Nso ke Kpukpru Emi Ẹwọrọ?

JESUS CHRIST ọkọdọhọ ke ẹdida ekọn̄, unana udia, ndiọi udọn̄ọ, ye unyekisọn̄ ẹdiọn̄ọ “akpatre ini eyo emi.”—Matthew 24:1-8; Luke 21:10, 11.

Toto ke 1914, ẹbiat uwem ke ntak ekọn̄ eke ufọt idụt ye idụt ye eke ufọt ekpụk ye ekpụk, ndien emi esiwak nditịbe koro mme ọkwọrọ ederi ẹsịnde idem ke mme mbubehe ukaraidem, ndien ke ndondo emi edinam oyomonsia oro atarade asuana osobo ekese uwem.

Kpa ye n̄kọri ke ifiọk ntaifiọk, ata ediwak miliọn owo ke ofụri ererimbot ẹnen̄ede ẹnana udia. Ediwak miliọn owo ẹsikpan̄a ke isua ke isua ke ntak unana udia.

Idiọk udọn̄ọ edi n̄ko ubak idiọn̄ọ oro Jesus ọkọnọde. Udọn̄ọ efiomnsa ama owot se ibede owo 21,000,000 ke Ekọn̄ Ererimbot I ama okokụre. Ke mîbietke ndiọi udọn̄ọ oro ẹkesidude ke ndusụk n̄kann̄kụk ke mme ini emi ẹkebede, udọn̄ọ emi ama otụk mme idụt ke ofụri isọn̄ ọkọrọ ye mme isuo oro ẹdude nsannsan. Idahaemi AIDS ke ọnọmọ ediwak owo ke ekondo, ndien utọ udọn̄ọ nte akpaikpai ikọn̄, utoenyịn, udọn̄ọ nnan, ye utọrọ ke ẹka iso ndinọmọ mme idụt oro ẹtọn̄ọde-tọn̄ọ uforo.

Nte mbụk ọdọhọde, ata ediwak tọsịn unyekisọn̄ oro ẹkponide ke nsio nsio udomo ẹsitịbe kpukpru isua. Kpa ye n̄kpọ utom ye eti usụn̄ unọ ntọt oro ẹdude, ẹwak ndikop ke mbụk n̄kpọntịbe mban̄a unọmọ otode unyekisọn̄ ke mme ikpehe oro ediwak owo ẹdụn̄de.

Bible ama ebem iso etịn̄ n̄ko ete: “Edi fiọk emi, ete ndiọk eyo ẹyedu ke ukperedem ini. Koro mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuọt ye ete ye eka, ẹnana esịt ekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ; ẹma ebiari, ẹyak idiọk itọn̄ akan mmọ ubọk, ẹtie obom-obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi; ẹnyene enyọn̄-enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi. Wọn̄ọde kpọn̄ mmọ eke ẹtiede ntem.”—2 Timothy 3:1-5.

Ndi afo emenyịme ke nnyịn idu ke “ndiọk eyo”?

Nte afo omokụt ke mme owo ẹma idem, ẹma inyene, ẹnyụn̄ ẹkohode idem ebe nde?

Anie akpafan̄a ke ererimbot emi iyọhọke ye mbon ibụk oro ẹnanade esịtekọm, mbon oro ẹbiatde un̄wọn̄ọ, oro mînyụn̄ inamke akpanikọ?

Ndi afo ọmọfiọk ke ndisọn̄ ibuot ye ete ye eka ọkọrọ ye ọkpọsọn̄ unana ima ọdọdiọn̄ ọkọri, idịghe sụk ke ibat ibat ebiet edi ke ofụri ekondo?

Nte eyịghe mîdụhe afo ọmọfiọk ke nnyịn idu ke ererimbot oro mme owo ẹnen̄erede ẹma mbre edi ẹsuade se ifọnde. Ntre ke Bible etịn̄ aban̄a edu oro ẹdiyọhọde ke “ukperedem ini.”

Nte oyom uyarade efen efen man idiọn̄ọ ini emi nnyịn idude uwem mi? Jesus ama ebem iso etịn̄ n̄ko ete ke ẹyenyụn̄ ẹkwọrọ eti mbụk Obio Ubọn̄ Abasi ke ofụri isọn̄ kpa ke ini emi. (Matthew 24:14) Nte ẹnam oro?

Ẹmịn̄ Enyọn̄-Ukpeme, kpa n̄wed emi ọkọn̄ọde ke Bible, oro ẹtịmde san̄asan̄a man ọnọ ntọt aban̄a Obio Ubọn̄ Jehovah kpukpru ini ke usem oro awakde akan eke n̄wedmbụk efen ekededi.

Kpukpru isua, Mme Ntiense Jehovah ẹsisịn se iwakde ibe hour biliọn kiet ndinọ ikọ ntiense mban̄a Obio Ubọn̄ Abasi.

Idahaemi mmọ ẹmịn̄ mme n̄wed oro ẹnamde Bible an̄wan̄a ke n̄kpọ nte usem 400, idem ke mme usem oro n̄kpri otu emi ẹdude nsannsan, ẹkotde. Mme Ntiense Jehovah ẹda eti mbụk ẹsịm kpukpru idụt; mmọ n̄ko ẹkwọrọ ikọ ke ediwak isuo ye ke mme ikpehe oro mîwọrọke etop ke ererimbot ukaraidem. Ke ata ediwak idụt, mmọ ke ẹnam utom unọ ukpep Bible ofụri ini.

Ke akpanikọ, ẹkwọrọ eti mbụk Obio Ubọn̄ Abasi ke ofụri isọn̄, idịghe man ẹnam ofụri ererimbot akabade esịt, edi nte ntiense. Ẹnọ mme owo ke kpukpru ebiet ifet ndiwụt m̀mê mmimọ imekere iban̄a enye emi okobotde enyọn̄ ye isọn̄, n̄ko m̀mê mmimọ iyenịm mme ibet esie inyụn̄ iwụt ima oro inyenede inọ ekemmọ owo.—Luke 10:25-27; Ediyarade 4:10b.

Ke mîbịghike, Obio Ubọn̄ Abasi ọmọn̄ anam isọn̄ asana ọbọhọ kpukpru mme idiọk owo onyụn̄ anam enye edi paradise ofụri ekondo.—Luke 23:43.

[Ekebe ke page 6]

Mme Akpatre Usen Nso?

Idịghe mme akpatre usen inọ ubonowo. Bible ọnọ mbon oro ẹnamde uduak Abasi idotenyịn nsinsi uwem.—John 3:16, 36; 1 John 2:17.

Idịghe mme akpatre usen inọ isọn̄. Ikọ Abasi ọn̄wọn̄ọ ete ke ofụri isọn̄ emi ẹdụn̄de ke esịt edidu ke nsinsi.—Psalm 37:29; 104:5; Isaiah 45:18.

Utu ke oro, enye edi mme akpatre usen eke afai afai, editịm n̄kpọ unana ima emi, ye eke mbon oro ẹsọn̄ọde ẹyịre ke mme usụn̄ esie.—Mme N̄ke 2:21, 22.

[Ekebe/Ndise ke page 7]

Nte Bible Enen̄ede Edi Ikọ Abasi?

Mme prọfet Bible ẹma ẹwet ediwak ini ẹte: ‘Ntem ke Jehovah ọdọhọ.’ (Isaiah 43:14; Jeremiah 2:2) Jesus Christ ke idemesie emi edide Eyen Abasi ama ọsọn̄ọ etịn̄ ete ke imọ ‘iketịn̄ke ikọ ke uyo idem imọ.’ (John 14:10) Bible ke idemesie etịn̄ in̄wan̄-in̄wan̄ ete ke ‘ẹda odudu Spirit Abasi ẹwet kpukpru N̄wed Abasi.’—2 Timothy 3:16.

Idụhe n̄wed efen oro ẹmịn̄de ke ediwak usem ntre—awakde ebe usem 2,200, nte Mme N̄ka Bible Ẹdianade Kiet, ẹtọtde. Idụhe n̄wed efen emi ẹsuande atara ntre—awakde idahaemi ebe idem biliọn inan̄. Nte idịghe se afo okpodoride enyịn aban̄a etop Abasi emi enyenede ofụri ubonowo edi oro?

Ke oyomde ọyọhọ ọyọhọ nneme aban̄ade uyarade nte ke ẹda odudu spirit Abasi ẹwet Bible, se ediye uduot ekpri n̄wed oro N̄wed Ofụri Owo, emi Mme Ntiense Jehovah ẹsiode.

Edieke afo okotde Bible onyụn̄ enyịmede nte ke enye enen̄ede edi Ikọ Abasi, afo ọyọbọ akamba ufọn.

[Ekebe/Mme ndise ke page 8]

Nso Idi Obio Ubọn̄ Abasi?

Enye edi ukara emi odude ke heaven oro owụtde itie edikara ata Abasi, kpa Jehovah, Andibot enyọn̄ ye isọn̄.—Jeremiah 10:10, 12.

Bible owụt ke Jesus Christ edi enye emi Abasi ọnọde utọ odudu edikara oro. (Ediyarade 11:15) Ke ini okodude ke isọn̄, Jesus ama owụt ke imọ imenyenyene utịbe utịbe odudu ito Abasi—odudu oro akanamde enye ekeme ndikara mme oto-obot n̄kpọ, ọkọkde kpukpru orụk udọn̄ọ, idem anamde mme akpan̄kpa eset. (Matthew 9:2-8; Mark 4:37-41; John 11:11-44) Ntịn̄nnịm ikọ Bible eke odudu spirit ama ebem iso etịn̄ ete ke Abasi n̄ko ọyọnọ enye “ubọn̄, ye ukpono, ye itie-edidem, ẹte kpukpru mme idụt ye obio ye usem ẹnam n̄kpọ ẹnọ enye.” (Daniel 7:13, 14) Ẹkot ukara oro Obio Ubọn̄ heaven; Jesus Christ etie ke heaven idahaemi akara ukara esie.

[Mme ndise ke page 7]

Ẹkwọrọ eti mbụk ke ofụri ekondo