“Mmọn̄eyet Idatesịt”

“YE MMỌN̄EYET idara, ami nsụk n̄kụre ndikot ibuotikọ oro, ‘Nte Ẹn̄wamde Mbon Mfụhọ Ẹfiak Ẹkụt Idara.’” (Enyọn̄-Ukpeme eke March 15, 1990, page 26-30) Ntre ke ẹketọn̄ọ kiet ke otu ediwak leta esịtekọm ẹmi N̄ka ọkọbọde kaban̄a mme ibuotikọ ke mfụhọ ẹdude ke mme nsiondi eke March 1, ye March 15, 1990. Utịn̄ikọ enyeemi, nte ededi, oto eyenete an̄wan kiet ke Japan emi ekpri eyeneren esie ke ndondo emi ọkọduọde udọn̄ọ mbeibuot. Enye anam an̄wan̄a ete:

“Ndidọn̄ esịt nnyụn̄ nsịn udọn̄ nnọ owo oro okopde mfụhọ kpukpru usen, ke ndusụk ini ami mmesikop mba ndikaiso. Ke ini eyo okụtde ndịk ye editịmede esịt ẹsimụm eyen mi. Ntre nyenọ enye ibọk idap nnyụn̄ nsụhọde ntie ke mben bed esie mfiọn̄ọ ubọk esie nnyụn̄ ndori ubọk mi ke ọkpọiso esie tutu enye ede. Esikam etie ukem nte ndinam nsekeyen ede idap, ndien ke n̄kpọ nte hour kiet ebede, ọkpọsọn̄ idap eyemen enye ke akpatre. Do ndien ke mbọ nduọkodudu, edi ke ukem ini oro, nyeneme ye idemmi nte ke usenubọk n̄kpọn̄ eyeda mfịna n̄ko edi.

“Eyen mi esidọhọ, ‘Ami mfọnke ke baba n̄kpọ kiet. Idotenyịn ndomokiet idụhe inọ mi.’ Kpukpru usen enye ke mfụhọ eyebụp ete, ‘Nte ẹyekọk udọn̄ọ mi? Ini ewe ke ami ndibọhọ uda ibọk? Utọ uwem emi edibịghi adan̄a didie?’ Ke mme utọ ini ntre mmesida mme mbụme ndikpụhọ ekikere esie nte mme magazine oro ẹkenọde ekikere, ndien emi esin̄wam enye ke ndusụk udomo. Edi nnyịn isụk iyọ ukem n̄kpọ kiet kpukpru usen.

“Odu ndusụk ini n̄ko emi eyen mi esikotde mbiowo [ke esop n̄kann̄kụk] ke ufọt okoneyo ke ini enye otịmde okop editịmede esịt man ẹdibọn̄ akam ẹnọ enye. Emi esitie nte akwa n̄kpọ ndọn̄esịt ọnọ enye onyụn̄ esinam ekikere esie ana sụn̄-n̄. . . . Ediwak ini, idaha eyen mi esinen̄ede ọdiọk ke ini ebe mi (owo emi mînịmke ke akpanikọ) esidahade isan̄ mbubehe. Ke ini nsiyomde un̄wam ebe ke urụk ukopikọ, ekese nditọete ẹsisọp ẹdisịm ufọk nnyịn.

“Mmọkọm mbufo, nditọete, ke isọn̄ esịt mi ke ndisio mme utọ ibuotikọ ẹmi ke ini ke ini ndinyụn̄ n̄wụt edikere mban̄a ke mme udọn̄ mbon mmemidem.”

H. H. [Esịn ubọk]