Jehovah Ọmọnọ Mi Odudu
NTE EKUMBA OKOKA OBỤKDE
AMI n̄kamana ndụk ke ubon “Christian” ke n̄kan̄ idụt Ufọt Ufọt Africa, n̄ko nyụn̄ n̄kọri n̄wọrọ owo ye ima Abasi. Ete mi ekedi ifịk ifịk ọkwọrọikọ emi mîkọbọhọ akpan ukpep, ndien ami mma nsiwak ndisan̄a ye enye ke ini enye ọnọde ukpep ke ufọkederi m̀mê ke mme ini akam ke ufọk mme owo. Sia eketiede nte ndi ekpri akparawa oro enyene de ifịk, mme ọkwọrọikọ eken oro mîkọbọhọ ukpep ẹma ẹmek mi ndidu ye oku ke ini Mass. Mmọ ẹma ẹkam ẹdọhọ ẹte ke anaedi ami nyebọ ukpep usen kiet ndikabade ndi oku ke idemmi.
Nte ededi, ke okoneyo, ami n̄kesidi adaiso ke ikwọ ye unek ke n̄ka ikwọ kiet, oro ẹkotde Matumba-Ngomo. Ke ifet ntre, mma mbuana ye n̄kparawa iren ye iban n̄kann̄kụk nnyịn ke kpukpru orụk oburobụt ido uwem. Edi ke n̄kosụk nnyene ke ekikere ndinyene n̄wan kiet kpọt nnyụn̄ n̄ka heaven ndikodụn̄ ye “ndisana owo” nte ini akade. N̄kekwe ufọn ndomokiet ndinam uwem mi ọfọn koro, nte ekemde ye ukpepn̄kpọ Catholic, ẹma ẹsifen kpukpru idiọkn̄kpọ mi ke kpukpru mbubịteyo Saturday ke edinam uyarade ndudue.
N̄kpọsọn̄ Idaha Ẹtọn̄ọ
Ke 1969, ke adan̄aemi n̄kosụk mbọde ukpep ke akamba ufọkn̄wed, mma ntọn̄ọ ndikop ubiak ke mme ikek mi. N̄kọfiọkke se ikedide ntak, edi ke mme ọfiọn̄ oro ẹketienede, mmọ ẹma ẹtotịm ẹsọn̄ ubọk. Ete ye eka mi, okposụkedi ẹdide mbon Catholic oro ẹtịmde ẹdiọn̄ọ, ẹma ẹbiere ndida mi n̄kosobo ye nsio nsio mbiaibọk ẹmi ẹkedọhọde ke owo ọkọtọ mi ibọk, edi nte ke ẹkọm enyene akam ye ibọk mmimọ, ami nyekop nsọn̄idem. Edi, mma ntọn̄ọ ndisan̄a ye eto, ndien etisịm 1970, ekedi ọkpọsọn̄ n̄kpọ ndisan̄a isan̄, idem kpa ye oro n̄kakamade eto. Ke ọtọ emi, mma n̄kere nte ke ndikemeke ndisan̄a isan̄ aba.
Ke February 1972 ete mi ke akpatre ama ebiere ndida mi n̄ka ufọkibọk ke Wembo Nyama. Mma ndu ke ufọkibọk ke ata anyanini tutu ẹtọn̄ọ ndikot mi enyene ufọkibọk! Mme owo ẹma ẹsidi ufọkibọk, ẹkop nsọn̄idem, ẹfiak ẹnyọn̄, ndien ekem ke ndusụk ini ẹfiakde ẹdi ye mfịna efen, ndien ami nyesụk ndu do! Ete mi ekenyene ndika ufọk man ekekpen̄e edesi, edi etisịm idahaemi mma ndọ n̄wan, nyene nditọ iba, ndien edima an̄wan mi, okposụkedi ọkọsọn̄de ke n̄kpasịp isua 21, ama ese mi enyịn onyụn̄ oyom utom anam man ekpekeme ndise mban̄a se nnyịn iyomde.
Edi, mma nen̄ede n̄kop mfụhọ mban̄a ofụri idaha oro. Ke isua 24 ke emana, okịm ke osụk ototịm ọdiọk, ke adan̄aemi mme ufan mi ẹkenyenede uforo, ediwak mmọ kemi ẹnyenede nti utom. Eketie mi nte ke eyedi mfọnn̄kan n̄kpọ ọnọ kpukpru owo edieke n̄kpowotde idem. Ntre, mma ndeme kpukpru inyene mi nnọ nditọ mi ye nditọeka mi iren, ye unana edinam mmọ ẹfiọk se n̄kenyenede ke ekikere. N̄kosụhọke n̄kpọ ndomokiet nnọ idemmi ibọhọke ọfọn̄idem oro n̄kamade n̄kan emi n̄koyomde ẹbụk mi ye enye.
Ntọn̄ọ Obufa Uwem
Ekem ẹma ẹnọ owo Ntiense Jehovah kiet bed oro ekperede okịm. Okposụkedi enye mîkekwe usụn̄ ke enyịn kiet onyụn̄ odude ke itiendịk ndinana enyịn enye eken, enye ama ọsọsọp ọtọn̄ọ ndinọ mi ikọ ntiense ke Bible aban̄a Jehovah ye Obio Ubọn̄. Ke usen ifan̄ ẹma ẹkebe, enye ama ọkpọn̄ ufọkibọk oro, edi enye ama ayak mi esịn ke ubọk ndusụk Ntiense oro ẹkesidide ẹdise enye. Ke ini ikakade iso ndinyene nneme, mmọemi n̄ko ẹkenyene ndikpọn̄ do, edi kiet ke otu mmọ ama esikaiso ndikpep n̄kpọ ye ami ebe ke leta. Enye n̄ko ama ọnọ mi nsio nsio n̄wed un̄wam ukpep Bible, emi n̄kokotde ye akwa idara.
Ke usụn̄ emi, mma nyene udia eke spirit, ndien mfịghe mi sụn̄sụn̄ ama akabade edi inemesịt. Eketie nte ke ufọkederi mi ọkọnọ mi “idiọk mmọn̄ibọk” ndin̄wọn̄, edi idahaemi ami ke n̄kọbọ mmọn̄ uwem ke mfọn. Mmọkọm Jehovah ke isọn̄ esịt mi ke ndinam mi mbọhọ edinịm mme nsunsu ukpepn̄kpọ ke akpanikọ, utọ nte Abasi-Ita-ke-Kiet, ukpọn̄ ikpaha ke nsinsi, ndịk mme akpan̄kpa, ye utuakibuot nnọ mme eteete.
Etisịm idahaemi ami mma nyom ndikpọn̄ ufọkibọk. Ekem mma n̄kop nte ke ẹmọn̄ ẹnọ ubon iba ẹmi ẹdide mme asan̄autom ofụri-ini ẹdi Wembo Nyama, ntre mma mbiere ndibet tutu mmọ ẹdisịm. Nso inemesịt ke n̄kokop ntem ke ini mmọ ke akpatre ẹkedide ẹdikụt mi ke bed ufọkibọk mi! Idahaemi mma n̄keme ndikaiso ke ukpepn̄kpọ iso ye iso utu ke leta.
Ke usen ifan̄ ẹma ẹkebe, mma mbụp m̀mê mmọ ẹnyene mbonoesop ke Ufọkmbono Obio Ubọn̄, nte n̄kokotde ke mme magazine. Mmọ ke mfọnido ẹma ẹdọhọ mi ẹte ke ẹsinịm kpukpru mbonoesop ke ekpri ufọk emi owo mmọ kiet odụn̄de. Mmọ n̄ko ẹma ẹdọhọ ke mmimọ ikpadara ndimen mi ke enan̄ukwak n̄ka do! Kpa ye ọkpọsọn̄ ubiak ke ọkpọ asakedem ye ke ikek mi, mma ndụk kpukpru mbonoesop idara idara. Ke mma n̄kosịm mme n̄kpọ oro ẹnamde owo odot, mma n̄keme idem ndinọ ibatutom ke kpukpru ọfiọn̄ nte asuanetop oro mînaha baptism, ọtọn̄ọde ke April 1974.
Ke ọfiọn̄ ita ke ukperedem, mma nyarade uyakidem mi nnọ Jehovah ke ndibụhọ ke mmọn̄. Mma nsinọ mbonutom ufọkibọk, mbon udọn̄ọ ẹkedude do, mme isụn̄utom Protestant ẹkedide do, ye mbon ubon mi, ikọ ntiense—kpa ye ubiọn̄ọ ofụri esịt mbon ubon mi. Ke ini emi, n̄kesinana ke bed mi nnọ ikọ ntiense mîdịghe n̄wawat ke n̄kpọitie mbon n̄kpọnnam emi ufọkibọk ọkọnọde mi tutu n̄kekeme ndidep okịm.
Ime Ama Ada Mme Ufọn Edi
Kpa ye ubiọn̄ọ otode ubon mi, mma n̄kaiso ndisan̄a ke usụn̄ Jehovah ndien ẹma ẹdiọn̄ mi uwak uwak. N̄wan mi ama ada idaha esie ọnọ akpanikọ onyụn̄ ana baptism ke 1975. Nnyịn ima ibiere ndidụn̄ ke Katako-Kombe, ke ebiet emi esop ama okododu. Ete ye eka mi ẹma ẹfịna ẹban̄a nnyịn koro owo kiet akasiande mmọ ete ke ẹyewot kpukpru Mme Ntiense ke 1975. Ke ima ikesịn ndisịbe ebuana nnyịn, mmọ ẹma ẹtre ndinọ udia ẹsọk nnyịn, ndien akwa unana ke n̄kpọ obụkidem ama osịm nnyịn. Ami mmeti nte ke ini kiet ekpri eyeneren mi ama ofụn̄ ọduọ ke ntak ọbiọn̄ ke ima ikasan̄a usen kiet ye ubak ye unana udia. Edi ekem nditọete Christian nnyịn ẹma ẹda iyak ye udia ẹsọk nnyịn. Ekem, ete ye eka mi ẹma ẹfiak ẹtọn̄ọ ndin̄wam nnyịn, edi nditọete nnyịn ikedehedei itre ndinọ nnyịn un̄wam ke n̄kpọ obụkidem.
Ke February 1975 ubọk nnasia mi ama akpa onyụn̄ ọtọn̄ọ ndibiara. Edi mma nsọn̄ọ mmụm mbuọtidem mi n̄kama nnyụn̄ mbiere ndikaiso nnam n̄kpọ Jehovah ye idatesịt. Mmadara ndidọhọ nte ke ubọk mi ke ukperedem ama afiak ọfọn, ndien ami ke n̄keme ndisụk ndịbede enye mfịn emi, emi an̄wamde mi ndikụbọde Bible mi nnyụn̄ nda mme n̄wed N̄ka nnam n̄kpọ.
Ndinyene Uko ke Iso Mbon Ukara
Ke 1977 esenyịn n̄kann̄kụk ama odori mi ikọ ke iso mbon ufọkutom ikpehe obio oro, emi okomụmde akpan asiakusụn̄ kiet ke n̄kpet n̄kpet esop kiet ndondo oro. Usen kiet owo ekọn̄ kiet ama ada n̄wedikpe ọsọk mi. Mma mbọn̄ akam ye ubon mi, nnọ esop ikọ nsịnudọn̄, ndien ekem ntiene enye. Ekọm enyene spirit Jehovah, mma n̄keme ndinọ uko uko ibọrọ ke mme edori ikọ oro, ndien ke ima ikenyene nneme ke anyanini ye mbon ukara ẹdide mbio obio ye mbonekọn̄, ẹma ẹsana mi ye akpan asiakusụn̄ oro ẹyak.
Ke ndusụk ọfiọn̄ ẹma ẹkebe, esenyịn efen ama afiak okot mi ikpe, n̄ko, ye un̄wam Jehovah, mma n̄keme ndida nnọ eti mbụk ke idatesịt ye uko. Mma nnyene anyan nneme ye owo emi, ndien ke akpatre, enye ama asana mi ayak onyụn̄ onụk n̄kpọitie mbon n̄kpọnnam mi ke idemesie osio ke ọfis esie. Ekem enye ama ọdọhọ sụn̄sụn̄ ete: “Di ufọk mi ke mbubịteyo emi.” Ke mma n̄kafiak n̄ka ke ediwak ini, mma n̄keme nditọn̄ọ ukpepn̄kpọ Bible ye enye. Ke akpatre, mma nyene ukpepn̄kpọ Bible itiaba ye nsio nsio mbon ukara. Ekese mmọ ẹma ẹsidụk mme mbonoesop oro ẹkesinịmde ke n̄kann̄kụk.
Akpan Utom
Mma mben̄e Jehovah ndin̄wam mi, kpa ye udọn̄ọ mi, ndinam en̄wọn̄ọ mi ndinam n̄kpọ esie ke ofụri odudu mi. Ye unana ndisịn enyịn nnennen, mma ndomo ndisịm se ẹyomde ẹto asiakusụn̄ unọ un̄wam. Jehovah ama an̄wam mi ndikụt unen, ke ntre mma nsịn n̄wed eben̄e utom emi ke ọfiọn̄ June osịm October. Ekem N̄ka ama onyịme eben̄e mi ndidi asiakusụn̄ ofụri-ini, ndien mma ntọn̄ọ utom emi ke November 1976. Ke September 1977 idara mi ama ọyọhọ ke ini n̄kọbọde utom nte akpan asiakusụn̄ ke esop Katako-Kombe.
Didie ke n̄kekeme nditịm nnam utom emi? Mma nsikụre efakutom oro ke n̄kpọitie mbon n̄kpọnnam mi ye un̄wam edima an̄wan mi ye eke nditọete ke esop. Ndusụk ini mma nsikama eto n̄wọrọ ikpọn̄. Mma nduọ inikiet m̀mê ikaba. Do nyebet, mmenekede idem ke isọn̄, tutu owo edide ndibe eyen̄wam mi ndidaha nda onyụn̄ atan̄ eto mi ọnọ mi. Ami kpukpru ini mma nsiti ubiere mme apostle ye mme mbet Jesus. (Utom 14:21, 22; Mme Hebrew 10:35-39) Ke ini kiet kiet oro nsiduọde, mma nsibọn̄ akam nte Jehovah okûyak idem emem mi edi, utu ke oro, ọnọ mi odudu ndikaiso nnam n̄kpọ esie. Ami kpukpru ini mma nsiti utịbe utịbe un̄wọn̄ọ oro ẹwetde ke prọfesi Isaiah, ẹte, “mbụn̄ọ eyenek nte edop.”—Isaiah 35:6.
Nte n̄kenyenede n̄kọri ke utom mi, ntre ke n̄kekeme ndikan mme unana ukeme ikpọkidem mi. Ke 1978 mma nyene ifet ndidụk Ufọkn̄wed Utom Obio Ubọn̄ ke Lubumbashi, emi akabuanade ndisan̄a ofụri ibat itiat awakde osịm 1,200 ke moto mbiomo, ubom, ye tren. Ke akpanikọ, Jehovah ama anam ukeme awak ọnọ mi ke isan̄ emi. (Isaiah 12:2; 40:29) Idahaemi mmekeme idem ndisan̄a—ye akwa afanikọn̄—ke n̄kpọ nte ikpat 300 ye unana edikama eto. Ami mmonịm ke akpanikọ nte ke Jehovah omokop akam mi ko ke 1973 ndinọ mi odudu ndinam n̄kpọ esie ye nsọn̄ọnda.
Obufa Itieutom
Ke 1984, ke mma n̄kodu ke esop Katako-Kombe ke isua itiaba, mma mbọ obufa itieutom ndinam utom ye esop Lodja-Centre. Isua kiet ke ukperedem nnyịn ima itọn̄ọ obufa ukpepn̄kpọ n̄wedesop oyomde ke itiat 7 ọkpọn̄ do, ndien ikebịghike ima itọn̄ọ efen ke itiat 20 oyomde usụn̄ ọkpọn̄ enyeoro. Ẹma ẹsọsọp ẹdiọn̄ọ akpatre emi nte otu oro odude nsannsan ndien ke 1988 ẹma ẹnyịme enye nte esop, ke ebiet nnamde utom idahaemi nte ebiowo.
Utom usiakusụn̄ ọfọn etieti ye ami, ke n̄kan̄ eke spirit ye ke n̄kan̄ obụkidem. Ke n̄kamade eto n̄wọrọ n̄ka ukwọrọikọ, ami mmekeme ndinam mme edisịn̄ede idem emi mme dọkta ẹketorode. Ami mmotịm n̄kop nsọn̄idem idahaemi n̄kan ini n̄kọtọn̄ọde utom usiakusụn̄, ndien udọn̄ mi edi ndiyọ ke utom emi tutu osịm utịt. Otịm ọdọn̄ mi ndikụt nte Jehovah edin̄wamde mi ‘ndinek nte edop’ ke ini oro ami mmendiyọhọ ubiak ubiak udọn̄ọ mi aba.
Ke ofụri esịt, ami mmọkọm Ete nnyịn eke heaven, emi ọnọde mi odudu, uko, ye utom uyọhọ-ini. Ami idahaemi ndi isua 36 ke emana, ndien ke isua 11 eke utom usiakusụn̄ ama ekebe, mmodori enyịn ndikaiso ke sededi oro ini iso edikamade. Mmebiere ndida ofụri odudu uwem mi ke ndikpono nnyụn̄ ntoro akwa Abasi, Jehovah.