep enye Bible, ndien enye ama odiomi ete ye eka esie ndifiak mbịne udọn̄ oro ẹkewụtde do.
Ke Costa Rica, Rigoberto ama ọdiọn̄ọ se idide ata akpanikọ ke ini owo iba ke otu mbon ubet ukpepn̄kpọ esie ẹkedade Bible ndibọrọ mme mbụme esie ẹban̄ade Abasi-Ita-ke-Kiet, ukpọn̄, ye hell ikan̄. Se mmọ ẹketịn̄de ama enyene odudu ke idemesie idịghe n̄kukụre ke ntak ukeme mmọ ndida N̄wed Abasi nnam n̄kpọ edi n̄ko koro eti eduuwem mmọ ekedide ata isio ye se enye okokụtde ke mme ufọkabasi Christendom. Kpa ye ubiọn̄ọ otode ubon, Rigoberto ke anam eti n̄kọri ke ukpepn̄kpọ Bible esie.
Ke Spain Ntiense Jehovah iba—kiet ke otu mmọ edide isua usụkkiet ke emana—ẹma ẹsobo ye eren kiet emi ekerede Onofre. Ke adan̄aemi Ntiense oro ekedide akamba owo ekedide anditịn̄ ikọ, Ntiense ekedide ekpri owo ama etiene ese N̄wed Abasi onyụn̄ okot oto ndusụk itien̄wed Bible ke ibuot. Ama otụk Onofre. Enye ama ebiere ke imọ iyom ndikpep Bible ke ukem ebiet oro ekpri eyeneren emi ekekpepde ndida N̄wed Abasi nnam n̄kpọ mfọn mfọn ntre. Ntem, ke tụhi tụhi usenubọk Sunday oro eketienede, enye ama aka Ufọkmbono Obio Ubọn̄. Enye ekenyene ndibet ke an̄wa tutu ufọt uwemeyo, ke ini Mme Ntiense ẹkedide mbonoesop mmọ. Ọtọn̄ọde ke ini oro akaiso, enye ama anam eti n̄kọri onyụn̄ ayarade uyakidem esie ke mmọn̄ baptism ke ndondo emi.
N̄kpri Owo Ẹdide Ntiense Oro Ẹkụtde Unen
Ih, Jehovah esida n̄kpri owo ọkọrọ ye ikpọ owo ndisịm mbon nsụhọdeidem. Ẹma ẹkaiso ẹkụt emi ke ifiọkutom otode Hungary. Do, nurse ufọkibọk kiet ama okụt ete ke ini ekededi oro isenowo ẹdide ndise owo udọn̄ọ emi ekedide isua duop ke emana, mmọ ẹyeda mme n̄wed ndikot ọkọrọ ye udia ẹsọk enye. Ke edemerede enye udọn̄, enye ama ekere se ekpri eyenan̄wan emi okpokotde onyụn̄ okụt nte ke ekedi Bible. Nurse emi ama enyene nneme ye enye ndien ekem ama ọdọhọ ete: “Ọtọn̄ọde ke akpa ini, enye ama enen̄ede ekpep mi n̄kpọ.” Ke ini ekpri eyenan̄wan emi ọkọkpọn̄de ufọkibọk, enye ama ọnọ nurse emi ikot edidụk mbono, edi nurse emi ama esịn. Nte ededi, ke ukperedem, enye ama onyịme ndidụk Mbono District “Edisana Usem.” Ibịghike ke oro ebede, enye ama ọtọn̄ọ ukpepn̄kpọ Bible, ndien isua kiet ke ukperedem enye ama ana baptism—kpukpru emi edi utịp ekpri eyenan̄wan ndida ini oro enye okodude ke ufọkibọk n̄kot n̄wed ukpep Bible.
Ana Ruth, ke El Salvador, okodu ke udiana isua esie ke ufọkn̄wed sekọndri. Enye ama enyene edu edikpọn̄ n̄wed ukpep Bible ke okpokoro esie man mbon en̄wen ẹkot edieke mmọ ẹyomde. Ke okụtde ete ke n̄wed emi ama osop ndien ekem afiak ọwọrọ edi ke ndusụk ini ama ekebe, Ana Ruth ama edifiọk ete ke nsan̄a ufọkn̄wed kiet, Evelyn, ekesikot enye. Ke esisịt ini ama ekebe, Evelyn ama onyịme ndikpep n̄kpọ onyụn̄ ọtọn̄ọ ndidụk mme mbonoesop. Ke akpatre, enye ama ana baptism, ndien idahaemi enye anam utom nte asiakusụn̄ unọ un̄wam ofụri ini. Ana Ruth edi asiakusụn̄ ofụri ini.
Ke Panama eyenete an̄wan kiet ama ọtọn̄ọ ukpepn̄kpọ ye n̄wan kiet emi ebe esie ọkọtọn̄ọde ndibiọn̄ọ akpanikọ tutu osịm udomo oro ukpepn̄kpọ emi ekekperede nditre. Nte ededi, edu ebe esie ama ọtọn̄ọ ndikpụhọde sụn̄sụn̄. Ndusụk ini ke ukperedem, eyeneka esie eren, edide Ntiense, ama ọdọhọ enye esịn n̄kanika unọ ntọt mban̄a inọ ke ufọk imọ. Nte enye ekesịnde n̄kanika emi, eyen eyeneka esie emi edide isua usụkkiet ke emana ama ọnyọn̄ edi ufọk akamade iso mfụhọ mfụhọ. Enye ama obụp eyenan̄wan emi m̀mê nso itịbe, ndien eyenan̄wan emi ama ọdọhọ ete ke imọ ye akamba eyeneka imọ an̄wan ikaka ndinịm ukpepn̄kpọ Bible edi owo oro ikodụhe ke ufọk, ntre ke imọ ikekemeke ndinam n̄kpọ ndomokiet nnọ Jehovah usen oro. Eyeneka ete esie ama ọdọhọ ete: “Ntak mûkwọrọke unọ mi? Do afo eyenam n̄kpọ ọnọ Jehovah.” Eyen eyeneka esie ama efehe ye inemesịt ndikemen Bible esie, ndien ukpepn̄kpọ ama ọtọn̄ọ.
Eka esie (n̄wan eyeneka eren emi) ke akakpan̄ utọn̄. Enye ekekere ke ofụri n̄kpọ emi ekedi n̄kpọ mbubru, edi kpukpru ini emi eren emi akade ufọk esie, enye eyedọhọ eyen eyeneka esie onịm ukpepn̄kpọ Bible ye imọ. Ke ini eka okokụtde ke eyeneka ebe imọ inamke mbubru ndien ke enyene ndusụk n̄kpọsọn̄ mbụme, enye ama ebiere ndinịm ukpepn̄kpọ oro ke idemesie ye eyen esie odude ke itie. Enye ama ọtọn̄ọ ndikpep n̄kpọ ikaba ke urua onyụn̄ anam usọp usọp n̄kọri. Ke akpatre, enye ama osịm udomo ediyak idem nnọ ndien ama ana baptism kpa ke mbono oro n̄wan esie akanade—ke ntak eti edu ekpri eyen eyeneka esie.
Uko N̄kpri Owo Ọnọ Eti Ikọ Ntiense
Bible ọdọhọ ete: “Sọn̄ idem, ndien enye eyesọn̄ fi esịt: tịm bet Jehovah.” (Psalm 27:14) Mme ikọ ẹmi ẹnyene n̄kpọ ndinam ye kpukpru mme asan̄autom Abasi, ndien n̄kpri owo ọkọrọ ye ikpọ ẹma ẹda mmọ ẹsịn ke edinam ke isua emi ekebede. Ke Australia, ke ini eyenan̄wan isua ition ke emana ọkọtọn̄ọde obufa ufọkn̄wed, eka esie ama aka ebịne andikpep ndinam se Mme Ntiense Jehovah ẹnịmde ke akpanikọ an̄wan̄a. Andikpep oro ama ọdọhọ ete: “Mma mfọfiọk se mbufo ẹnịmde ke akpanikọ. Eyen fo ama etetịn̄ ofụri n̄kpọ ọnọ mi.” Ekpri eyenan̄wan emi ikefeheke ndịk ndika mbịne andikpep esie ikpọn̄ ndikanam se enye onịmde ke akpanikọ an̄wan̄a.
Andrea emi edide isua ition ke emana ke Romania n̄ko ama owụt uko. Ke ini eka esie ọkọkpọn̄de ido ukpono Orthodox man akabade edi Ntiense, mme mbọhọidụn̄ esie ẹma esịn ndikpan̄ utọn̄ nnọ enye. Usen kiet ke Ukpepn̄kpọ N̄wedesop, Andrea ama okop nte esenyịn utom ọsọn̄ọde etịn̄ ufọn owo ndikwọrọ ikọ nnọ mbọhọidụn̄ esie. Enye ama enen̄ede ekere aban̄a emi, ndien ke ọnyọn̄de ufọk enye ama ọdọhọ eka esie ete: “Mama, ama adaha utom, nyedemede, ndọn̄ n̄wed ke ekpat mi nte afo esinamde, ndien nyebọn̄ akam nnọ Jehovah an̄wam mi ntịn̄ mban̄a akpanikọ ye mme mbọhọidụn̄.”
Ke ndan̄nsiere Andrea ama anam se enye ọkọn̄wọn̄ọde. Ekem, ke ọsọn̄de idem esịt, enye ama amia n̄kanika enyịnusụn̄ mbọhọidụn̄. Ke ini mbọhọidụn̄ ekeberede usụn̄, ekpri eyenan̄wan emi ama ọdọhọ ete: “Mmọfiọk nte tọn̄ọ eka mi akakabade edi Ntiense, afo umaha enye. Enye odomo ndinyene nneme ye afo ediwak ini, edi afo ukoyomke ndikpan̄ utọn̄ nnọ enye. Emi etịmede enye ekikere, edi nyom ndinam fi ọfiọk ke nnyịn imama fi.” Ekem, Andrea ama akaiso ndinọ eti ikọ ntiense. Ke usen kiet, enye ama asuan n̄wed itiokiet, magazine itiokiet, n̄kpri n̄wed inan̄, ye tract inan̄. Tọn̄ọde ke oro, enye esiwọrọ an̄wautom kpukpru ini.
Ke Rwanda nditọete nnyịn ẹnyene ndiwụt ọkpọsọn̄ uko ke ntak en̄wan oro odude do. Ke idaha kiet ẹma ẹsịn ubon kiet ẹdide Mme Ntiense ke ubet emi mbonekọn̄ ẹkeyomde ndiwot mmọ. Ubon emi ẹma ẹdọhọ ẹyak mmimọ ibemiso ibọn̄ akam. Ẹma ẹnyịme emi, ndien kpukpru owo ẹkebọn̄ ke ndopuyo ke mîbọhọke Deborah, eyenan̄wan mmọ. Nte mbụk kiet owụtde, Deborah ama ọbọn̄ akam uyo ọwọrọ: “Jehovah, urua emi ami ye Papa ima inịm magazine ition. Nnyịn idisan̄a didie ifiak ibịne mme owo ẹmi man ikekpep mmọ akpanikọ inyụn̄ in̄wam mmọ ẹnyene uwem? Adianade do, kemi ndisan̄a didie ndi asuanetop? N̄koyom ndina baptism man n̄kpanam n̄kpọ fo.” Ke okopde emi, owoekọn̄ kiet ama ọdọhọ ete: “Nnyịn ikemeke ndiwot mbufo ke ntak ekpri eyenan̄wan emi.” Deborah ama ọbọrọ ete: “Sọsọn̄ọ-ọ.” Ẹma ẹnịm ubon oro uwem.
Ke ini Jesus akanamde ubọn̄ ubọn̄ isan̄ odụk Jerusalem ke ekperede utịt uwem esie eke isọn̄, akwa, idara idara otuowo ẹkedara enye. Nditọwọn̄ ye ikpọ owo ẹma ẹsịne ke otu emi. Nte uwetn̄kpọ emi ọdọhọde, n̄kpri nditọiren “[ẹma ẹfiori] ke temple, ẹte, Hosanna enyene Eyen David.” Ke ini ikpọ oku ye mme scribe ẹkefan̄ade emi, Jesus ama ọsọp ọbọrọ ete: “Nte akanam mbufo ikotke se ẹwetde ẹte, Afo osio itoro eke ọfọnde ama ke inua nseknditọ ye mme awapeba?”—Matthew 21:15, 16.
Nte idịghe n̄kpọ inemesịt ndikụt nte ke idem mfịn emi mme ikọ Jesus ẹdi akpanikọ? “Ke inua nseknditọ ye mme awapeba”—ndien, nnyịn ikpakam idian, mme uyen ye n̄kparawa iren ye iban—Jehovah osio itoro eke ọfọnde ama. Ke akpanikọ, ke ini edide edisịm editoro Jehovah, nsụhọde n̄kan isua emana idụhe.—Joel 2:28, 29.