Ẹbịne Emem Abasi ke Uwem Ubon

“Mbufo mme orụk ererimbot, ẹnọ Jehovah, ẹnọ Jehovah ubọn̄ ye odudu.”—PSALM 96:7.

1. Jehovah ọkọnọ uwem ubon nso orụk ntọn̄ọ?

JEHOVAH ọkọtọn̄ọ uwem ubon ke emem ye inemesịt ke ini enye akadiande akpa eren ye akpa n̄wan ke ndọ. Ke akpanikọ, Adam ama okop inemesịt tutu enye eketịn̄ idatesịt esie ke mbịghi-n̄kan uto oro ẹwetde-wet ete: “Emi ndien edi ọkpọ eke otode ke ọkpọ mi, ye obụk eke otode ke obụk mi: emi eyekere N̄wan, koro ẹdade emi ke idem Eren owo.”—Genesis 2:23.

2. Nso ke Abasi ekenyene ke ekikere aban̄a ndọ ke adianade ye edida inemesịt nsọk nditọ esie ẹdide owo?

² Ke ini Abasi ọkọtọn̄ọde ndọ ye ndutịm ubon, enye ama enyene se ikande ikpîkpu edida inemesịt nsọk nditọ esie ẹdide owo ke ekikere. Enye okoyom mmọ ẹnam uduak esie. Abasi ọkọdọhọ akpa ebe ye n̄wan oro ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.” (Genesis 1:28) Utom oro akamade utịp ke akpan. Adam, Eve, ye nditọ ini iso mmọ ẹkpekop inemesịt didie ntem edieke akpa ebe ye n̄wan oro ke n̄kopitem ẹkpekenamde uduak Jehovah!

3. Nso ke oyom man mme ubon ẹdu uwem ke uten̄e Abasi?

³ Idem mfịn emi, nte ededi, ubon ẹkop inemesịt ẹkan ke ini mmọ ẹdianade kiet ẹnam uduak Abasi. Ndien nso uyama uyama ini iso ke mme utọ okopitem ubon oro ẹnyene ntem! Apostle Paul ekewet ete: “Uten̄e Abasi ọwọrọ udori ke kpukpru usụn̄, koro un̄wọn̄ọ uwem emi odude ke emi ye eke uwem emi edide asan̄ade ye enye.” (1 Timothy 4:8) Mme ubon ẹmi ẹdude uwem ke ata uten̄e Abasi ẹtiene mme edumbet Ikọ Jehovah ẹnyụn̄ ẹnam uduak esie. Mmọ ẹbịne emem Abasi ndien ke ntem ẹkụt inemesịt ke “uwem emi odude ke emi.”

Uwem Ubon Odu ke Itiendịk

4, 5. Ntak emi ẹkemede ndidọhọ ke uwem ubon odu ke itiendịk idahaemi ke ofụri ererimbot?

⁴ Nte ido edide, nnyịn ikwe emem ye inemesịt ke kpukpru ubon. Ke etịn̄de aban̄a ndụn̄ọde oro itieutom unam ndụn̄ọde mban̄a ibat mme owo ẹkotde Esop Ibatowo akanamde, The New York Times ọdọhọ ete: “Ke mme idụt imọ ye eke ubuene ukem ukem, ndutịm uwem ubon ke okpụhọrede akamba akamba.” Ẹkot ẹto andiwet ndụn̄ọde emi nte ọdọhọde ete: “Ekikere oro nte ke ubon edi ikpehe oro enyenede iwụk onyụn̄ adianade kiet emi ete anamde n̄kpọ nte andinọ n̄kpọ eke ndutịm uforo eka onyụn̄ anamde n̄kpọ nte andinọ ntịn̄enyịn ke n̄kan̄ eke ntụk edi n̄ke. Ata idem n̄kpọ edi nte ke mme ọsọ n̄kpọ nte itie eka oro mîdọhọ ndọ, ibat usiondọ oro ọdọkde-dọk, [ye] n̄kpri ubon . . . ẹda itie ke ofụri ererimbot.” Ke ntak mme utọ ọsọ n̄kpọ oro, ediwak miliọn ubon ẹnana iwụk, emem, ye inemesịt, ndien ediwak ke ẹdianarede ẹtie. Ke Spain ibat usiondọ ama ọdọk ekesịm usiondọ 1 ke otu ndọ 8 ke ntọn̄ọ ntọn̄ọ akpatre iduọk isua eke ọyọhọ isua ikie 20 emi—etịmde ọdọk ọkpọn̄ usiondọ 1 ke otu ndọ 100 ke n̄kpasịp isua 25 ke mbemiso. Ẹdọhọ ke England enyene kiet ke otu n̄wakn̄kan ibat usiondọ ke Europe—ndọ 4 ke otu 10 ẹsikpu. Idụt oro n̄ko omokụt usọp usọp n̄kọri ke ubon oro ete m̀mê eka kpọt esede enyịn.

⁵ Etie nte ndusụk owo isikam ikemeke ndibet tutu ẹsio ndọ. Ediwak owo ke ẹbụn̄ọ ẹdụk “Itieuwa Usịbe Ebuana” ekperede Tokyo, Japan. Temple Shinto emi enyịme mme eben̄e kaban̄a usiondọ ye kaban̄a edisịbe mme itie ebuana eken oro owo mîmaha. Andituak ibuot kiet kiet ewet eben̄e esiemmọ ke mfefere obukpọk, ọkọn̄ enye ke ibibene itieuwa, onyụn̄ ọbọn̄ akam oyom ibọrọ. N̄wedmbụk n̄kpọntịbe kiet ke Tokyo ọdọhọ ke ini ẹketọn̄ọde itieuwa oro ke n̄kpọ nte isua ikie ẹmi ẹkebede, “iban imọ mbonurua n̄kann̄kụk ẹkesiwet mme akam ẹben̄e ẹte mme ebe mmimọ ẹkpọn̄ mme ọdiọn̄ọ mmọ ẹnyụn̄ ẹfiak ẹnyọn̄ ẹtiene mmimọ.” Nte ededi, mfịn, ata ediwak eben̄e edi kaban̄a usiondọ, idịghe kaban̄a edifiak nnam emem. Ye unana eyịghe, uwem ubon mfịn odu ke itiendịk ke ofụri ererimbot. Ndi emi ekpenyene ndikpa mme Christian idem? Baba, sia Bible ọnọ nnyịn mme ntak kaban̄a mme mfịna ubon eyomfịn.

Ntak Emi Ubon Odude ke Afanikọn̄?

6. Nso ebuana ke 1 John 5:19 enyene ye afanikọn̄ oro ubon odude mfịn?

⁶ Ntak kiet anamde ubon odu ke afanikọn̄ mfịn edi emi: “Ofụri ererimbot onyụn̄ esịne ke ubọk andidiọk.” (1 John 5:19) Nso ke nnyịn ikeme ndidori enyịn andidiọk, Satan kpa Devil, ndinam? Enye edi idiọk, oburobụt osu nsu. (John 8:44) Idịghe n̄kpọ n̄kpaidem ererimbot esie ọduọde enyịne ke abian̄a ye oburobụt ido, ẹmi ẹbiatde uwem ubon idiọk idiọk! Ke ọwọrọde ọkpọn̄ esop Abasi, odudu Satan oyom ndisobo ndọ oro Jehovah okowụkde nnyụn̄ nda utịt nsọk emem emem uwem ubon.

7. Didie ke mme edu oro ediwak owo ẹwụtde ke ukperedem ini ẹmi ẹkeme nditụk mme ubon?

⁷ Ẹwụt ntak efen kaban̄a mme mfịna ubon oro ẹnọmọde ubonowo kemi ke 2 Timothy 3:1-5. Ntịn̄nnịm ikọ Paul oro ẹwetde ke ọtọ oro owụt ke nnyịn idu uwem ke “ukperedem ini.” Mme ubon ikemeke nditie emem emem nnyụn̄ n̄kop inemesịt edieke mme andibuana ke mmọ ẹdide “mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ; ẹma ebiari, ẹyak idiọkitọn̄ akan mmọ ubọk, ẹtie obom obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi; ẹnyene enyọn̄ enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi.” Ubon ikemeke ndinen̄ede n̄kop inemesịt edieke idem owo kiet ke otu mme andibuana ananade ima uduot owo m̀mê uten̄e Abasi. Uwem ubon akpasan̄a didie etie emem emem edieke owo ke ubon ekpetiede obom obom onyụn̄ esibiatde un̄wọn̄ọ? Ke akam ọdiọkde akan, emem ye inemesịt ẹkpesan̄a didie ẹdu ke ini mme andibuana ke ubon ẹdide mme ama mbre n̄kan Abasi? Mmọemi ẹdi edu mme owo ke ererimbot emi Satan akarade. Eyịghe idụhe emem ye inemesịt ubon ẹnanade ke mme ukperedem ini ẹmi!

8, 9. Nso utịp ke eduuwem nditọ ekeme ndinyene ke inemesịt ubon?

⁸ Ntak efen emi ediwak ubon ẹnanade emem ye inemesịt edi idiọk eduuwem nditọ. Ke ini Paul ekebemde iso etịn̄ aban̄a mme idaha ke ukperedem ini, enye ama etịn̄ prọfesi ete ke ediwak nditọ ẹyesọn̄ ibuot ye ete ye eka. Edieke afo edide ekpri owo, nte eduuwem fo an̄wam ndinam ubon mbufo etie emem emem onyụn̄ okop inemesịt?

⁹ Ndusụk nditọwọn̄ idịghe nti uwụtn̄kpọ ke eduuwem. Ke uwụtn̄kpọ, ekpri eyeneren kiet ekewet ete esie ntaha ntaha leta emi: “Edieke afo mûdaha mi uka Alexandria ndiwetke fi leta, m̀mê ndinyene nneme ye afo, m̀mê ndidọhọ fi san̄a sụn̄, ndien edieke afo akade Alexandria ndimụmke fi ubọk m̀mê ndikọm fi tutu amama. Emi edi se iditịbede edieke afo mûdaha mi . . . Edi nọ [harp] ẹsọk mi, mmekpe fi ubọk. Edieke afo mûnọhọ, ndidiaha udia ndinyụn̄ n̄n̄wọn̄ke mmọn̄. Ikanke-kan oro!” Ndi oro itiehe nte n̄kpọ idahaemi? Nte ededi, eyeneren kiet ekewet leta oro ọnọ ẹsọk ete esie ke Egypt eset ke se ikande isua 2,000 ẹmi ẹkebede.

10. Didie ke n̄kpri owo ẹkeme ndin̄wam ubon mmọ ndibịne emem Abasi?

¹⁰ Edu uyen Egypt oro ikanamke ubon enyene emem. Nte ededi, mme n̄kpọ ẹtịmde ẹdiọk ẹkan oro ẹda itie ke mme ubon ke ukperedem ini ẹmi. Edi, mbufo n̄kpri owo ẹmekeme ndin̄wam ubon mbufo ndibịne emem Abasi. Didie? Ebe ke ndinam item Bible emi: “Nditọ, ẹsụk ibuot ẹnọ mme ete mbufo ye mme eka mbufo ke kpukpru n̄kpọ, koro emi enemde Ọbọn̄ esịt.”—Colossae 3:20.

11. Didie ke mme ete ye eka ẹkeme ndin̄wam nditọ mmọ ndikabade ndi mme anam-akpanikọ asan̄autom Jehovah?

¹¹ Nso kaban̄a mbufo mme ete ye eka? Ẹn̄wam nditọ mbufo ke ima ima usụn̄ man ẹkabade ẹdi mme anam-akpanikọ asan̄autom Jehovah. “Tịm teme eyenọwọn̄ nte ekemde ye usụn̄ esie,” ntre ke Mme N̄ke 22:6 ọdọhọ. “Ke ini enye akabarede idem akani owo, enye idikpọn̄ke enye.” Ye eti ukpepn̄kpọ N̄wed Abasi ye nti uwụtn̄kpọ ete ye eka, ediwak nditọiren ye nditọiban ikpọn̄ke nnennen usụn̄ ke ini mmọ ẹkponide. Edi ekese ọkọn̄ọ ke uduot ye udomo ukpep Bible ye ke esịt ekpri owo oro.

12. Ntak akpanade ufọk Christian etie emem emem?

¹² Edieke kpukpru mme andibuana ke ubon nnyịn ẹdomode ndinam uduak Jehovah, akpana nnyịn inyene emem Abasi. Ufọk Christian ekpenyene ndiyọhọ ye ‘nditọ emem.’ Luke 10:1-6 owụt ke Jesus ekenyene mme utọ owo oro ke ekikere ke ini enye ọkọnọde mbet 70 ẹka nte mme asan̄autom onyụn̄ ọdọhọde mmọ ete: “Ufọk ekededi eke mbufo ẹdụkde, ẹbem iso ẹdọhọ ẹte, Yak emem odu ke ufọk emi. Ndien edieke eyen emem odude do, emem mbufo oyodoro enye ke idem.” Nte mme asan̄autom Jehovah ẹdade “gospel emem” ẹsan̄a emem emem to ke ufọk sịm ufọk, mmọ ẹyom nditọ emem. (Utom 10:34-36; Ephesus 2:13-18) Ke akpanikọ, ubon Christian oro nditọ emem ẹnamde ekpenyene nditie emem emem.

13, 14. (a) Nso ke Naomi okoyom Ruth ye Orpah ẹnyene? (b) Ufọk Christian ekpedi orụk ebiet nduọkodudu ewe?

¹³ Ufọk ekpenyene ndidi ebiet emem ye nduọkodudu. Akanian̄wan ebeakpa oro Naomi ama odori enyịn ke Abasi ọyọnọ n̄kparawa ebeakpa, iban nditọ esie, Ruth ye Orpah, nduọkodudu ye ndọn̄esịt oro otode edinyene eti ebe ye ufọk. Naomi ọkọdọhọ ete: “Jehovah akpakam anam mbufo ẹkụt nduọkodudu ke ufọk mme ebe mbufo.” (Ruth 1:9) Kaban̄a udọn̄ Naomi, eyen ukpepn̄kpọ kiet ekewet ete ke mme utọ ufọk oro Ruth ye Orpah “ẹkpebọhọ ndutịme ye editịmede esịt. Mmọ ẹkpenyene emem. Ekpedi ebiet emi mmọ ẹkpekemede ndidụn̄, emi ẹkpenyụn̄ ẹyụhọde ẹnyụn̄ ẹsụkde mme ata ima ima ntụk mmọ ye mme udọn̄ oro ẹtịmde ẹkpono. Ẹwụt akpan odudu ikọ Hebrew oro . . . ediye ediye ke ido ukem ikọ oro ke [Isaiah 32:17, 18].”

¹⁴ Mbọk tịm fiọk editịn̄ oro ẹtịn̄de ẹtụk Isaiah 32:17, 18 mi. Nnyịn ikot do ite: “Se edinen ido anamde edi emem; utịp eti ido onyụn̄ edi nduọkodudu ye ifụre ke nsinsi. Ndien ikọt mi ẹyedụn̄ ke ufọk emem, ye ke idụn̄ ifụre, ye ke ebiet nduọkodudu eke edide sụn̄sụn̄.” Ufọk Christian ekpenyene ndidi ebiet nduọkodudu eke edinen ido, sụn̄sụn̄ ido, ifụre, ye emem Abasi. Edi nso edieke mme idomo, ndutan̄uyo, m̀mê mme mfịna efen ẹdemerede? Do oyom nnyịn akpan akpan ifiọk ukpọhọde inemesịt ubon.

Mme Akpan Edumbet Inan̄

15. Afo ọkpọdọhọ ke nso idi ukpọhọde inemesịt ubon?

¹⁵ Ẹsio kpukpru ubon ke isọn̄ enyịn̄ ke Jehovah Abasi, kpa Andibot mme ubon. (Ephesus 3:14, 15) Ntre mbon oro inemesịt ubon ọdọn̄de ẹkpenyene ndiyom ndausụn̄ esie ẹnyụn̄ ẹtoro enye, nte andiwet psalm akanamde: “Mbufo mme orụk ererimbot, ẹnọ Jehovah, ẹnọ Jehovah ubọn̄ ye odudu.” (Psalm 96:7) Ukpọhọde ata inemesịt ubon odu ke mme ikpan̄wed Ikọ Abasi, kpa Bible, ye ke edida mme edumbet esie nsịn ke edinam. Ubon oro adade mme edumbet ẹmi esịn ke edinam oyokop inemesịt oyonyụn̄ enyene emem Abasi. Ẹyak nnyịn ke ntre ise inan̄ ke otu akpan edumbet ẹmi.

16. Nso udeme ke mfara ke idem ekpenyene ke uwem ubon?

¹⁶ Kiet ke otu edumbet ẹmi ọkọn̄ọ ke emi: Mfara ke idem edi akpan n̄kpọ kaban̄a emem Abasi ke uwem ubon. Edidem Solomon ọkọdọhọ ete: “Owo eke mîmụmke esịt esie ikama, ebiet obio eke owụrede anana ibibene.” (Mme N̄ke 25:28) Ndimụm esịt nnyịn n̄kama—ndiwụt mfara ke idem—edi akpan n̄kpọ edieke nnyịn iyomde ndinyene emem emem ye inem inem uwem ubon. Okposụkedi nnyịn idide mme anana mfọnmma, oyom nnyịn iwụt mfara ke idem, emi edide mbun̄wụm edisana spirit Abasi. (Rome 7:21, 22; Galatia 5:22, 23) Spirit oro ayanam nnyịn inyene mfara ke idem edieke nnyịn ibọn̄de akam iben̄e edu emi, idade item Bible aban̄ade enye isịn ke edinam, inyụn̄ idụkde nsan̄a ye mbon en̄wen oro ẹwụtde enye. Usụn̄uwem emi ayan̄wam nnyịn ‘ifehe ibọhọ use.’ (1 Corinth 6:18) Mfara ke idem n̄ko ayan̄wam nnyịn isịn afai, ifep m̀mê ikan mbumehe un̄wọn̄ ọkpọsọn̄ mmịn, inyụn̄ inen̄ede inam n̄kpọ sụn̄sụn̄ ke n̄kpọsọn̄ idaha.

17, 18. (a) Didie ke 1 Corinth 11:3 enyene ebuana ye uwem ubon Christian? (b) Didie ke edidiọn̄ọ itieibuot anam emem Abasi odu ke ubon?

¹⁷ Ẹkeme nditịn̄ akpan edumbet efen ke usụn̄ emi: Ndidiọn̄ọ itieibuot ayan̄wam nnyịn ndibịne emem Abasi ke ubon nnyịn. Paul ekewet ete: “Nyom mbufo ẹdiọn̄ọ ẹte Christ edi Ibuot ọnọ kpukpru irenowo; erenowo onyụn̄ edi ibuot ọnọ n̄wan; Abasi onyụn̄ edi Ibuot ọnọ Christ.” (1 Corinth 11:3) Emi ọwọrọ ete erenowo ada usụn̄ ke ubon, n̄wan esie ọnọ ibetedem ke edinam akpanikọ, ndien nditọ ẹkop uyo. (Ephesus 5:22-25, 28-33; 6:1-4) Utọ eduuwem oro enen̄ede anam emem Abasi odu ke uwem ubon.

¹⁸ Oyom ebe edide Christian eti ke itieibuot N̄wed Abasi idịghe ukara ufịk. Ana enye ekpebe Jesus, Ibuot esie. Okposụkedi enye ekenyenede ndidi “Ibuot kpukpru n̄kpọ,” Jesus “[ikedịghe], man ẹnam n̄kpọ ẹnọ Enye, edi man Enye anam n̄kpọ ọnọ owo.” (Ephesus 1:22; Matthew 20:28) Ke ukem usụn̄ oro, erenowo Christian akama itieibuot ke ima ima usụn̄ oro anamde enye ese nte ọfọnde aban̄a mme ufọn ubon esie. Ndien ke akpanikọ n̄wan Christian oyom ndidiana kiet ye ebe esie. Nte “andin̄wam” ye “andinam” enye “ọyọhọ,” enye ọnọ mme edu oro ebe esie mînyeneke ndien ke ntem ọnọ enye ibetedem oro ẹyomde. (Genesis 2:20, NW; Mme N̄ke 31:10-31) Nnennen edikama itieibuot an̄wam mme ebe ye iban ndinam n̄kpọ ye kiet eken ye ukpono onyụn̄ anam nditọ ẹdu ke n̄kopuyo. Ih, ndidiọn̄ọ itieibuot anam emem Abasi odu ke uwem ubon.

19. Ntak emi eti nneme edide akpan n̄kpọ kaban̄a emem ye inemesịt ubon?

¹⁹ Ẹkeme nditịn̄ ọyọhọ akpan edumbet ita ke mme ikọ ẹmi: Eti nneme edi akpan n̄kpọ kaban̄a emem ye inemesịt ubon. James 1:19 asian nnyịn ete: “Kpukpru owo ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.” Oyom mme andibuana ke ubon ẹkpan̄ utọn̄ ẹnyụn̄ ẹtịn̄ ikọ ẹnọ kiet eken koro nneme ubon edi n̄kpọ edem mbiba. Idem ke ini se nnyịn itịn̄de edide akpanikọ, nte ededi, edieke ẹtịn̄de enye ke edu nsọn̄ido, n̄kohodeidem, m̀mê unana usọ, enye ekeme ndinam n̄kpọ etetịm ọdiọk akan ndinanam ọfọn. Ikọ nnyịn ekpenyene ndisịne inem, “nte ẹsịnde inụn̄ ke esịt.” (Colossae 4:6) Mme ubon oro ẹtienede mme edumbet N̄wed Abasi ẹnyụn̄ ẹnemede nneme ọfọn ẹbịne emem Abasi.

20. Ntak emi afo ọkpọdọhọde ke ima edi akpan n̄kpọ ọnọ emem ubon?

²⁰ Ọyọhọ edumbet inan̄ edi emi: Ima edi akpan n̄kpọ kaban̄a emem ye inemesịt ubon. Ima ntụk ekeme ndinyene akpan udeme ke ndọ, ndien ntotụn̄ọ ima iman ekeme ndidemede ke ufọt mme andibuana ke ubon. Nte ededi, se ikam idide akpan n̄kpọ ikan edi ima emi ikọ Greek oro a·gaʹpe adade ọnọ. Emi edi ima oro nnyịn ikọride inọ Jehovah, inọ Jesus, inyụn̄ inọ mbọhọidụn̄ nnyịn. (Matthew 22:37-39) Abasi ama owụt ubonowo ima emi ebe ke ndinọ ‘ikpọn̄îkpọn̄ Eyen emi Enye obonde, man owo ekededi eke ọbuọtde idem ye Enye okûtak, edi enyene nsinsi uwem.’ (John 3:16) Nso utịbe utịbe n̄kpọ ke edi ntem nte ke nnyịn imekeme ndiwụt ukem orụk ima oro nnọ mme andibuana ke ubon nnyịn! N̄kokon̄ ima emi edi “se ibọpde uwem adiana inam ọfọn ama.” (Colossae 3:14) Enye ọbọp ebe ye n̄wan adian ọtọkiet onyụn̄ onụk mmọ ndinam se ifọnde ikan nnọ kiet eken ye nditọ mmọ. Ke ini n̄kpọsọn̄ idaha ẹdahade ẹda, ima an̄wam mmọ ndise mban̄a mme n̄kpọ ke edidianakiet. Nnyịn imekeme nditịm nnịm emi koro “ima . . . iyomke ufọn esiemmọ . . . Ima ememe kpukpru n̄kpọ, enenịm se ifọnde ke akpanikọ kpukpru ini, ododori enyịn aban̄a kpukpru n̄kpọ, ememe ime ke kpukpru n̄kpọ. Ima idibehe ifep nsinsi.” (1 Corinth 13:4-8) Ke akpanikọ inemesịt odu ọnọ mme ubon oro ima ẹnyenede ẹnọ Jehovah adiande ima oro ẹnyenede ẹnọ kiet eken!

Ẹka Iso Ndibịne Emem Abasi

21. Eyedi nso idifori emem ye inemesịt ubon mbufo?

²¹ Ẹwụt kpukpru edumbet ẹmi ye mbon en̄wen ẹmi ẹsion̄ode ẹto Bible ke mme n̄wed oro Jehovah ke mfọnido ọnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45) Ke uwụtn̄kpọ, ẹkụt utọ ntọt oro ke n̄wed enyenede page 192 do Ukpọhọde Inemesịt Ubon, oro ẹkesiode ke Mme Mbono District “Mme Isụn̄utom Emem Abasi” eke Mme Ntiense Jehovah oro ẹkenịmde ke ofụri ererimbot ke 1996/97. Ndikpep N̄wed Abasi ọkpọkpọ ye nte ubon ye un̄wam utọ n̄wed oro ekeme ndida n̄kesịm ediwak ufọn. (Isaiah 48:17, 18) Ih, eyedi edida item N̄wed Abasi nsịn ke edinam oyofori emem ye inemesịt ubon mbufo.

22. Uwem ubon nnyịn okpowụhọ ke nso?

²² Jehovah enịm mme utịbe utịbe n̄kpọ ọnọ mme ubon oro ẹnamde uduak esie, ndien enye odot ndibọ itoro ye utom nnyịn. (Ediyarade 21:1-4) Ubon mbufo ke ntre akpakam anam uwem esie owụhọ ke utuakibuot ata Abasi. Ndien ima ima Ete nnyịn eke heaven, Jehovah, akpakam ada inemesịt ọdiọn̄ mbufo nte mbufo ẹbịnede emem Abasi ke uwem ubon mbufo!

Didie ke Afo Ọkpọbọrọ?

◻ Nso ke oyom edieke anade mme ubon ẹda uten̄e Abasi ẹdu uwem?

◻ Ntak emi afanikọn̄ odude ke ubon mfịn?

◻ Nso idi ukpọhọde inemesịt ubon?

◻ Nso idi ndusụk edumbet oro ẹdin̄wamde nnyịn ndinam emem ye inemesịt ẹdu ke uwem ubon?

[Ndise ke page 24]

Eti nneme an̄wam nnyịn ndibịne emem Abasi ke uwem ubon