Nso ke Afo Ebịne ke Uwem?
• Ediwak owo ẹyak idem ẹnyịni ke mme mbubehe uwem eke usen ke usen tutu mmọ ikereke iban̄a se mmọ ẹbịnede ke uwem.
• Bible asian nnyịn aban̄a mme n̄kpọntịbe emi ẹdide ke iso. Enye n̄ko ọtọt aban̄a ndutịme oro edidude ke mme n̄ka ubọkowo ke ofụri ererimbot. Man nnyịn ibọ ufọn inyụn̄ ibọhọ afanikọn̄, oyom isọsọp inam n̄kpọ ke usụn̄ oro enyenede iwụk.
• Odu ndusụk owo oro ẹdiọn̄ọde se Bible etịn̄de ẹnyụn̄ ẹdomode ndida enye nsịn ke edinam edi ẹyakde mme editịmede esịt uwem ẹwọn̄ọde ntịn̄enyịn mmọ.
• Nte afo omokop inemesịt aban̄a se afo ebịnede ke uwem? Ke ini odiomide se edinamde, nte afo emesikere nte enye ekemede nditụk mme utịtmbuba anyan ini fo?
[Ekebe/Mme ndise ke page 9]
Nso Idi Ata Akpan N̄kpọ inọ Fi?
Didie ke mme n̄kpọ ẹtienede mi ẹdi akpan n̄kpọ ẹnọ fi? Wet nọmba dian tiene nte mmọ ẹdide akpan n̄kpọ ẹnọ fi.
Ediwak mmọ ẹnyene nnennen itie ke uwem, edi ke ini anade afo emek, nso isidi akpa? udiana? ye ntre ntre eken.
․․․ Unọ idem inemesịt ye unọ idem nduọkodudu
․․․ Utom m̀mê ubọkọkọ mi
․․․ Nsọn̄idem mi
․․․ Inemesịt mi
․․․ Nsan̄andọ mi
․․․ Ete ye eka mi
․․․ Nditọ mi
․․․ Ediye ufọkidụn̄, nti ọfọn̄
․․․ Ndiwọrọ etop ke se ededi oro nnamde
․․․ Utuakibuot nnọ Abasi
[Ekebe ke page 10, 11]
Nte Mme N̄kpọ Oro Afo Emekde ke Ẹda Fi Ẹka Ebiet Emi Afo Oyomde?
KERE BAN̄A MME MBỤME EMI
UNỌ IDEM INEMESỊT YE UNỌ IDEM NDUỌKODUDU: Nte unọ idem nduọkodudu oro ami mmekde esinọ mi nduọkodudu? Nte enye esịne n̄kpọ nduaidem oro ekemede ndisịn nsọn̄idem mi ke itiendịk m̀mê ndikam mbiomo mi nsinsi ndo? Nte enye edi orụk “mbre” oro esịnede nduaidem ke hour ifan̄ kpọt edi oro ekemede ndikama nsinsi iduọesịt? Idem edieke unọ idem inemesịt oro mmekde ọfọnde, nte mmabiat ini ke enye tutu nnyeneke ini oro ekemde nnọ mme ata akpan n̄kpọ?
UTOM M̀MÊ UBỌKỌKỌ MI: Nte enye an̄wam mi ndinyene mme akpan n̄kpọ udu-uwem, mîdịghe ndi ami n̄kam ndi ofụn esie? Nte enye ada ini ye ukeme mi tutu afịna nsọn̄idem mi? Nte ami mmek ndinam utom idịbi udia mi mbe ini m̀mê mmek ndibiat ini ye nsan̄andọ m̀mê nditọ mi? Edieke eteutom mi oyomde nnam n̄kpọ oro afịnade ubieresịt mi m̀mê n̄kpọ oro awakde ndisụhọde udọn̄ n̄kpọ eke spirit mi, nte ami nyanam n̄kpọ oro mbak nditaba utom mi?
NSỌN̄IDEM MI: Nte ami nda enye mfefere mfefere, m̀mê mmetịn̄ enyịn nse mban̄a enye? Nte oro edi akpan ibuot nneme mi? Ndi usụn̄ oro nsede mban̄a enye owụt ke mmekere mban̄a ubon mi?
INEMESỊT MI: Nte emi edi akpa n̄kpọ oro nsikerede mban̄a? Nte ami mmayak enye edi akpan n̄kpọ akan inemesịt nsan̄andọ mi m̀mê eke ubon mi? Ndi usụn̄ oro ndade nyom enye odu ke n̄kemuyo ye utuakibuot ata Abasi?
NSAN̄ANDỌ MI: Ndi nsida nsan̄andọ mi nte nsan̄a mi n̄kukụre ke ini enemde mi ke idem? Nte ami mmesinọ nsan̄andọ mi ukpono, nte owo emi enyenede uku esie? Nte se nnịmde ke akpanikọ mban̄a Abasi akara nte nsede nsan̄andọ mi?
ETE YE EKA MI: Edieke nsụk ndide eyenọwọn̄, nte mmosụk ibuot nnọ ete ye eka mi—mbọrọde mmọ ikọ ukpono ukpono, nnamde mme utom esịtufọk oro ẹnọde mi, nnyọn̄de ufọk ke ini ekededi oro mmọ ẹnịmde, ndianarede n̄kpọn̄ mme nsan̄a ye mme edinam oro mmọ ẹkpande? Edieke ndide akwa owo, nte ami mmesiwụt ukpono ke ndikpan̄ utọn̄ nnọ ete ye eka mi, nnọde mmọ un̄wam oro odotde ke ini ẹyomde? Ndi ami nnam n̄kpọ ye mmọ nte enemde mi ke idem m̀mê nte ekemde ye item Ikọ Abasi?
NDITỌ MI: Nte mmada ke edi mbiomo mi ndikpep nditọ mi nnennen ido uwem, mîdịghe nte ami ndori enyịn ufọkn̄wed ndinam oro? Nte ami mmesitie ye nditọ mi, mîdịghe nte ami nyom mmọ ẹyak ofụri ini mmọ ẹnọ mme n̄kpọ mbre, TV, m̀mê kọmputa? Nte ami mmesitụnọ nditọ mi kpukpru ini oro mmọ ẹfụmide item Abasi, mîdịghe nte ami nsitụnọ mmọ akpan akpan ke ini mmọ ẹnamde esịt ayat mi?
EDIYE UFỌKIDỤN̄, NTI ỌFỌN: Nso ibiere ntịn̄enyịn oro nnọde ukamaidem ye inyene mi—ndi edi nte ami ndoride enyịn mme mbọhọidụn̄ mi ndise mi? mfọnọn̄kpọ ubon mi? ekikere nte ke ndi andituak ibuot nnọ Abasi?
NDIWỌRỌ ETOP KE SE EDEDI ORO NNAMDE: Ndi mmekere ke ndinam n̄kpọ ọfọn edi akpan n̄kpọ? Nte ami n̄n̄wana ndiwọrọ etop? Nte esifịna mi ke ini owo efen anamde n̄kpọ akan mi?
UTUAKIBUOT NNỌ ABASI: Nte ndinyene unyịme Abasi edi ata akpan n̄kpọ ọnọ mi akan ndinyene unyịme nsan̄andọ mi, eke nditọ mi, eke ete ye eka mi, m̀mê eke eteutom mi? Man ndu inem uwem, nte ami nyenyịme ndinụk n̄kpọ Abasi nnịm n̄kan̄ kiet?
TỊM KERE ITEM BIBLE
Nso itie ke Abasi enyene ke uwem fo?
Ecclesiastes 12:13: “Bak Abasi, nyụn̄ nịm mbet esie: koro emi edi eke kpukpru owo.”
BỤP IDEMFO: Ndi uwem mi owụt ke nte nsede n̄kpọ edi oro? Ndi nsụkibuot nnọ mme ewụhọ Abasi ebiere usụn̄ oro nsede mban̄a mme utom ke ufọk, ke itieutom, m̀mê ke ufọkn̄wed? Mîdịghe nte mme udọn̄ efen m̀mê mme mfịghe uwem ẹbiere ini oro nsiode nnịm ndinam n̄kpọ Abasi?
Nso orụk itie ebuana ke afo enyene ye Abasi?
Mme N̄ke 3:5, 6: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”
Matthew 4:10: “Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄-ikpọn̄.”
BỤP IDEMFO: Ndi usụn̄ emi n̄kerede mban̄a Abasi edi oro? Ndi edinam mi eke usen ke usen, ọkọrọ ye usụn̄ oro nsede mban̄a mme mfịna, ẹwụt utọ mbuọtidem ye utuakibuot oro?
Edikot ye edikpep Bible ẹdi akpan n̄kpọ adan̄a didie ẹnọ fi?
John 17:3: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.”
BỤP IDEMFO: Ndi itie oro ami nnọde edikot Ikọ Abasi ye edikere ntotụn̄ọ ntotụn̄ọ mban̄a enye owụt ke ami mmenen̄ede nnịm oro ke akpanikọ?
Edidụk mme mbono esop Christian edi akpan n̄kpọ adan̄a didie ọnọ fi?
Mme Hebrew 10:24, 25: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, . . . ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.”
Psalm 122:1: “Mmọ eke ẹdọhọde mi, ẹte, ‘Nnyịn iyaka ke ufọk Jehovah,’ ẹdat mi esịt.”
BỤP IDEMFO: Ndi usụn̄ uwem mi owụt ke mmowụt esịtekọm nnọ ndausụn̄ emi ẹkụtde mi ke Ikọ Abasi? Ke ọfiọn̄ emi ebede, nte mma ntre mbono esop Christian ekededi koro n̄kadade n̄kpọ efen ke akpan n̄kpọ n̄kan?
Nte afo emesịn ifịk abuana ke nditịn̄ nnọ mbon efen mban̄a Abasi ye uduak esie?
Matthew 24:14: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense . . . , ndien adan̄aoro ke utịt eyedi.”
Matthew 28:19, 20: “Mbufo ẹka ẹkenam kpukpru mme idụt ẹdi mbet Mi, . . . ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.”
Psalm 96:2, 3: “Ẹkwọ ẹnọ Jehovah, ẹtoro enyịn̄ esie; ẹtan̄a edinyan̄a esie kpukpru usen.”
BỤP IDEMFO: Nte utom emi enyene itie oro akpanade enye enyene ke uwem mi? Ndi ukeme oro nsịnde ke utom emi owụt ke ami mmenịm ke ini emi idude uwem mi edi ata akpan ini?