Ntọt M’ọkwọrọ Obio Ubọn̄
Ndikụre Nsannsan Efakutom ke Paraguay On̄wụm Mfri
N̄KỌK itieutom Watch Tower Society ke Paraguay enen̄ede ọdiọn̄ọ ufọn edikwọrọ eti mbụk Obio Ubọn̄ ke ofụri efakutom esie. (Utom 1:8) Ini edi emi ọnọ kpukpru owo ndikpep n̄kpọ mban̄a Obio Ubọn̄ nnyụn̄ nnam n̄kpọ Jehovah mbemiso enye adade utịt ọsọk idiọk editịm n̄kpọ emi ke “akwa ukụt” oro edide. (Matthew 24:21, 22) Ifiọkutom ẹmi ẹtienede mi ẹwụt se ẹnamde man ẹn̄wam mme owo ke mme efakutom oro owo mîbahakede inọ esop. N̄kọk itieutom oro ọtọt ete:
Ẹma ẹnam mme ndutịm man ẹnam utom ke kpukpru efakutom oro owo mîbahakede inọ esop ebe ke mme akpan asiakusụn̄ ibio ini. Ke ufan̄ ọfiọn̄ November osịm January eke isua utom 1990, nditọete iren ye iban 39 ẹma ẹkụre ofụri ikpọ ye n̄kpri obio ikie ẹmi asuanetop Obio Ubọn̄ ndomokiet mîdụhe kan̄a. Mmọ ẹma ẹkeme ndisuan n̄wed 6,119, n̄kpri n̄wed 4,262, ye mme magazine 5,144. Nte utịp utom emi, ẹmetọn̄ọ mbufa otu mme asuanetop.
◻ N̄wan kiet ama ọbọ n̄wed Afo Emekeme Ndidu Uwem ke Nsinsi ke Paradise ke Isọn̄ oto asiakusụn̄ eyenete an̄wan kiet oro anamde utom ke efakutom oro owo mîbahakede inọ esop. Asiakusụn̄ oro ama onyịme ndinịm ukpepn̄kpọ Bible ye enye, ndien enye ye idatesịt ama onyịme. Ke ini asiakusụn̄ oro akafiakde aka, idịghe an̄wan emi ikpọn̄îkpọn̄ eketie ebet enye, edi n̄ko ebe esie ye nditọ mmọ duop. Ke edifiak n̄ka efen, ubon oro ọkọrọ ye mme ufan ye mbọhọidụn̄ mmọ ẹma ẹben̄e idem ẹnọ ukpepn̄kpọ Bible! N̄wan emi okokot mmọ, ọdọhọde ete ke ukpepn̄kpọ oro ọfọn ata etieti ye nte ke idotenyịn ye mme edidiọn̄ ẹmi Jehovah ọnọde ẹdi utịben̄kpọ. Emi ekedi n̄kpọ oro akananam owo baba kiet mîtịn̄ke inọ enye, ntre enye ama ekere ete ke mme mbọhọidụn̄ ye mme ufan imọ n̄ko ẹkpenyene ndikop eti mbụk emi.
Kpukpru ini oro asiakusụn̄ emi okonịmde ukpepn̄kpọ oro, ata ediwak owo ẹma ẹdụk tutu eyedi se enye ebietde ekpri esop. Mme owo ẹmi ẹnyenede udọn̄ mi ẹma ẹbụp ediwak mbụme ẹnyụn̄ ẹtiene ẹbuana ke ukpepn̄kpọ oro. Ke ini asiakusụn̄ oro akanamde an̄wan̄a ete ke inikiet ekededi oro ẹnamde utom ke efakutom oro ẹkụre, imọ ye nsan̄a imọ iyewọrọ ika ebiet efen, n̄wan emi ke ekerede aban̄a emi ama obụp aban̄a nte n̄kpọ editiede ye mmimọ. Ẹma ẹnam ndutịm ye nditọete ẹtode n̄kpere n̄kan esop ndikaiso ke ukpepn̄kpọ oro. Idahaemi ẹma ẹdọn̄ mme akpan asiakusụn̄ ndikan̄wam mbon oro ẹnyenede udọn̄ mi, kpa mbon mbieterọn̄.
◻ Ke adan̄aemi asan̄ade ke ufọk ke ufọk ke efakutom efen oro owo mîbahakede inọ esop, asiakusụn̄ eyenete an̄wan kiet ama okụt eren kiet emi ọkọbọde n̄wed Akpanikö oro Adade osim Nsinsi Uwem ke n̄kpọ nte isua duop ke edem edem. Ọtọn̄ọde ke ini oro enye ikosoboke ye Mme Ntiense Jehovah aba. Nte ededi, enye ama ọfiọk ete ke Jehovah, emi enye okokotde Jehovah mme udịm, edi n̄kukụre Abasi akpanikọ ye nte ke enye ikpọn̄îkpọn̄ ke ẹkpenyene ndituak ibuot nnọ. Ke anamde n̄kpọ ke idemesie ikpọn̄, enye ama esitịn̄ n̄kpọ ọnọ kpukpru owo ẹmi enye ọkọfiọkde aban̄a Jehovah. Ke akpanikọ, kpukpru urua enye ama esisan̄a itiat iba man ekese ebe ye n̄wan ẹmi ẹnyenede udọn̄ man enyene nneme ye mmọ aban̄a Abasi koro, nte enye eketịn̄de, ‘Edieke ntrede ndika n̄kese mmọ, mmọ ẹyefre ẹban̄a Jehovah.’ Ke adianade ye ebe ye n̄wan emi, n̄kpọ nte owo duop en̄wen ẹma ẹdu ẹmi ẹkeyomde ukpepn̄kpọ Bible—kpukpru ẹmi koro owo oro enyenede udọn̄ mi ọkọkwọrọde ikọ ọnọ mmọ.
Ke edide n̄wọrọnda, n̄kpasịp usen ifan̄ mbemiso asiakusụn̄ oro awahade etiene enye, eren emi ikayakke oku n̄kann̄kụk oro ye mme mbet esie ẹda mbiet edisana Mary ẹdụk ufọk esie, anamde an̄wan̄a nte ke imọ inịmke mme mbiet ke akpanikọ. Oku oro ama okop iyatesịt. Okoneyo oro eren oro ama ọbọn̄ akam ọnọ Jehovah oyom un̄wam. Ntre kere nte enye okokopde nduaidem ye inemesịt ke ini asiakusụn̄ oro akawahade! Ẹma ẹnam ndutịm ndondo oro ẹnọ ukpepn̄kpọ Bible ofụri ini, ndien eren oro akaiso ndikọri ke ebuana ye esop ukara Abasi.
Ke akpanikọ, Jehovah ke ọdiọn̄ utom editan̄ mbok ke Paraguay nte nditọete ẹn̄wanade ndinọ ọyọhọ ọyọhọ ikọ ntiense ke mme efakutom oro owo mîbahakede inọ esop mi.—Matthew 24:14.