Ibuot 66

Ke Usọrọ Mme Ataya

JESUS amakabade ọwọrọ etop ke se ikperede ndisịm isua ita tọn̄ọ nte enye akana baptism. Ediwak tọsịn owo ẹmekụt mme utịben̄kpọ esie, ndien mbụk aban̄ade mme utom esie asuana ke ofụri idụt oro. Kemi, nte mme owo ẹsopde idem ẹnọ Usọrọ Mme Ataya ke Jerusalem, mmọ ẹyom enye do. Mmọ ẹyom ndifiọk m̀mê, “Enye odu m̀mọ̀n̄?”

Jesus amakabade edi owo emi ẹnenide eneni ẹban̄a. Ndusụk owo ẹdọhọ ẹte, “Enye edi eti owo.” Mmọ eken ẹte, “Idịghe: edi Enye ada mbio obio awaha ọkpọn̄ usụn̄.” Ekese nsụkuyo eke etiede ntem omodu ke mme ntọn̄ọ ntọn̄ọ usen usọrọ oro. Edi idụhe owo baba kiet emi enyenede uko nditịn̄ ikọ an̄wan̄wa ke ibuot Jesus. Emi edi koro mme owo ẹfehede mme adaiso mme Jew ndisio mmimọ usiene.

Ke ini osịmde ufọt usọrọ, Jesus edibehe. Enye ọdọk aka temple, ke ebiet emi mme owo ẹdude ke n̄kpaidem ẹban̄a ndyọ ndyọ ukeme unọ ukpep esie. Sia akananam Jesus mîkaha ufọkn̄wed mme rabbi, mme Jew ẹtọn̄ọ ndiyịk ẹte: “Owo emi asan̄a didie ọfiọk n̄wed, ke ini akanam Enye mîkpepke n̄kpọ?”

Jesus anam an̄wan̄a ete, “Ukpepn̄kpọ eke nnọde idịghe Okịm, edi edi eke Andidọn̄ Mi. Edieke owo onyịmede ndinam se Enye amade, owo oro eyefiọk aban̄a se n̄kpepde, m̀mê oto Abasi, m̀mê Ami ntịn̄ ikọ oto Idem Mi.” Ukpepn̄kpọ Jesus ọsọn̄ọ owụhọ ke ibet Abasi. Ntem, ekpenyene ndina in̄wan̄în̄wan̄ nte ke enye oyom ubọn̄ Abasi, idịghe ubọn̄ esiemmọ. Jesus obụp ete, “Nte Moses ikọnọhọ mbufo ibet?” Ke ido nsuannọ, enye ọdọhọ ete: “Baba owo kiet ke otu mbufo inịmke ibet.”

Ekem Jesus obụp ete, “Nsinam mbufo ẹyomde Mi ndiwot?”

Mme owo ke otuowo oro, iso-ọfọn isenowo ke usọrọ emi, ifiọkke iban̄a mme utọ ukeme oro ẹsịnde ndiwot enye. Mmọ ẹkere ẹte ke ikpodụkke-dụk owo ekikere nte ke owo ekededi okpoyom ndiwot utọ utịbe utịbe andikpep oro. Ntre mmọ ẹnịm ke akpanikọ ẹte ke anaedi ibuot ifọnke Jesus ke enye ndikere n̄kpọ ntem. Mmọ ẹdọhọ ete, “Idat anam Fi; anie . . . oyom Fi ndiwot?”

Mme adaiso mme Jew ẹyom ẹwot Jesus, idem okposụkedi ekemede ndidi otuowo ifiọkke iban̄a. Ke ini Jesus akanamde eren kiet okop nsọn̄idem ke usen Sabbath ke isua kiet ye ubak ke mbemiso, mme adaiso oro ẹma ẹdomo ndiwot enye. Ntre Jesus osio unana ifiọk mmọ owụt ke ndibụp mmọ nte: “Edieke owo anade mbobi ke sabbath mbak edibiat ibet Moses; nte mbufo ẹyat esịt ye Ami, koro n̄kanamde owo okop ọyọhọ nsọn̄idem ke sabbath? Ẹkûkpe ikpe nte etiede owo ke enyịn, edi ẹkpe edinen ikpe.”

Mme andidụn̄ Jerusalem, ẹmi ẹfiọkde ẹban̄a se ikotịbede, ẹdọhọ kemi ẹte: “Nte idịghe owo emi ke ẹyom enye ndiwot? Edi sese, Enye ọdọhọ ikọ an̄wan̄wa, mmọ inyụn̄ itịn̄ke baba ikọ kiet inọ Enye. M̀mê ọwọrọ ete ikpọ owo ẹnen̄ede ẹfiọk ẹte owo emi edi Christ?” Mbon Jerusalem ẹmi ẹnam an̄wan̄a ntak emi mmimọ mînịmke ke akpanikọ ite ke Jesus edi Christ: “Nnyịn imọfiọk ebiet emi owo emi otode: edi ke ini Christ edidide, baba owo kiet ifiọkke ebiet emi Enye otode.”

Jesus ọbọrọ ete: “Mbufo ẹfiọk Mi, ẹnyụn̄ ẹfiọk ebiet emi ntode; ndien n̄kedịghe ke odudu Idem Mi, edi Enyeemi ọkọdọn̄de Mi edi ata Abasi, emi mbufo mîfiọkke. Ami mmọfiọk Enye; koro ntode Enye, onyụn̄ edi Enye ọkọdọn̄ Mi.” Ke ọtọ emi mmọ ẹn̄wana ndimụm enye, iso-ọfọn man ẹsịn enye ke ufọk-n̄kpọkọbi mîdịghe man ẹnam ẹwot enye. Edi mmọ ikwe unen koro ini ikemke kan̄a Jesus ndikpa.

Kpa ye oro, ediwak owo ẹbuọt idem ye Jesus, nte mmọ ke akpanikọ ẹkpenyenede ndinam. Kamse, enye ama asan̄a ke enyọn̄ mmọn̄, anam oyobio etre, anam mbufịt inyan̄ odobo, ada uyo ye iyak ifan̄ ọnọ ediwak tọsịn owo udia ke utịbe utịbe usụn̄, anam mbon udọn̄ọ ẹkop nsọn̄idem, anam mbụn̄ọ ­ẹsan̄a, anam nnan ẹkụt usụn̄, anam mbon akpamfia ẹsana, onyụn̄ anam idem mme akpan̄kpa ẹset. Ntre mmọ ẹbụp ẹte: ­“Ke adan̄aemi Christ edidide, nte Enye eyenam idiọn̄ọ ­eke ẹwakde ẹkan se owo emi aka­namde?”

Ke ini mme Pharisee ẹkopde otuowo ẹnemede ẹban̄a n̄kpọ ẹmi, mmọ ye ikpọ oku ­mmọ ẹdọn̄ mme isụn̄utom ẹkemụm Jesus. John 7:11-⁠32.

▪ Ini ewe ke Jesus edibehe ke usọrọ oro, ndien nso ke mme owo ẹtịn̄ ẹban̄a enye?

▪ Ntak emi ndusụk owo ẹkemede ndidọhọ ke idat anam Jesus?

▪ Nso ekikere ke mbon Jerusalem ẹnyene ẹban̄a Jesus?

▪ Ntak emi ediwak owo ẹbuọtde idem ye Jesus?