Mme Mbụme Ẹtode Mme Andikot

◼ Ke N̄wed Mbon Rome 8:27, New World Translation akabade ikọ Greek oro phroʹne·ma nte “se edide,” edi ke Ro 8 ufan̄ikọ 6 ye 7, nte ẹkabade edi “ndikere.” Ntak ẹmi ẹkabarede ikọ Greek kiet ke nsio nsio usụn̄?

Udọn̄ikọ oro otoro edikabade iba oro ẹmekde.

Mbemiso ikọ ke New World Translation of the Christian Greek Scriptures (1950) ọkọdọhọ ete: “Ke ọkpọ ikọ kiet kiet nnyịn imọnọ edikabade kiet inyụn̄ isọn̄ọ iyịre ke edikabade oro adan̄a nte udọn̄ikọ oro ayakde.” Ndusụk owo idikereke ite ke phroʹne·ma edi ọkpọ ikọ, sia enye odude utịm ikanan̄ kpọt. Enye edi, okposụkedi, enyenede ebuana ye mme ikọ oro ẹdade ndien ndien. Kiet edi phro·neʹo, emi ọwọrọde “ndikere, ndiwụk ekikere ke akpan usụn̄ kiet.” (Matthew 16:23; Mark 8:33; Rome 8:5; 12:3; 15:5) Mme ikọ Greek eken oro ẹnyenede ebuana ẹnọ ekikere edida ọniọn̄, ifiọk m̀mê asian nnam n̄kpọ.​—Luke 1:17; 12:42; 16:8; Rome 11:25; Ephesus 1:8.

The Kingdom Interlinear Translation of the Greek Scriptures owụt nte ke phroʹne·ma odu utịm ikanan̄ ke N̄wed Mbon Rome 8:6, 7, 27 ye nte ke ata se enye ọwọrọde nte ido edide edi “edikere n̄kpọ.” Nditọ ukpepn̄kpọ Greek oro Bauer, Arndt, ye Gingrich ẹnam phroʹne·ma an̄wan̄a nte: ‘usụn̄ ukere n̄kpọ, kere, uduak, udọn̄, ndin̄wana.’​—A Greek-English Lexicon of the New Testament and Other Early Christian Literature.

Ke N̄wed Mbon Rome ibuot 8, apostle Paul ama ọnọ mme Christian item ẹte ẹkûsan̄a nte ekemde ye anana mfọnmma obụkidem. Man ẹkụt unen ke n̄kpọ emi, mmọ ẹnyene ndikpeme mme ntụhọ m̀mê ntụk obụkidem ọkọrọ ye mme idaha ukere n̄kpọ anana mfọnmma esịt. ‘Ndiwụk ekikere mmọ’ ke mme n̄kpọ oro ẹdude ke n̄kemuyo ye edisana spirit Abasi eyen̄wam mmọ ke n̄kpọ emi.”​—Rome 8:1-5.

Paul ama etịn̄ se idide isio ete: “Edikere n̄kpọ obụkidem ọwọrọ n̄kpa; edi edikere n̄kpọ spirit edi uwem ye emem: koro edikere n̄kpọ obụkidem edi ndin̄wana ye Abasi; koro utọ esịt oro mîsụkke ibuọt inọ ibet Abasi. (Rome 8:6, 7) Mme owo ke ẹtịn̄ ẹban̄a ke ufan̄ikọ iba ẹmi. Ikpanaha mme owo, akpan akpan mme Christian, ẹwụk ekikere mmọ ke, mîdịghe ẹkaiso “ndikere,” mme n̄kpọ n̄kpakpa obụkidem. Utu ke oro, akpana mmọ ẹwụk ekikere mmọ ke, mîdịghe ẹkaiso “ndikere,” mme n̄kpọ ẹdude ke n̄kemuyo onyụn̄ edide se spirit ọnọde odudu.

Ke edide isio, Ro 8 ufan̄ikọ 27 etịn̄ abaha Abasi ke idemesie. Nnyịn ikọt ite: “Enye [Jehovah] emi odụn̄ọrede esịt owo omonyụn̄ ọdiọn̄ọ se ekikere spirit edide [“se spirit edide,” NW), koro spirit anamde n̄kpeubọk ọnọ ikọt Abasi nte ekemde ye uduak Abasi.” Ih, “enye” mi edi Jehovah, Andikop akam.

Ẹkpekekabade ikọ oro, phroʹne·ma ke Ro 8 ufan̄ikọ 27 nte “ndikere.” Edi edisana spirit idịghe owo emi ke ata ata usụn̄ ekemede ndikere n̄kpọ m̀mê oro enyenede ekikere idemesie. Spirit edi anamutom odudu Abasi, emi ọdiọhọde usụn̄ nte edisana spirit esie anamde utom ndiyọhọ uduak esie. N̄ko, se ufan̄ikọ emi ọwọrọde okpụhọde ye eke N̄wed Mbon Rome 8:6, 7. Eke mme ufan̄ikọ oro ẹkebemde iso ẹneme ẹwụt ufọn mme owo ndikpeme ekikere ye mme edinam mmọ. Edi Jehovah inaha anam n̄kpọ, m̀mê an̄wana ndikpeme idemesie. Enye ọdiọhọ se ẹkewetde ke Bible ke idak ndausụn̄ spirit, utọ nte mme ikọ Bible ẹwụtde uduak esie kaban̄a mme asan̄autom esie eke isọn̄. Dr. Heinrich Meyer etịn̄ otụk N̄wed Mbon Rome 8:27 ete: “Abasi ke kpukpru idaha ọfiọk uduak spirit.”

Ntre, edikabade oro “se edide” odu ke n̄kemuyo ye udọn̄ikọ m̀mê se N̄wed Mbọn Rome 8:27 ọwọrọde, onyụn̄ edi se mbon Greek ẹnyịmede. The Translator’s New Testament akabade enye nte: “Enyeemi odụn̄ọrede esịt ọmọfiọk se spirit ọwọrọde.”

◼ Ntak emi New World Translation ndusụk ini akabarede ikọ Greek oro pi·steuʹo nte ‘ndinịm ke akpanikọ’ (nte ediwak Bible eken) ndien ke ndusụk ini nte “nyene [m̀mê kọn̄] mbuọtidem ke”?

Ẹnam emi man ẹwụt nsio nsio ekikere emi ikọ Greek oro pi·steuʹo ọnọde.

Ke uwụtn̄kpọ, A Grammar of New Testament Greek, emi James Moulton ewetde, owụt ete ke mme akpa Christian nte an̄wan̄ade ẹma ẹfiọk “akpan ukpụhọde ke ufọt ikpîkpu edinịm ke akpanikọ . . . ye ọkpọ ọkpọ mbuọtidem.” Ekeme ndinam ekikere mbiba ẹmi an̄wan̄a ke ndida ikọ Greek oro pi·steuʹo.

Ediwak ini, ẹsifiọk nsio nsio usụn̄ emi pi·steuʹo ọwọrọde ẹto udọn̄ikọ. Ndusụk ini, nte ededi, nsio nsio usụn̄ nte ẹbonde ikọ ke usem an̄wam nnyịn ndikụt se andiwet ekenyenede ke ekikere. Ke uwụtn̄kpọ, edieke ikọ enyịn̄ etienede pi·steuʹo ke usụn̄ oro enyenede ebuana, New World Translation esikabade enye mmemmem mmemmem nte ‘ndinịm ke akpanikọ’​—ibọhọke udọn̄ikọ owụt isio isio n̄kpọ. (Matthew 21:25, 32; edi se Rome 4:3.) Edieke ikọ oro, e·piʹ, “ke,” etienede pi·steuʹo ẹsiwak ndikabade enye nte “nịm ke akpanikọ.” (Matthew 27:42; Utom 16:31, NW) Edieke eis, “ke esịt,” etienede ẹsiwak ndikabade nte “ẹbuọt idem ke.”​—John 12:36; 14:1, NW.

Ukperedem edikabade emi (emi etide nnyịn ete ke pi·steuʹo enyene ebuana ye ikọ Greek oro, piʹstis, “mbuọtidem”) odu ke n̄kemuyo ye utịn̄ikọ ke An Introductory Grammar of New Testament Greek, emi Paul Kaufman ewetde. N̄wed oro ọdọhọ ete: “Uwetn̄kpọ efen emi ẹwakde ndikụt ke Obufa Testament (akpan akpan Gospel John) edi πιστεύω [pi·steuʹo] asan̄ade ye εἰς [eis] ọkọrọ ye ikọ emi adade ọnọ ikọ edinam . . . Ana ẹkabade ofụri ofụri uwetn̄kpọ oro εἰς esịnede ọkọrọ ye ikọ edinam utu ke ndidomo ndikabade ikọ-ebuana oro, εἰς nte ikọ emi adade ke idemesie. Ẹda mbuọtidem nte edinam, nte n̄kpọ oro mme owo ẹnamde, oro edi, ndinyene mbuọtidem ke owo.”