Eyenọwọn̄ Emi Ekedide Owoekọn̄ Akabade Asiakusụn̄ Ofụri Ini

N̄KEDI isua 16 ke ini mbon emi ẹsin̄wanade ye ukara ẹkenyịkde mi ẹsịn ke udịmekọn̄ mmọ. Mmọ ẹma ẹnọ mi n̄kpọsọn̄ ibọk ye n̄kpọsọn̄ mmịn, ndien n̄kesiwak ndin̄wana ekọn̄ ke ini ibọk ọdọkde mi ibuot. Mma n̄n̄wana ediwak ekọn̄ nnyụn̄ nnam enyene-ndịk ibak. Mmenen̄ede ntua n̄kpọfiọk ndikanam emi.

Usen kiet, Ntiense kiet emi edide akanieren ama edikwọrọ ikọ ke itieidụn̄ nnyịn. Ata ediwak owo ẹkesifefehe nnyịn ẹnyụn̄ ẹse nnyịn ke ndek, edi enye ama esidi edikwọrọ ikọ ọnọ nnyịn. Ke ini enye okokotde mi mbono esop, mma nnyịme nditiene n̄ka. Ntịghi se ẹkenemede ke mbono esop oro, edi mmeti ke ẹma ẹnen̄ede ẹdara mi.

Ke ini ekọn̄ ekenen̄erede ọsọn̄ ubọk, n̄kekemeke ndisobo aba ye Mme Ntiense. Ekem mma nda unan idiọk idiọk, ẹma ẹnyụn̄ ẹnọ mi n̄ka obio emi udịmekọn̄ nnyịn akakarade n̄kodu do tutu idem ọsọn̄ mi. Mbemiso ekọn̄ oro okokụrede, mma mfehe n̄ka obio emi ukara akakarade nnyụn̄ ntiene nnyịme ndiyak ikan̄ mi nnọ, n̄kpọn̄ ekọn̄, n̄kabade ntie nte kpukpru owo eken ke obio.

Mma nnen̄ede nyom ndifiọk n̄kpọ mban̄a Abasi. Mma nsika ederi ufọkabasi Pentecostal, edi mbon ufọkabasi oro ẹkesikot mi Satan ke otu mmọ. Ntem, mma ntọn̄ọ ndiyom Mme Ntiense Jehovah. Ke mma n̄kokụt mmọ, mma ntọn̄ọ ndikpep Bible nnyụn̄ ndụk mbono esop. Ke ini n̄ketịn̄de ibak oro n̄kesinamde nnọ nditọete, mmọ ẹma ẹkot ikọ Jesus emi ọkọdọn̄de mi ẹsịt ẹnọ mi. Ikọ oro ọdọhọ ete: “Mbon emi idem ọsọn̄de isiyomke abiausọbọ, edi mbon oro idem mîsọn̄ke ẹsiyom. . . . N̄kedịghe ndikot ndinen owo, edi n̄kedi ndikot mme anamidiọk.”—Matt. 9:12, 13.

Ikọ emi ama enen̄ede ọdọn̄ mi esịt! Mma nyak afaka mi nnọ eyenete emi ekesikpepde mi Bible nnyụn̄ ndọhọ enye nte: “N̄kenịm afaka emi ndida nyan̄a idem edieke ẹyomde ndisio mi usiene. Edi idahaemi mfiọkde mi ke Jehovah ye Jesus ẹma mi, nyomke enye aba.”

Nditọete ẹma ẹkpep mi nte ẹkotde n̄wed ẹnyụn̄ ẹwetde n̄kpọ. Ke akpatre, mma nna baptism nnyụn̄ ntọn̄ọ utom usiakusụn̄ ofụri ini. Mfịn, ke ini n̄kwọrọde ikọ nnọ n̄kani mbon oro ẹkesitienede ẹn̄wana ye ukara, mmọ ẹsidọhọ ke imokpono mi nte nnamde ukpụhọde ke uwem mi. Mma n̄kam n̄kpep Bible ye akwa owo emi ekesede n̄kpọ aban̄a udịmekọn̄ emi n̄kodude.

Mma mbon nditọ ita ke ini n̄kedide owoekọn̄. Ke mma n̄kọbọ akpanikọ, ama ọdọn̄ mi ndin̄wam mmọ ẹtiene ẹfiọk Abasi. Adat mi esịt sia owo iba ke otu mmọ ẹma ẹnyịme! Akpan mi edi asiakusụn̄ unọ un̄wam idahaemi, udọ onyụn̄ edi asuanetop oro mînaha baptism kan̄a.