Ibuot 67

Mmọ Ẹkpu Ndimụm Enye

KE ADAN̄AEMI Usọrọ Mme Ataya osụk akade iso, mme adaiso ido ukpono ẹdọn̄ ikpọ owo borisi ndimụm Jesus. Enye idomoke ndidịbe. Utu ke oro, Jesus akaiso ndikpep n̄kpọ an̄wan̄wa, ọdọhọde ete: “Ke ekpri ibio ini kan̄a ndu ye mbufo, ndien ndinyọn̄ ntiene Enyeemi ọkọdọn̄de Mi. Mbufo ẹyeyom Mi, edi idikwe Mi; ọtọ nte Ami nnyụn̄ ndude, mbufo ikemeke ndika do.”

Mme Jew ifiọkke se enye etịn̄de, ntre mmọ ẹneni ke otu idemmọ ẹte: “Owo emi edika m̀mọ̀n̄ eke nnyịn mîdikwe Enye? M̀mê Enye editiene mmọemi ẹsuanade ẹdụn̄ ke otu mme Greek ekekpep mme Greek n̄kpọ? Nso idi ikọ eke Enye etịn̄de ntre ete, mbufo ẹyeyom Mi, edi idikwe Mi; n̄ko, Ọtọ nte Ami ndude, mbufo ikemeke ndika do?” Ke akpanikọ, Jesus etịn̄ aban̄a n̄kpa ye ediset ke n̄kpa esie n̄kenyene uwem ke heaven oro ekperede, ke ebiet emi mme asua esie mîkemeke nditiene enye.

Ọyọhọ usen itiaba ye akpatre usen usọrọ oro edisịm. Kpukpru usenubọk ke ini usọrọ oro, oku eyeduọk mmọn̄, emi enye okokoide ke Obube Mmọn̄ Siloam, man mmọn̄ oro ekpewet aka mben itieuwa. Iso-ọfọn nditi mme owo oro mban̄a edinam ofụri usen emi, Jesus ofiori ete: “Edieke owo ekededi okopde nsatitọn̄, yak enye etiene Mi edin̄wọn̄. Owo eke ọbuọtde idem ye Ami, nte N̄wed Abasi ọdọhọde, akpa odu-uwem mmọn̄ eyeto enye ke idem ọwọrọ.”

Ke akpanikọ, Jesus mi etịn̄ aban̄a ikpọ n̄kpọntịbe oro edidade itie ke ini ẹdin̄wan̄ade edisana spirit ẹduọk. Isua oro eketienede, edin̄wan̄a edisana spirit emi nduọk ama ada itie ke Pentecost. Do, idịm mmọn̄ uwem ama otop ọwọrọ ke ini mbet 120 oro ẹketọn̄ọde ndikwọrọ ikọ nnọ mme owo. Edi mbemiso ini oro, spirit idụhe ke ekikere oro nte ke owo iyetke baba mbet Christ kiet aran ye edisana spirit inyụn̄ ikot edinyene uwem eke heaven.

Ke ndinam n̄kpọ mban̄a ukpepn̄kpọ Jesus, ndusụk owo ẹtọn̄ọ ndidọhọ: “Owo emi edi prọfet oro ke akpanikọ,” nte an̄wan̄ade ẹtịn̄de ẹtụk prọfet emi okponde akan Moses, emi ẹken̄wọn̄ọde ẹte ke eyedi. Mmọ ẹdọhọ ẹte: “Emi edi Christ.” Edi mmọ eken ẹfan̄a ẹte: “Baba, nte Christ edito ke Galilee? Nte N̄wed Abasi idọhọke ite Christ oto ke orụk David, onyụn̄ oto ke Bethlehem, obio-in̄wan̄ emi David okodude do?”

Ntre ubahade odu ke ufọt otuowo. Ndusụk owo ẹyom ẹmụm Jesus, edi owo ndomokiet itụkke enye ubọk. Ke ini mme isụn̄utom ẹfiakde ẹnyọn̄ ẹdi ye unana edimụm Jesus, ikpọ oku ye mme Pharisee ẹbụp ẹte: “Nsinam mbufo mîdaha Enye idi?”

Mme isụn̄utom oro ẹdọhọ ẹte, “Akananam owo itịn̄ke ikọ nte owo emi.”

Ke ẹyọhọde ye iyatesịt, mme adaiso ido ukpono oro ẹduọn̄ọ ẹdụk nsahi, ẹtịn̄ ikọ ẹdian, ẹnyụn̄ ẹsion̄o enyịn̄. Mmọ ẹtịn̄ ẹte: “Nte mbufo n̄ko ẹmewaha ẹkpọn̄ usụn̄? Nte baba owo kiet ke otu mbiowo m̀mê ke otu mme Pharisee ọkọbuọt idem ye Enye? Amaedi otuowo eke mîfiọkke ibet, mmọ ẹdi mbukpo owo.”

Ke okopde emi, Nic­odemus, owo Pharisee ye andikara mme Jew (oro edi, owo esop Sanhedrin), etịn̄ ikọ ke ibuot Jesus. Afo emekeme nditi nte ke isua iba ye ubak ke mbemiso, Nicodemus ama aka etiene Jesus ke okoneyo onyụn̄ owụt mbuọtidem ke enye. Idahaemi Nicodemus ọdọhọ ete: “Nte ibet nnyịn ebiere ikpe owo, ke ini mîkopke kan̄a uyo esie, mînyụn̄ ifiọkke se enye anamde?”

Mme Pharisee ẹnen̄ede ẹkop iyatesịt nte owo mmọ kiet akpadade ye Jesus. Mmọ ẹdọhọ uyat uyat ẹte, “Nte afo n̄ko oto ke Galilee? Dụn̄ọde kokụt ete, baba prọfet kiet itoho ke Galilee iwọrọ.”

Okposụkedi N̄wed Abasi mîtịn̄ke nnennen nte ke prọfet eyeto Galilee ọwọrọ, enye anyan ubọk owụt Christ nte otode do ọwọrọ, ọdọhọde ete ke ẹyekụt “akwa un̄wana” ke ikpehe obio emi. Akande oro, Jesus akamana ke Bethlehem, enye okonyụn̄ edi eyen David. Ke adan̄aemi etiede nte ke mme Pharisee ẹfiọk ẹban̄a emi, eyedi mmọ ẹkesuan mme ukwan̄ ekikere emi mme owo ẹnyenede ẹban̄a Jesus. John 7:32-52; Isaiah 9:1, 2; Matthew 4:13-⁠17.

▪ Nso isitịbe kpukpru usenubọk ke ini usọrọ oro, ndien didie ke ẹkeme ndidi Jesus odụri ntịn̄enyịn owụt emi?

▪ Ntak emi mme isụn̄utom oro ẹkpụde ndimụm Jesus, ndien didie ke mme adaiso ido ukpono ẹnam n̄kpọ?

▪ Anie edi Nicodemus, nso edu ke enye enyene aban̄a Jesus, ndien didie ke ekemmọ mme Pharisee ẹnam n̄kpọ ye enye?

▪ Nso uyarade idu nte ke Christ ediwọrọ oto Galilee?