Ererimbot Emi Aka M̀mọ̀n̄?
Ikpọ mfịna ye mme n̄kpọntịbe oro ẹkpade owo idem ẹdi ọsọ n̄kpọ ke mbụk n̄kpọntịbe ke ofụri ererimbot! Nso ke emi ọwọrọ?
ỌKPỌKPỌ IFỤRE: Ke ẹtop mme bọmb ke an̄waurua. Ke ẹtop mme andikpep ye nditọ ufọkn̄wed ẹwot ke ufọkn̄wed. Ke ẹyịp nseknditọ ke ekpri ini oro ete ye eka mmọ ẹfepde enyịn. Ke ẹwo iban ye n̄kaniren ufọt uwemeyo iba.
IDAHA IDO UKPONO: Mme ufọkabasi ke ẹnọ n̄kan̄ emi ẹn̄wanade ekọn̄ ye n̄kan̄ eken ibetedem. Ẹdọhọ ke mme ọkwọrọ ederi ẹdi ntak nsobo ofụri orụk. Mme oku ke ẹdan̄ nditọwọn̄ ke n̄kanubọk; ufọkabasi inamke n̄kpọ iban̄a. Ibat mme aka ufọkabasi ke osụhọde; ke ẹnyam mme ufọkabasi.
N̄KANN̄KỤK: Ẹwot mme akai ke ntak edinam mbubehe. Mme ubuene ẹkpok eto ẹma ke ikọt ndida mbara ifia. Ẹsabade mmọn̄ emi odude ke idakisọn̄ tutu enye ifọnke aba se ẹn̄wọn̄de. Mbio emi mme usiakifia ẹduọn̄ọde ye ndusụk usụn̄ ukọiyak eyomfịn ke ẹsobo iyak. Ẹsabade ofụm tutu enye edibababa owo ibifịk.
NDINYENE SE ẸDADE ẸDU UWEM: Ẹdọhọ ke okụk oro owo kiet kiet adiade ke isua ke n̄kan̄ edem usụk Sahara Africa edi $480 (U.S.). Idiọkitọn̄ mme esenyịn utom esida ekesịm mbubehe ndiduọ, anamde ediwak tọsịn owo ẹnana utom. Udia n̄wo anam mme andisịn okụk ke mbubehe ẹtaba okụk oro mmọ ẹn̄wanade ke ofụri eyouwem mmọ.
UNANA UDIA: N̄kpọ nte owo 800,000,000 ke ofụri ererimbot inyeneke udia idia kpukpru ini.
EKỌN̄: Se ibede owo 100,000,000 ẹkeduọk uwem ke isua ikie 20 ke ntak ekọn̄. Ẹnyene n̄kpọekọn̄ nuclear oro awakde ekem ndida nsobo ubonowo mfiak nsobo ediwak ini. Mbio obio ke ẹn̄wana ekọn̄. Edinam oyomonsia atara ofụk ofụri ererimbot.
NDIỌI UDỌN̄Ọ: Ọtọn̄ọde ke 1918, udọn̄ọ efiomnsa ama owot owo 21,000,000. Idahaemi AIDS amakabade edi “akama-nsobo udọn̄ọ oro atarade akan ke ofụri mbụk owo.” Kansa ye udọn̄ọ esịt ẹsịn mfụhọ ke ofụri ererimbot.
Kûwụk ntịn̄enyịn ke mme n̄kpọntịbe kiet kiet oro ẹbụkde. Nte mmọ ẹdi mme n̄kpọntịbe oro kiet mînyeneke ebuana ye eken? Mîdịghe nte mmọ ẹdi ubak ntan̄ndian n̄kpọntịbe ofụri ererimbot oro ẹnen̄erede ẹnyene se ẹwọrọde?
[Ekebe/Ndise ke page 5]
Nte Abasi Enen̄ede Ekere Aban̄a?
Ke ntak mfụhọ oro otode mme akpa-owo-idem n̄kpọntịbe m̀mê akwa ntakurua, akpa ediwak owo idem ntak emi Abasi mîsịbeke idụk ibiọn̄ọ mme utọ n̄kpọ oro.
Abasi enen̄ede ekere aban̄a. Enye ọnọ eti ndausụn̄ ye ata ubọhọ idahaemi. (Matthew 11:28-30; 2 Timothy 3:16, 17) Enye anam ndutịm ndida nsinsi utịt nsọk afai, udọn̄ọ, ye n̄kpa. Ndutịm oro enye anamde owụt ke idịghe sụk mme owo ẹtode idụt kiet ke enye ekere aban̄a edi ekere aban̄a mme owo ẹtode kpukpru idụt, ekpụk, ye usem.—Utom 10:34, 35.
Adan̄a didie ke nnyịn ikere iban̄a uduak Abasi? Nte afo ọmọfiọk enye emi Andibot enyọn̄ ye isọn̄ edide? Nso idi enyịn̄ esie? Nso idi uduak esie? Enye ọbọrọ mme mbụme emi ke Bible. Enye etịn̄ ọnọ nnyịn do aban̄a ndutịm emi enye anamde man ada utịt ọsọk afai ọkọrọ ye udọn̄ọ ye n̄kpa. Nso ke oyom oto nnyịn man ibọ ufọn? Oyom nnyịn ikpep iban̄a enye ye uduak esie. Nnyịn ikeme didie ndidori enyịn ndibọ ufọn nto ndutịm esie ke nnyịn mîbuọtke idem ke enye? (John 3:16; Mme Hebrew 11:6) Oyom nnyịn n̄ko inam mme n̄kpọ oro enye oyomde. (1 John 5:3) Nte afo emenen̄ede ekere aban̄a uduak Abasi tutu ọdọn̄ fi ndinam se enye oyomde?
Man ifiọk ntak emi Abasi ayakde mme idaha ẹdude mi ẹka iso, odu akpan eneni oro anade nnyịn ifiọk. Bible anam emi an̄wan̄a. Ẹtịn̄ se eneni emi edide ke page 15 n̄wed emi.