1991 Ẹsịm 2001 “Akwa Ikan̄ Ukụt”​—⁠Isa.48:10 (Ikpehe 2)

Ẹda En̄wan Ẹdụk Bethel!

Ke February 1998, mbonekọn̄ Sierra Leone ye udịmekọn̄ mme idụt Edem Usoputịn Africa emi ẹkotde ECOMOG ẹma ẹsịn ofụri ukeme man ẹbịn otu mbon en̄wan oro ẹken̄wanade ye ukara ẹsion̄o ke Freetown. Edi n̄kpọ mbọm nditịn̄ ke itiatikan̄ ama owot eyenete nnyịn kiet.

N̄kpọ nte mme asuanetop 150 ẹkefehe ẹkedịbe ke ufọkidụn̄ isụn̄utom ke Kissy ye ke Cockerill. Laddie Sandy, kiet ke otu mme ekpeme okoneyo ke Bethel, ọdọhọ ete: “Ke eyo ama ekenen̄ede ọsọn̄ usen kiet emi ami ye Philip Turay ikekpemede okoneyo, mbon en̄wan RUF iba ẹma ẹdi Bethel ẹdidọhọ iberede usụn̄ inuaotop nnyịn oro ẹsịnde akrasi inọ mmimọ. Nte nnyịn ikefehede man ikedịbe, mmọ ẹma ẹtop ukpọhọde usụn̄ oro ediwak ini. Edi usụn̄ oro ikeberekede, ikonyụn̄ idụkke mmọ ekikere nditop akrasi usụn̄ oro. Mmọ ẹma ẹyat esịt ẹnyọn̄ọ.

“Ke usen iba ẹma ẹkebe, mbon en̄wan oro ẹma ẹsan̄a ye n̄kpọ nte owo 20 oro ẹkebierede ndinam ntịme ẹnyụn̄ ẹnen̄erede ẹkama n̄kpọekọn̄ ẹma ẹfiak ẹdi. Ima isọsọp isian mbonubon Bethel inyụn̄ ifehe ikodụk ufọk idakisọn̄ oro ikodiomide ndidịbe. Nnyịn mbitiaba ikedịbe ke edem ikpọ drọm iba ke n̄kịmn̄kịm idakisọn̄ oro ye ọkpọsọn̄ nyekidem. Mbon en̄wan oro ẹma ẹtop ukpọhọde usụn̄ oro ẹwụbede ẹbe ẹdụk Bethel. Owo kiet ke otu mbon en̄wan ama ofiori ete: ‘Ẹyom Mme Ntiense Jehovah oro ẹyọk mmọ itọn̄.’ Nnyịn ima in̄wịne idịbe do ke ini mmọ ẹkedụn̄ọrede ofụri Bethel ẹyom nnyịn ke hour itiaba. Ke ẹma ẹkebiat n̄kpọ ọyụhọ mmọ, mmọ ẹma ẹtan̄ se mmọ ẹkemade ẹnyọn̄.

“Ima itan̄ n̄kpọ nnyịn ifehe ika ufọkidụn̄ isụn̄utom ke Cockerill—oro edi, akani Bethel emi mîyomke usụn̄ kpa ke efak oro. Otu mbon en̄wan en̄wen ẹma ẹwo nnyịn ke usụn̄. Ikasan̄a ye ọkpọsọn̄ nyekidem ikesịm ufọkidụn̄ isụn̄utom, edi ima ikọm Abasi sia owo mîkowotke nnyịn. Ke ima ikọduọk odudu usen ifan̄, ima ifiak inyọn̄ ikanam Bethel asana.”

Ọfiọn̄ iba ke oro ebede, mbonekọn̄ ECOMOG ẹma ẹkan mbon en̄wan oro ke Freetown, ndien mme isụn̄utom oro ẹkedude ke Guinea ẹma ẹnyọn̄ ẹdi. Edi mmọ ikọfiọkke ke mmimọ ididụhe ibịghi.

Edisobo Kpukpru Odu-Uwem N̄kpọ

Ke December 1998, ke ọfiọn̄ itiaita ẹma ẹkebe, ediwak owo ke ẹkedụk Mbono District “Usụn̄ Uwem Abasi” ke Akwa An̄wambre Freetown. Inikiet inikiet, mmọ ẹma ẹkop sụn̄sụn̄ uyom ọtọmbe, ẹnyụn̄ ẹkụt nte nsụn̄ikan̄ ọwọrọde ke obot. Emi ọkọwọrọ ke mbon en̄wan oro ẹn̄wanade ye ukara ẹfiak ẹdi!

Usen ifan̄ ke oro ebede, ntịme ama afiak ọsọn̄ ubọk ke Freetown. Kọmiti N̄kọk Itieutom ẹma ẹbọ ekpri ubomofụm ke ukpeokụk ẹnọ isụn̄utom 12, mbonubon Bethel 8 oro ẹketode idụt en̄wen, ye mme ọbọpufọk unyịmesịt 5 ẹka Conakry. Usen ita ke oro ebede, ke January 6, 1999, mbon en̄wan oro ẹn̄wanade ye ukara ẹma ẹtọn̄ọ ibak ibak uwotowo oro mmọ ẹkekotde Edisobo Kpukpru Odu-Uwem N̄kpọ. Mmọ ẹma ẹda enyene-ndịk afai ẹdụk Freetown ẹnyun̄ ẹwot n̄kpọ nte mbio obio 6,000. Mbon en̄wan oro ẹma ẹkpok mme owo ubọk ye ukot nte ẹmama, ẹtan̄ ata ediwak nditọwọn̄, ẹnyụn̄ ẹwụri ata ediwak ufọk ke obio.

Ẹma ẹwot Edward Toby, ata edima eyenete, ke ibak ibak usụn̄. Ẹma ẹnọ se ibede mme asuanetop 200 emi idem ekenen̄erede enyek itieidụn̄ ke Bethel m̀mê ke ufọkidụn̄ isụn̄utom ke Cockerill. Nditọete eken ẹkedịbe ke ufọk mmọ. Mme Ntiense oro ẹkedude ke ufọkidụn̄ isụn̄utom ke Kissy, emi odude ke edem usiahautịn obio oro, ẹma ẹnen̄ede ẹyom ibọkusọbọ. Edi ndisan̄a ke obio ekedi edue-ukot akpa-itọn̄. Anie edinyene uko ikọbọ ibọk isọk nditọete emi? Laddie Sandy ye Philip Turay, uko uko nditọete oro ẹsikpemede Bethel okoneyo ẹma ẹsọsọp ẹdọhọ ke iyaka.

Philip ọdọhọ ete: “Ndutịme ama okpon etieti ke obio. Mbon en̄wan oro ẹn̄wanade ye ukara ẹma ẹda ke ediwak itie ke usụn̄, ẹnyụn̄ ẹfiomo mme owo. Ukara ẹma ẹnọ ibet ẹte owo okûwọrọ ọtọn̄ọde ke n̄kanika ita uwemeyo esịm ebe itiaita usenubọk, ntre nnyịn ikekemeke ndika isan̄ nte ikpakade. Ke ima ikasan̄a usen iba, ima isịm ufọkidụn̄ isụn̄utom ke Kissy, edi ẹma ẹsuan kpukpru n̄kpọ ẹnyụn̄ ẹfọp itieidụn̄ oro.

“Ke ini ikodụn̄ọrede n̄kann̄kụk oro, ima ikụt Andrew Caulker, eyenete emi ẹkenọde ata akamba unan ke ibuot. Mbon en̄wan oro ẹma ẹbọp enye ẹnyụn̄ ẹda ekụri ẹkpi enye ediwak itie ke ibuot. Ekedi ata ndyọ ndyọ n̄kpọ ndikụt ke enye ikakpaha edi ama ọbọhọ efehe. Ima isọsọp imen enye ika ufọkibọk, ndien idem ama ọsọn̄ enye sụn̄sụn̄. Nte ini akakade, enye ama anam utom usiakusụn̄ ofụri ini.”

Owo ikowotke ikonyụn̄ inọhọ Mme Ntiense eken unan ke ntak emi ẹkediọn̄ọde mmọ nte mbon oro mîsịnke idem ke mbubehe ukara. Eyenete kiet ọdọhọ ete: “Mbon en̄wan oro ẹkedọhọ nnyịn itebe afia ọfọn̄ ke ibuot inek unek ndiwụt ke ida ye mmimọ. Mmọ ẹma ẹdọhọ nnyịn ẹte: ‘Edieke mbufo ẹsịnde ndinam se idọhọde mbufo, iyesịbe mbufo ubọk m̀mê ukot mîdịghe iwowot mbufo.’ Idem ama enyek mi ye n̄wan mi etieti, ndien nnyịn ima iwọn̄ọde ida ibọn̄ akam ke esịt ite Jehovah an̄wam nnyịn. Akparawa kiet oro ekedide mbọhọidụn̄ nnyịn ama anam se mbon en̄wan emi ẹkedọhọde. Ke ini enye okokụtde se ikọwọrọde nnyịn, enye ama ọdọhọ etubom mbon en̄wan oro ete: ‘Owo emi edi “eyeneka” nnyịn. Enye isisịnke idem ke mbubehe ukara, ntre imọn̄ inek inọ enye.’ Etubom oro ama enyịme onyụn̄ ọkpọn̄ nnyịn, ndien nnyịn ima ifehe inyọn̄ ufọk.”

Obio ama odobo ke esen esen usụn̄, nditọete ẹnyụn̄ ẹda mbufiọk ẹtọn̄ọ ndinịm mme mbono esop nnyụn̄ n̄wọrọ an̄wautom. Mme asuanetop ẹma ẹsidian kad mbenọfọn̄ mbak mme ẹkpeme-usụn̄ ẹdifịna mmọ. Nditọete ẹma ẹkpep usọ editọn̄ọ nneme Bible ke ini ẹdade ke anyan udịm man ẹbe ke itie oro ẹkpemede usụn̄.

Kpukpru n̄kpọ ẹma ẹnana ke obio, ntre n̄kọk itieutom Britain ẹma ẹnọ n̄kpọ un̄wam oro ekedide katọn 200 ẹdi. Billie Cowan ye Alan Jones ẹma ẹsan̄a ke ubomofụm ẹto Conakry ẹdi Freetown man ẹda n̄kpọ un̄wam emi ẹbe nsio nsio itie ukpeme usụn̄. N̄kpọ un̄wam oro ama esịm Bethel mbemiso ini oro ukara ọkọdọhọde ẹkûsan̄a ke obio. James Koroma ama esida n̄kpọ aka Conakry onyụn̄ ada mme n̄wed ye mme n̄kpọ eken ọnyọn̄ edi. Ẹma ẹnọ ndusụk n̄wed ukpep Bible emi ẹsọk mme asuanetop oro ẹkedude nsannsan ke Bo ye Kenema.

Ke August 9, 1999, mme isụn̄utom ke Conakry ẹma ẹtọn̄ọ ndifiak nnyọn̄ Freetown. Ke 2000, mbonekọn̄ Britain ẹma ẹdi ẹdibịn mbon en̄wan oro ẹsion̄o ke Freetown. Ẹkesụk ẹn̄wan̄wana ntomo ntomo ke ndusụk itie, edi ke January 2002, ẹma ẹdọhọ ke ekọn̄ okụre. Ekọn̄ oro ekebịghide isua 11 do ama ada uwem owo 50,000, obiomo owo 20,000 ndo, owụri ufọk 300,000, onyụn̄ anam owo miliọn kiet ye ubak ẹnana ebietidụn̄.

N̄kpọ eketie didie ye esop Jehovah? Jehovah ama ekpeme onyụn̄ ọdiọn̄ esop esie. N̄kpọ nte owo 700 ẹkena baptism ke ini ekọn̄ oro. Ata ediwak Mme Ntiense ẹma ẹfehe ẹkpọn̄ obio ekọn̄ oro, edi mbufa mme asuanetop ke Sierra Leone ẹma ẹwak nte mbahade iba ke ofụri ibat mme asuanetop oro ẹkedude. Ibat mme asuanetop ke Guinea ama ọdọk utịm ikata! Ata akpan n̄kpọ edi ke ikọt Abasi ẹma ẹsọn̄ọ ẹda ye Jehovah. “Akwa ikan̄ ukụt” ikabiatke ima ye edidianakiet mmọ nte mme Christian, edi mmọ ẹma “ẹka iso ye unana edikpa mba ndikpep nnyụn̄ ntan̄a eti mbụk.”—Isa. 48:10; Utom 5:42.