“Abasi Akpanikọ” Esinam Se Enye Aduakde Kpukpru Ini

1. Psalm 31:2-5 owụt ke nso ikeme ndinam ibuọt idem ke Jehovah?

ERERIMBOT idụn̄de mi Satan akara. Nsu, abian̄a, ye nditọ owo edem ke isọn̄ ọyọyọhọ. Ekeme ndisọn̄ nnyịn ndidiọn̄ọ owo emi ikpeberide edem. Ediwak mbon mbubehe ẹsisịn n̄kari ke mbubehe mmọ man eke mmọ oro asan̄a ọfọn akan eke mbon en̄wen emi ẹnamde kpa ukem mbubehe oro. Mme asuanetop n̄kpọ-urua isitịn̄ke ofụri akpanikọ iban̄a se mmọ ẹnyamde ẹnọ mme owo. Ndusụk ini, idem mme akpan ufan ndusụk owo isinamke se mmọ ẹken̄wọn̄ọde. Edi nnyịn ndidiọn̄ọ ke imekeme ndibuọt idem ye Jehovah kpukpru ini esisọn̄ọ nnyịn idem! Enye edi “Abasi akpanikọ.” (Kot Psalm 31:2-5.) Tutu amama Jehovah isisụho nsu. Kpukpru se enye etịn̄de ẹsidi akpanikọ. Se ededi emi Jehovah etịn̄de onyụn̄ anamde edi se inịmde inyụn̄ iberide edem.

2. Nso ke idineme ke ibuotikọ emi?

² Ke ibuotikọ emi, iyom ndibem iso nneme ndusụk ntak emi ikpọbuọtde idem ye Jehovah ke ofụri esịt nnyịn. Ekem iyeneme nte Abasi akpanikọ edisobode idiọk ererimbot Satan emi, ye se Enye anamde idem idaha-emi man se Enye aduakde osu. Se idinemede emi ayan̄wam nnyịn ineme akpanikọ emi aban̄ade Jehovah inọ mbon en̄wen uko uko, iyakke ndịk ndomokiet anam nnyịn.

NTAK EMI IKEMEDE NDIBUỌT IDEM KE ABASI AKPANIKỌ

3. Ntak emi ikemede ndinen̄ede mbuọt idem ke Jehovah?

³ Imekeme ndibuọt idem ye Jehovah sia enye edi Andibot. Enye okobot enyọn̄ ye isọn̄, enye onyụn̄ ọnọ kpukpru odu-uwem n̄kpọ uwem. (Gen. 1:1; Ps. 36:9; Edi. 4:11) Kpa enye enịm kpukpru odu-uwem n̄kpọ uwem. Enye okobot mme n̄kpọ utọ nte ofụm ye mmọn̄ emi ẹnamde mme odu-uwem n̄kpọ oro ẹka iso ẹdu uwem. Kpukpru n̄kpọ ke ekondo ẹsịne enye ke ubọk, ẹdinyụn̄ ikaka iso isịne enye ke ubọk. Andibot nnyịn enyene ọniọn̄ akan, enye onyụn̄ enyene odudu akan. Ntre imekeme ndinen̄ede nnịm ke enye eyeteme nnyịn nnennen usụn̄ emi ikpodude uwem onyụn̄ anam ini iso nnyịn ọfọn.

4. Inam didie idiọn̄ọ ke Jehovah ama nnyịn?

⁴ Imekeme ndibuọt idem ye Jehovah sia enye ama nnyịn. Jehovah okobot mme owo sia enye okoyom mmọ ẹdu uwem ẹnyụn̄ ẹkop inem uwem nte enye. Jehovah akada mme ikọ emi etịn̄ uduak esie: “Yak nnyịn inam owo isịn ke mbiet nnyịn, etie nte nnyịn.” (Gen. 1:26) Enye ama ọnọ nnyịn ifụre ndibiere se iyomde ndibiere. Enye ama ọnọ nnyịn ediye ebietidụn̄, oro edi isọn̄ emi idude mi. (Ps. 115:16) Enye ama onyụn̄ ọnọ akpa ete ye eka nnyịn ata eti utom ẹnam. Utom oro ekedi mmọ ndinam ebietidụn̄ oro akabade edi Paradise. (Gen. 1:28; 2:15) Enye ama ọnọ mmọ ata ediwak nti udia, obot nsio nsio eto, ikọn̄, ye flawa, onyụn̄ obot mme unam, ye ediwak n̄kpọ eken ọnọ mmọ. Enye akanam ntre sia enye okoyom mmọ ẹkop inemesịt ẹnyụn̄ ẹkop inem uwem. Imenen̄ede ikụt ke kpukpru se Jehovah anamde emi owụt ke “ima-mfọnido [esie] ododu ke nsinsi nsinsi.”​—Ps. 103:17.

5. (a) Didie ke Jehovah akanam se enye eketịn̄de kpa ye ofụri editịm emi Devil ekesịnde man ọsọhi ubonowo efep? (b) Nso idi ndusụk n̄kpọ emi Abasi eketịn̄de onyụn̄ anamde? (Se ekebe emi “Se Iwụtde ke Abasi Esitịn̄ Akpanikọ Kpukpru Ini.”)

⁵ Imekeme ndibuọt idem ye Jehovah sia enye esinam kpukpru se enye etịn̄de. Jehovah ikobotke ererimbot emi “ke ikpîkpu,” edi ‘okobot enye man ẹdụn̄ ke esịt.’ (Isa. 45:18, 19) Ini Adam ye Eve ẹkesọn̄de ibuot ye Abasi, Abasi ama ebiere n̄kpa ọnọ mmọ. Eketie nte ke se Abasi akaduakde iditịbeke aba. Edi Jehovah edi enye emi esinamde kpukpru se enye ọn̄wọn̄ọde. (Isa. 46:10, 11) Uduak Jehovah ekedi yak ndinen owo ẹdu ẹyọhọ isọn̄ emi. Se iketịbede oro ikakpanke uduak Jehovah. Oro akanam Jehovah ayak Adam ye Eve ẹnyene nditọ. Enye ama onyụn̄ ọnọ ikpọn̄-ikpọn̄ edibon Eyen Esie edikpa afak nditọ Adam onyụn̄ anam mmọ ẹnyene idotenyịn ndidu uwem ke nsinsi.​—John 3:16.

ABASI AKPANIKỌ ESINAM SE ENYE ADUAKDE

6. Ke Adam ye Eve ẹma ẹkesọn̄ ibuot ke In̄wan̄ Eden, Jehovah ọkọdọhọ ke nso iditịbe?

⁶ Owo emi akanamde Adam ye Eve ẹsọn̄ ibuot ye Abasi ekedi “akani urụkikọt, enye emi ẹkotde Devil ye Satan.”a (Edi. 12:9; Gen. 3:4, 5; John 8:44) Jehovah ama ebiere ikpe ọnọ enye, ọkọdọhọ ke nte ini akade, ke ẹyesobo enye. (Gen. 3:15) Edi mbemiso ẹsobode enye, mbon emi ẹditienede Satan ẹyewak ẹyenyụn̄ ẹnam n̄kpọ nte enye. Edi ndusụk owo ẹyesọn̄ọ ẹda ye Jehovah.

7. Mmanie ẹtiene Devil, ndien nso ididi utịt mmọ?

⁷ Ndusụk mbon emi ẹtienede Satan kpa Devil ẹdi mme angel emi ẹkesọn̄de ibuot ye Abasi, mbon eken ẹdi mme owo emi mîyomke ndikop item Abasi. Ke ntak emi mmọ ẹbiọn̄ọde uduak Abasi, mmọ ẹkabade ẹdi ubak mfri Satan. Edi edimek ini Abasi ama ekem, ẹyesobo Satan ye mbon emi ẹtienede enye.​—Dan. 2:44; Rome 16:20.

8. Nso ke Jesus akanam ke 1914? (Se mme ndise n̄ko.)

⁸ Nso inam itetịm inịm ke Abasi oyosobo Satan ye mbon ibak emi ẹtienede enye nte Abasi akaduakde? Ke 1914, Jesus ama ọtọn̄ọ ekọn̄ ye Satan kpa Devil ye mme demon esie onyụn̄ osion̄o mmọ ọduọn̄ọ ke isọn̄. (Edi. 12:7-9) Kpa ye emi ẹken̄wanade ekọn̄ oro ke heaven, mbon emi ẹdude ke isọn̄ ẹbọ ufen ekọn̄ oro. Kop mi se Bible etịn̄de: “Mbọm isọn̄ ye inyan̄, koro Devil omosụhọde etiene mbufo, enye asan̄a ye akwa iyatesịt, sia enye ọfiọkde ete ini imọ edi ibio.” (Edi. 12:12) Tọn̄ọ ke 1914, Satan ọwọn̄ọde inua ikan̄ esie ese isọn̄. Ndien ke ntak oro edi eyo esiere, n̄kpọ ọdiọk ke ererimbot akan nte ekedide. Imenen̄ede ikụt ke isọn̄ enyene mbọm! Edi idibịghike, Jesus ”‏[oyokụre] edikan esie.”‏ Ini oro, ẹyesobo mbon emi ẹtienede Satan ẹfep ndien Satan idikarake ererimbot emi aba. Ndien nte ini akade, ẹyesobo enye n̄ko ẹfep. (Edi. 6:2) Jesus ayanam kpukpru owo ẹkụt ke Satan edi ibak, ndien ke enye akasuan nsu aban̄a Jehovah. (Ps. 45:4-6) Kpukpru owo ẹyediọn̄ọ ke Jehovah edi Abasi akpanikọ!​—Ezek. 38:23.

Akpa ekọn̄ ererimbot: U.S. National Archives photo; bọmb: USAF photo; ini udọn̄ọ atarade asuana: blvdone/stock.adobe.com; ntịme: inhauscreative/E+ via Getty Images

ABASI AKPANIKỌ ATAN̄ KPUKPRU MBON EMI ẸMADE AKPANIKỌ OBOK

9. Mmanie ke Jehovah atan̄ obok mfịn?

⁹ Idaha-emi, Jehovah ke atan̄ “kpukpru n̄kpọ [ọdọn̄] ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.” (Eph. 1:10) “Mme n̄kpọ eke ẹdude ke heaven” ada aban̄a mbon emi ẹyetde aran, emi Jehovah emekde yak ẹkekara ye Christ ke heaven. “Mme n̄kpọ eke ẹdude ke isọn̄” ada aban̄a mbon emi ẹdidude uwem ke nsinsi ke Paradise ke isọn̄. Mbon emi ẹdikade heaven ye mbon emi ẹdidude ke isọn̄ ke ẹsịn ifịk ẹyarade mme nsu Satan ẹnyụn̄ ẹn̄wam mbon emi ẹnyenede eti esịt ẹdiọn̄ọ akpanikọ.

10. Didie ke Jehovah an̄wam mme owo ẹdiọn̄ọ akpanikọ? (Ediyarade 14:6, 7)

¹⁰ Akananam owo ikwọrọke ikọ nte ẹkwọrọde idaha-emi ke ofụri mbụk ubonowo. Utom ukwọrọ-ikọ oro ke Jehovah ada atan̄ mbon emi ẹmade akpanikọ obok. (Kot Ediyarade 14:6, 7.) Kpa ye emi edide ke Jehovah ada mme owo ọdọhọ mbon en̄wen eti mbụk, mme angel ẹnyene ubọk ke ndin̄wam mbon emi ẹnyenede eti esịt ẹdụk esop Abasi. Utom ukwọrọ-ikọ emi ayarade nsu emi Akwa Babylon ekpepde. Ke ata ediwak isua idaha-emi, Devil ada Akwa Babylon, oro edi kpukpru nsunsu ido ukpono ke ofụri ererimbot asuan nsu aban̄a Jehovah. (Edi. 18:2, 4) Idibịghike ẹyesobo kpukpru nsunsu ido ukpono ẹfep, ndien kpukpru mbon emi ẹmade Abasi akpanikọ ẹyenọ enye ubọn̄ emi enen̄erede odot ye enye.​—Edi. 17:16.

11. Didie ke ikeme ndidiọn̄ọ mbon emi ẹtuakde ibuot ẹnọ Jehovah nte Jehovah oyomde?

¹¹ Mbon emi ẹmade akpanikọ ẹto nsio nsio idụt, nte ẹnyụn̄ ẹnamde n̄kpọ ke edem mmọ edi nsio nsio. Ndusụk ẹdi mme aka n̄wed, ndusụk idịghe; ndusụk ẹdi mme imọ owo, ndusụk idịghe; ye mme ntre ntre eken. (Edi. 7:9, 10) Ini mmọ ẹkekopde “eti mbụk,” mmọ ẹma ẹdiọn̄ọ ke akpanikọ edi oro ndien mmọ ẹma ẹnyịme nditiene nsịne ke otu ikọt Jehovah sia ekenenem mmọ ndinam ntre. (Mark 13:10) Edi eyo esiere, ẹtetịm ẹdiọn̄ọ mbon emi ẹtuakde ibuot ẹnọ Abasi nte Abasi oyomde, ye mbon emi mînamke ntre. Prọfet Malachi ama ọdọdọhọ ete: “Mbufo ẹyetọn̄ọ ntak ẹkụt ukpụhọde ke ufọt edinen owo ye idiọkowo, ye ke ufọt owo emi anamde n̄kpọ Abasi ye owo emi mînamke n̄kpọ esie.” (Mal. 3:18) Mme asan̄a-utom Jehovah ẹda nte mmọ ẹdude uwem ye utom ukwọrọ-ikọ emi mmọ ẹnamde ẹwụt ke mmimọ ituak ibuot inọ Abasi akpanikọ.

12. Didie ke utom ukwọrọ-ikọ an̄wam uduak Jehovah yak osu?

¹² Ke ini ikwọrọde “eti mbụk obio ubọn̄,” ikop uyo Jesus, kpa ke ukem ini oro, imanam prọfesi Bible osu. (Matt. 24:14; 28:18-20) Ke ntak utom ukwọrọ-ikọ, mme owo ke nsio nsio itie ke ofụri ererimbot ke ẹkabade ẹdi mbet Christ ẹnyụn̄ ẹnyene idotenyịn ndituak ibuot nnọ Abasi akpanikọ ke nsinsi. Edi ata n̄kpọ ukpono nnyịn nditiene nnyene ubọk ke ndinam uduak Jehovah osu!

IMEKEME NDINEN̄EDE NNỊM KE JEHOVAH AYANAM SE ENYE ỌN̄WỌN̄ỌDE

13. Mmanie ke Satan enen̄ede ọkọbọ, ndien ntak-a?

¹³ Satan kpa Devil ayat esịt idiọk idiọk sia enye ọdiọn̄ọ ke “ini imọ edi ibio” mbemiso ẹsobode ererimbot esie emi. (Edi. 12:12, 13) Mbon emi Satan enen̄erede ọkọbọ ẹdi mbon emi Jehovah emekde yak ẹkekara ke Obio Ubọn̄ Abasi. Mmọ ẹdi mbon emi “ẹnịmde mme ewụhọ Abasi ẹnyụn̄ ẹnyenede utom editie ntiense mban̄a Jesus.” (Edi. 12:17; 14:12) Satan ọkọbọ n̄ko owo ekededi emi adade ye mmọ onyụn̄ an̄wamde mmọ anam utom emi mmọ ẹnamde.

14. Nso iditịbe Satan ama emen en̄wan etiene ikọt Jehovah? (Se ndise n̄ko.)

¹⁴ Ke ẹma ẹkesobo Akwa Babylon, mme isụn̄utom Satan ẹyedomo ndisobo ikọt Jehovah mfep. Enye oro edida ikesịm ekọn̄ Armageddon. (Edi. 16:13, 14, 16) Jesus ye udịmekọn̄ emi ẹdude ke heaven ẹyenyan̄a mbon emi ẹtuakde ibuot ẹnọ Jehovah. Ndien ẹyesobo kpukpru n̄kpọ eken emi osụhọde, emi asan̄ade n̄kpọ ye ererimbot Satan emi. (Edi. 19:19-21) Kpukpru mbon nsu, mbon ibak, ye mbon abian̄a ididụhe aba. (Edi. 21:8) Kpukpru owo ẹyediọn̄ọ ke Jehovah esinam nnennen n̄kpọ kpukpru ini, esinyụn̄ etịn̄ akpanikọ kpukpru ini.

15. Nso ikeme ndinam inen̄ede inịm ke mme n̄kpọ emi Jehovah ọn̄wọn̄ọde ndinam ke ini iso ẹyetịbe? (Isaiah 65:16, 17) (Se ndise n̄ko.)

¹⁵ Mme owo ke ererimbot mfịn ẹka iso ẹn̄wana ye idemmọ idaha-emi akan nte akanam edide, ẹnyụn̄ ẹsu nsu ẹnọ kiet eken idaha-emi akan nte akanam edide. Edi Jehovah an̄wam mme asan̄a-utom esie ẹka iso ẹdiana kiet. Emi idodu mi, Jehovah ke atan̄ mme owo emi ẹmade akpanikọ obok. Idụhe se ikemede ndikpan Jehovah ndidiọn̄ ikọt esie ye se mmọ ẹnamde ẹnọ enye. (Kot Isaiah 65:16, 17.) Imekeme ndinen̄ede nnịm ke mme n̄kpọ emi Jehovah ọn̄wọn̄ọde ndinam ke ini iso ẹyetịbe. Ntak-a? Kop se apostle Paul okosiode ọdọhọ nnyịn mi ke Rome 8:38, 39: “N̄kpa m̀mê uwem m̀mê mme angel m̀mê mme ukara m̀mê mme n̄kpọ eke ẹdude ke emi m̀mê mme n̄kpọ eke ẹdidide m̀mê mme odudu m̀mê uniọn̄ m̀mê utụn̄ọ m̀mê edibotn̄kpọ efen ekededi idikemeke ndidian̄ade nnyịn ke ima Abasi oro odude ke Christ Jesus Ọbọn̄ nnyịn.”

16. Ntak emi ọbuọtde idem ye Jehovah ke ofụri esịt fo?

¹⁶ Imenyene kpukpru ntak ndibuọt idem ye Jehovah emi edide Abasi akpanikọ. Enye edi Andibot. Enye ama nnyịn eti-eti. Ibat mbon akwa otu-owo ke enen̄ede ọtọt nte mme owo ke kpukpru idụt ẹdide ẹdituak ibuot ẹnọ Jehovah. (Isa. 60:22; Zech. 8:23) Imọdiọn̄ọ ke Jehovah ayanam kpukpru se enye ọn̄wọn̄ọde, ndien ke idibịghike Jehovah ọmọn̄ osobo Satan man ererimbot emi ọbọhọ kpukpru nsu emi Satan osude. Ibọn̄ ukem akam emi David ọkọbọn̄de ete: “Itoro enyene Jehovah Abasi, . . . emi ikpọn̄-ikpọn̄ anamde mme utịbe utom. Itoro onyụn̄ enyene ubọn̄ ubọn̄ enyịn̄ esie ke nsinsi, ndien yak ubọn̄ esie ọyọhọ ke ofụri isọn̄.”​—Ps. 72:18, 19.