Ibuot 68
N̄kaiso Unọ Ukpep ke Usen Sabbath
AKPATRE usen Usọrọ Mme Ataya, ọyọhọ usen itiaba, ke akaiso. Jesus ke ọnọ ukpep ke temple ke ọtọ oro ẹkotde “ubet unịm-n̄kpọ.” Nte an̄wan̄ade, emi edi ke n̄kan̄ oro ẹkotde Okụre Iban, ke ebiet emi ekebe etịbe ẹdude ẹnọ mme owo ndisịn etịbe mmọ.
Kpukpru okoneyo ke ini usọrọ emi, ẹsidomo ọkpọ ọkpọ utuenikan̄ ke temple n̄kan̄ emi. Ẹsiwụk nnyan udiọk utuenikan̄ inan̄ mi, kiet kiet ye ikpọ a-besịn inan̄ ẹyọhọde ye aran. Un̄wana otode utuenikan̄, emi ikan̄ asakde ke besịn aran 16 mi, ọsọn̄ odudu ndinọ un̄wana ke mme mbọhọ oro nsịm ata anyan usụn̄ ke okoneyo. Ekeme ndidi se Jesus etịn̄de idahaemi anam mme andikpan̄ utọn̄ nnọ enye ẹti se emi owụtde. Jesus ọdọhọ ete, “Ami ndi un̄wana ererimbot; owo eke etienede Mi idisan̄ake ke ekịm, edi eyenyene un̄wana uwem.”
Mme Pharisee ẹneni ẹte: “Afo edi ntiense ọnọ Idem Fo; ikọ ntiense Fo idịghe akpanikọ.”
Jesus ọbọrọ mmọ ete: “Ami n̄kpededi ntiense nnọ Idem Mi, ikọ ntiense Mi ẹdi akpanikọ; koro mmọfiọk ebiet emi ntode, ye ebiet emi n̄kade: edi mbufo ifiọkke ebiet emi ntode, ye ebiet emi n̄kade.” Enye adian do ete: “Ami ndi ntiense nnọ Idem Mi, Ete emi ọkọdọn̄de Mi onyụn̄ edi ntiense ọnọ Mi.”
“Ete Fo odu m̀mọ̀n̄?” ntre ke mme Pharisee ẹyom ndifiọk.
Jesus ọbọrọ ete, “Mbufo ifiọkke Mi, inyụn̄ ifiọkke Ete Mi. Edieke mbufo ẹkpefiọkde Mi, mbufo ẹkpenyụn̄ ẹfiọk Ete Mi.” Okposụkedi mme Pharisee ẹsụk ẹyomde ẹmụm Jesus, owo ndomokiet itụkke enye ubọk.
Jesus ọtọn̄ọ ntak ọdọhọ ete, “Ami mmọn̄ ndinyọn̄, . . . ọtọ nte Ami n̄kade, mbufo ikemeke ndika do.”
Kemi mme Jew ẹtọn̄ọ ndiyịk ẹte: “Nte Enye ediwot idem, esịn Enye ọdọhọ ete, Ọtọ nte Ami n̄kade, mbufo ikemeke ndika do?”
Jesus anam an̄wan̄a ete, “Mbufo ẹto ke isọn̄, Ami nto ke enyọn̄: mbufo ẹdi mbon ererimbot emi, Ami ndịghe owo ererimbot emi.” Ekem enye adian do ete: “Ke mbufo mînịmke ke akpanikọ ite Ami ndi Enye, mbufo ẹyekpan̄a ke mme idiọkn̄kpọ mbufo.”
Nte ededi, Jesus etịn̄ aban̄a edidu oro enye okodude mbemiso edide owo ye enye ndidi Messiah, m̀mê Christ oro ẹken̄wọn̄ọde. Kpa ye oro, mmọ ẹbụp, nte eyịghe mîdụhe ye akwa emiom ẹte: “Afo edi anie?”
Ke iso mme andisịn enye, Jesus ọbọrọ ete: “Nsinam n̄kpetetịn̄ ikọ ekededi ye mbufo?” Edi enye akaiso ndidọhọ ete: “Andidọn̄ Mi edi akpanikọ; ndien se Ami n̄kokopde Enye ke inua, n̄kpọ oro ke ntetịn̄ nnọ ererimbot.” Jesus akaiso ete: “Ke ini mbufo ẹdimenerede Eyen Owo ke enyọn̄, adan̄aoro ke mbufo ẹdifiọk ẹte Ami ndi Enye, nnyụn̄ nnamke n̄kpọ oto Idem Mi, edi kpa nte Ete ekekpepde Mi, kpa ntre ke ntetịn̄. Andidọn̄ Mi onyụn̄ odu ye Ami: enye ikọkpọn̄ke Mi ikpọn̄; koro Ami nnamde se inemde Enye esịt kpukpru ini.”
Ke ini Jesus etịn̄de ikọ ẹmi, ediwak owo ẹbuọt idem ye enye. Kaban̄a mbon ẹmi enye ọdọhọ ete: “Edieke mbufo ẹsọn̄ọde ẹda ke ikọ Mi, mbufo ẹdi mbet Mi ke akpanikọ: ndien mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.”
Mme andibiọn̄ọ enye ẹbọ enye ikọ ke inua ẹte, “Nnyịn idi nditọ Abraham, akanam nnyịn idụkke ufụn inọ baba owo kiet. Nsinam ọdọhọde ndien ete, Mbufo ẹyewọrọ ufụn?”
Okposụkedi mme Jew ẹkesidude ndien ndien ke idak ukara esenidụt, mmọ isinyịmeke ite ke mme andikara mmimọ ẹdi eteufọk mmimọ. Mmọ iyomke ẹkot mmimọ ifụn. Edi Jesus osio owụt ete ke mmọ ẹnen̄ede ẹdi ifụn. Ke nso usụn̄? Jesus ọdọhọ ete, “Ke akpanikọ ke ndọhọ mbufo, kpukpru owo eke anamde idiọkn̄kpọ edi ofụn idiọkn̄kpọ.”
Mme Jew ndisịn ndinyịme itie ufụn idiọkn̄kpọ mmọ esịn mmọ ke ata idiọk itie. Jesus anam an̄wan̄a ete, “Ofụn idụn̄ke ke ufọk ke nsinsi: eyen ke odụn̄ ke nsinsi.” Sia ofụn mînyeneke unen ke n̄kpọ-akpa, enye ekeme ndidu ke idiọk itie edidi se ẹbịnde ẹfep ini ekededi. Eyen ikpọn̄îkpọn̄ oro ẹmande m̀mê oro ẹdade ẹdisịn ke ubon odụn̄ “ke nsinsi,” oro edi, adan̄a nte enye odude uwem.
Jesus akaiso ete, “Edieke Eyen edinamde mbufo ndien ẹwọrọ ufụn, mbufo ẹyewọrọ ufụn ke akpanikọ.” Ke ntre, akpanikọ oro anamde mme owo ẹwọrọ ufụn edi akpanikọ oro aban̄ade Eyen, kpa Jesus Christ. Edi n̄kukụre ke ntak ediwa mfọnmma uwem esie ke owo ekededi ekeme ndibọhọ akama-n̄kpa idiọkn̄kpọ. John 8:12-36.
▪ Jesus ekpep n̄kpọ ke m̀mọ̀n̄ ke usen Sabbath? Nso itịbe do ke okoneyo, ndien didie ke emi enyene ebuana ye ukpepn̄kpọ Jesus?
▪ Nso ke Jesus etịn̄ aban̄a ntọn̄ọ esie, ndien nso ke emi akpayarade kaban̄a owo emi enye edide?
▪ Ke nso usụn̄ ke mme Jew ẹdi ifụn, edi nso utọ akpanikọ edinam mmọ ẹwọrọ ufụn?