Jehovah Ọnọ Mi Ukpep Toto ke Uyen

Mbemiso n̄kade iso ke se iketịbede, yak ntọn̄ọ ke ntọn̄ọ nnọ mbụk mi. N̄kamana ke Calgary ke Canada ini ẹken̄wanade ọyọhọ ekọn̄ ererimbot iba. Mbemiso esịmde 1950, ekpri akparawa kiet emi ekedide asiakusụn̄ ama edikọn̄ usụn̄ ufọk nnyịn. Enye ekekere Donald Fraser, ndien eka mi ama enyịme ndikpep Bible. Eka mi ama enen̄ede ama se enye ekekpepde ke Bible, edi ke ntak idiọk udọn̄ọ emi enye ọkọdọn̄ọde, enye ikekemeke ndinen̄ede nsịn idem nnam n̄kpọ ke esop. Kpa ye oro, enye ama osụk ana baptism ke 1950. Edi ekedi ata n̄kpọ mbọm sia ikesịmke isua iba tọn̄ọ enye akana baptism, enye ama akpa. Kpa ye emi ete mi mîkedịghe Ntiense Jehovah ini oro, enye ama enyịme yak Mme Ntiense Jehovah ẹbụk eka mi.

Ke usen ifan̄ ama ekebe tọn̄ọ ẹkebụk eka mi, akamba sista kiet emi ekekerede Alice ama okot mi mbono esop. Enye ekedi eyenete emi ẹyetde aran. Nte enye akasan̄ade ọdiọn̄ọ mi ekedi ke mma nsitiene eka mi n̄ka mbono esop utịturua ini idem ekesiyakde eka mi aka. Mma mbụp ete mi m̀mê mmekeme ndika. Enye ama enyịme onyụn̄ ebiere nditiene ndi “inikiet kpọt” man edikọm brọda emi ọkọnọde utịn̄ikọ emi ẹkedade ẹbụk eka mi. Okoneyo oro, ẹma ẹnịm Ufọkn̄wed Utom Ukara Abasi ye Esoputom. Akpa mbono esop emi ete mi akakade ekedi oro, ndien mbono esop oro ama enen̄ede enem enye. Enye ke okosụk ọbọ ukpep nte enye ekemede ndinọ utịn̄ikọ an̄wan̄wa, ndien se enye okokopde ke mbono esop oro ama akpa enye idem. Ete mi ama ebiere ndisika mbono esop enye oro kpukpru urua. Ndien sụn̄sụn̄ sụn̄sụn̄, enye ama ọtọn̄ọ ndisika mme mbono esop eken.

Ke eyo oro, owo emi ekesisede aban̄a Ufọkn̄wed Utom Ukara Abasi ekesitọn̄ọ mbono esop ke ndikot enyịn̄ nditọ-ete emi ẹkesịnde enyịn̄ ke ufọkn̄wed oro, ndien mmọ owo kiet kiet ẹyebọrọ ẹte, “Ami mi.” Okoneyo usen kiet, mma ndọhọ yak ẹtiene ẹkot enyịn̄ mi ke mbono esop urua en̄wen. Brọda oro ama ọkọm mi ima ima, edi ikobụpke mi m̀mê se n̄kọdọhọde yak ẹnam oro an̄wan̄a mi.

N̄kọdiọn̄ọke ke se n̄kọdọhọde yak ẹnam oro ọkọwọrọ yak ẹsịn mi enyịn̄ ke ufọkn̄wed oro, n̄kukụre n̄kpọ emi n̄koyomde ekedi yak ẹnyụn̄ ẹkot enyịn̄ mi. Urua emi eketienede, ẹma ẹkot enyịn̄ mi, ndien mma mbọrọ uko uko nte, “Ami mi.” Ke mbono esop ama akasuana, nditọ-ete ẹma ẹdikọm mi ima ima. Ke urua ifan̄ ama ekebe, ẹma ẹnọ mi utịn̄ikọ emi n̄ketịn̄de mban̄a ke ntọn̄ọ ntọn̄ọ ibuotikọ emi.

Ndịk ama anam mi. Ini oro, utịn̄ikọ emi ẹkesinọde nditọ-ufọkn̄wed ekesidi minit itiokiet esịm itiaita. Ndien edikot Bible ikesidụhe. Ete mi ama an̄wam mi ntịm utịn̄ikọ oro, onyụn̄ anam nnanam n̄wụt nte ndikọnọde utịn̄ikọ oro utịm ike 20 mbemiso esịmde usen emi nnọde utịn̄ikọ oro. Ekem owo emi ekesede aban̄a ufọkn̄wed oro ama ọnọ mi ata eti item. Ke ofụri isua emi ebede mi, Jehovah ada ete mi, nditọ-ete irenowo ye iban emi ẹdiọn̄ọde ndikpep owo n̄kpọ, ye esop Esie ọnọ mi ukpep.

JEHOVAH AKA ISO ỌNỌ MI UKPEP

Alice emi mma n̄ketetịn̄ mban̄a ọkọnọ mi ukpep ini ntọn̄ọde-tọn̄ọ ndikwọrọ ikọ. Ke eyo oro, ẹkesidọhọ ikot itie N̄wed Abasi ita inọ enyene-ufọk ndien ekem inọ enye n̄wed. Ke ini ekemde ini ami ndikwọrọ ikọ nnọ enyene-ufọk, Alice ayasiak enyịn̄ esie, ọtọn̄ọ nneme, ekem ọdọhọ mi n̄kot akpa itie N̄wed Abasi. Mma n̄kot mma, nyaka iso ke nneme oro, n̄kot udiana itie N̄wed Abasi ye ọyọhọ itie N̄wed Abasi ita nnọ enyene-ufọk, ekem nnọ enye n̄wed. Nte ini akade, mma n̄kpep nte n̄kpọtọn̄ọde nneme ye owo ke idemmi. Esisịt ini mbemiso esịmde 1955, ete mi ama ana baptism, ndien ama aka iso ekpep mi nte n̄kpọkwọrọde ikọ. Sia enye ọkọbọkde mi ikpọn̄, enye ama anam ofụri se enye ekekeme man an̄wam mi mma Jehovah. Enye ikesidaha n̄kpọ esop Abasi ibre mbre. Mma ndiọn̄ọ kpukpru ini ke imọn̄ idụk kpukpru mme mbono esop inyụn̄ ika ukwọrọ-ikọ ke mme utịturua.

Ini n̄kakade ufọkn̄wed, mma mfọn ekpri, edi idịghe nte ẹdọhọ ke mma ndiọn̄ọ n̄wed eti-eti. Kpa ye oro, ndusụk n̄kpọ emi n̄kekpepde ke isua 12 emi n̄kakade n̄wed an̄wam mi ke ofụri eyo-uwem mi. Ke uwụtn̄kpọ, mma n̄kpep ata ediwak n̄kpọ mban̄a ibat ye Ikọmbakara. Nte n̄kekpepde n̄kpọ mban̄a Ikọmbakara ye ndiwet mme mbụk an̄wam mi ke utom emi nnamde nnọ Abasi idaha-emi. Nnam utom ye Itie-Utom Uwetn̄wed.

Mme owo ẹsiwak ndibụp mi ntak emi mmade ikwọ. Ete ye eka mi ẹma ẹsima ikwọ. Ini n̄kedide isua itiaba, mma ntọn̄ọ ndikpep ndibre piano ke ekpri ini, edi owo emi ekekpepde mi ndibre piano ekekere ke mfọnke ke n̄kpọ ubre piano. Enye ama ọdọhọ ete mi ke imọ ikere yak n̄kûkpep aba. Mmọdiọn̄ọ ntak eketiede ntre. Ini oro, ikenen̄ekede idọn̄ mi ndikpep ndibre piano.

Ke ọfiọn̄ ifan̄ ama ekebe, ete mi ama oyom titia en̄wen ọnọ mi. Isan̄ enye emi, n̄kekpep ndibre piano nnyụn̄ n̄kwọ ikwọ, ndien mma n̄kụt ibuot. Ini n̄kedide eyenọwọn̄, uyo ikwọ mi ama esinem eti-eti ndien mma nnyụn̄ n̄kan ndusụk mbuba ukwọ ikwọ. N̄kekpep ikwọ man n̄kabade ndi titia emi esikpepde mbon en̄wen ikwọ man nnyene okụk nse mban̄a idemmi nnam utom usiakusụn̄. Edi mma ndikụt ke oro ayanam mbiat ata ediwak ini mi n̄kpep n̄kpọ mban̄a ikwọ nnyụn̄ ntịm idem nnọ udomo. Ntre, n̄kekpepke n̄kpọ aba mban̄a ikwọ, mma nnyụn̄ nsịn n̄wed man ndi asiakusụn̄ ofụri ini. Se ntịn̄de emi eketịbe ke 1963.

MMA NNYENE EDIWAK EDIDIỌN̄ KE NTAK EMI N̄KASIAKDE USỤN̄

Ke mma n̄kasiak usụn̄ ke isua kiet, ẹma ẹmek mi akpan asiakusụn̄ ẹnyụn̄ ẹnọ mi n̄ka Kapuskasing ke Ontario. Brọda kiet emi ikanamde usiakusụn̄ ntre ekekere Daniel Skinner, ndien enye ama enen̄ede ọsọn̄ọ mi. Enye ama ekpep mi ata ediwak n̄kpọ aban̄a utom esop. Ini n̄kedide isua 20, ẹma ẹmek mi ẹsịn ke Kọmiti Utom Esop. Ntre, akana n̄kpep ediwak n̄kpọ. Enem mi nte esop Abasi ẹtịn̄de ẹfiak ẹtịn̄ idaha-emi yak ẹnọ n̄kparawa owo ukpep. Edieke mmọ ẹsịnde idem ẹnam se ẹkpepde mmọ, Jehovah ekeme ndida mmọ nnam n̄kpọ idem ke ini mmọ ẹdide uyen!

Ndusụk ini ama esisọn̄ ndidụn̄ ke Kapuskasing. Ke ini etuep, ama esibịt n̄kpa n̄kpa, edi ndusụk usen ama esifiak osio urua ekpri. Ami ye Dan ima isiwak ndisan̄a n̄ka kpukpru itie. Edi kiet ke otu edidiọn̄ emi nnyenede ke utom akpan asiakusụn̄ emi nnamde edi ke mma ndisobo sista kiet emi ekerede Linda Cole. Enye ekedikabade edi n̄wan mi.

Linda ama esisịn idem ọkwọrọ ikọ, enye ama onyụn̄ enyene ediwak owo emi enye ekesifiakde aka ebịne. Enye ama esitat ubọk ọnọ owo n̄kpọ, ọfọn ido, esinyụn̄ ama ndidu ye mme owo. Eka esie ekekere Goldie; sista oro ama ama Abasi. Ete esie ekekere Allen. Nsonso oro, enye ikamaha Mme Ntiense Jehovah. Kpa ye oro, Goldie eka esie ama esimen Linda ye nditọ-eka esie irenowo emi ẹkekerede John ye Gordon aka mbono esop kpukpru ini, esinyụn̄ ekpep mmọ nte mmọ ẹkpekwọrọde ikọ. Goldie, Linda, John, ye Gordon ẹma ẹdi mme asiakusụn̄. Ke ediwak isua ama ekebe, Allen ama edikabade edi Ntiense Jehovah onyụn̄ enen̄ede esịn idem anam n̄kpọ ke esop.

Ke 1965, ẹma ẹkot mi Ufọkn̄wed Utom Obio Ubọn̄ ke Bethel ke Canada yak ndidu ọfiọn̄ kiet mbọ mme ukpep efen. Ini ndude ke ufọkn̄wed oro, ẹma ẹdọhọ mi yak nsịn n̄wed ndika Ufọkn̄wed Gilead. Akanam n̄kekereke-kere ndinam utom isụn̄utom, n̄kekere ke ndotke, edi mma nsịn n̄wed. Ẹma ẹkot mi Ufọkn̄wed Gilead, ọyọhọ klas 42. Kpukpru ini, mme andikpep ke Ufọkn̄wed Gilead ẹma ẹsidọhọ nnyịn se inamde ọfọn ye ebiet emi oyomde inam ukpụhọde. Okịmmọ, akpa n̄kpọ ẹkedọhọde nnam ekedi ndikpep ofụri se n̄kekeme mban̄a esop Abasi ini nsụk ndude ke ufọkn̄wed oro. N̄kedi isua 21 kpọt, ata eti item ke mmọ ẹkenọ mi oro.

Kiet ke otu n̄kpọ emi ẹkekpepde nnyịn ke Ufọkn̄wed Gilead ekedi nte ikpanamde n̄kpọ ye mme ufọkutom radio, ufọkutom TV, ye mme ufọkutom emi ẹsede n̄kpọ ẹban̄a mme n̄wedmbụk n̄kpọntịbe. Se ẹkesikpepde nnyịn ẹban̄a mme ufọkutom oro ama esinem mi eti-eti. N̄kọdiọn̄ọke ke se n̄kesikpepde oro ayan̄wam mi ke ini iso. Nte ini akade, mmọn̄ mmen mbụk enye oro ndi.

ẸMA ẸNỌ MI N̄KA SENEGAL

Ke usen ifan̄ ama ekebe ke mma n̄kokụre ukpep ke Ufọkn̄wed Gilead, ẹma ẹnọ mi ye Michael Höhle emi ekedide isụn̄utom n̄ko yak ika Senegal ke Africa ikanam n̄kpọ Abasi. Ini oro, n̄kpọ nte mme asuanetop 100 ẹkedu ke idụt oro.

Ke mma n̄kesịm Senegal, ikọyọhọke isua kiet, ẹma ẹdọhọ nsisio usen kiet ke urua nnam utom ye n̄kọk itie-utom. Ubet kiet kpọt ke ufọkidụn̄ mme isụn̄utom ekedi “n̄kọk itie-utom.” Kpa ye emi n̄kọk itie-utom oro ekekpride ntre, Emmanuel Paterakis emi ekedide asan̄a-utom n̄kọk itie-utom ama esiti mi ke n̄kọk itie-utom oro ada aban̄a esop Jehovah ke idụt oro. Isan̄ kiet, Brọda Paterakis ama ọdọhọ yak iwet leta isọn̄ọ mme isụn̄utom idem. Ke eyo oro, ikememke utom ndimịn̄ mme leta yak awak, ama esinyụn̄ ọsọn̄ urua, ntre ikada typewriter itaip kpukpru leta oro. Idịghe ekpri utom ekedi oro sia akana ikụt ite ke nnyịn inamke ọkpọkọm ndudue kiet!

Nte n̄kosụk mben̄ede idem ndinyọn̄ ufọk mi ke ufọkidụn̄ isụn̄utom enye emi n̄kodụn̄de ke okoneyo oro, Brọda Paterakis ama ọnọ mi efọkn̄wed. Enye ama ọdọhọ ete: “David, esop Abasi ẹwet leta ẹnọ fi.” Nte ini akade, ekedi n̄kụbọde efọkn̄wed oro, ami n̄kụt kiet ke otu leta emi n̄kataipde! Se iketịbede oro ama ekpep mi ndikpono esop Abasi inamke n̄kpọ m̀mê n̄kọk itie-utom emi odude ke idụt oro okpon m̀mê ikponke.

Mma n̄kabade ndi ufan ye ediwak asuanetop ke esop emi n̄kodude ndien mma nsiwak ndidu ye mmọ ke mme mbubreyo Saturday. Ama esinem mi! Ke nsụk nneneme nneme ye mmọ tutu emi. Mmesisem French emi n̄kekpepde ke Senegal mma n̄ka n̄kese nsio nsio n̄kọk itie-utom ke ofụri ererimbot.

Ke 1968, ami ye Linda ima idụk ediomi ndidọ idem nnyịn. Ke ediwak ọfiọn̄ ama ekebe, mma ndomo ndiyom utom emi ẹdisisiode-sio usen inam man ami ye Linda ikeme ndisiak usụn̄ ke Senegal, edi mme ete-utom ke Senegal ẹkesida sụk nditọ Senegal kpọt ke utom, idaha mbon esenidụt. Utịt utịt, ke mma n̄kafiak nnyọn̄ Canada, ima ikanam ndọ, ndien ẹma ẹmek nnyịn mme akpan asiakusụn̄ ke ekpri obio kiet emi ekerede Edmundston ke New Brunswick. Obio oro ada ke adan̄a Quebec.

IMA INAM UTOM USIAKUSỤN̄ KE NEW BRUNSWICK YE QUEBEC

Mme asuanetop ikodụhe ke obio oro ndien nditọ ukpepn̄kpọ Bible ifan̄ kpọt ẹkedu do. Ekpere ndidi kpukpru n̄kpọ emi mme owo ẹkenamde do ẹkedi nte Ufọkabasi Catholic ẹkedọhọde ẹnam. Ekpere ndidi kpukpru ufọk ke ẹkewet, ‘Nnyịn Iyomke Mme Ntiense Jehovah’ ẹdian. Ini oro owo iketịn̄ke ifiak itịn̄ ite ima ikụt ufọk emi ẹwetde utọ idiọn̄ọ oro ẹdian yak nnyịn ikûwaha nte ẹtịn̄de idaha-emi. Ke ntak oro, ima ika kpukpru ufọk, edide ẹdian idiọn̄ọ oro m̀mê owo idianke. Kpukpru urua, ido ukpono Catholic ẹma ẹsisịn ke n̄wedmbụk n̄kpọntịbe obio emi ikodude ẹte: “Ẹdi yak ikoyom Mme Ntiense Jehovah isịn mmọ ntịme ke idem.” Victor ye Velda Norberg ye ami ye Linda ikedi n̄kukụre Ntiense Jehovah ke obio oro. Ntre ima idiọn̄ọ ke nnyịn mbinan̄ ke mmọ ẹtịn̄ ẹban̄a oro!

Tutu amama ndifreke akpa ini emi esenyịn circuit ekedide edise esop nnyịn. Ke enye ama okodu urua kiet ye nnyịn, enye ama ọdọhọ, “Ekeme ndidi n̄kukụre n̄kpọ emi ẹdikemede ndinam ini ẹsụk ẹdude mi edi mbufo ndinam yak ẹkûsua Mme Ntiense Jehovah aba.” Ọtọn̄ọde ke ini oro ka iso, se ikebierede ndinam edi oro, ndien ima ikụt ibuot. Sụn̄sụn̄ sụn̄sụn̄, mme owo ẹma ẹtọn̄ọ ndikụt ke Mme Ntiense Jehovah ẹsụhọde idem ndien ke ikpọ owo ido ukpono Catholic ẹtatan̄ idem. Idaha-emi ekpri esop odu ke obio oro.

Obio emi ikodude inam n̄kpọ Abasi ama oyom usụn̄ ọkpọn̄ mme obio eken. Ke ima ikodu do isua kiet, ẹma ẹdọhọ ami ye Linda ikan̄wam akamba esop kiet emi odude ke Quebec City. Ima idu ke esop oro ke ọfiọn̄ itiokiet ye nditọ-ete irenowo ye iban; mmọ ẹma ẹkama nnyịn eti-eti. Ekem ẹma ẹmek mi esenyịn emi asan̄ade-san̄a ndien ami ye n̄wan mi ikanam utom oro.

Ima inam utom ke nsio nsio circuit ke ofụri Quebec ke isua 14 emi eketienede. Ama esinem nnyịn! Utom ukwọrọ-ikọ ke Quebec ama ana ibuot, ndien ima isiwak ndikụt nte nsio nsio ubon ke esop kiet ẹnamde n̄kpọ man ẹna baptism!

NNYỊN IFREKE MBON EMI ẸKENEN̄EREDE ẸNAM UTOM ỌKPỌSỌN̄

Isọn̄ke ndima nditọ-ete iren ye iban emi ẹdụn̄de ke n̄kan̄ Canada emi ẹsemde French. Mmọ ẹdi mbon akpanikọ, ẹsikop idatesịt, ẹnyụn̄ ẹsịn idem ẹnam n̄kpọ Abasi. Edi idịghe kpukpru ini ke ekesimem ọnọ mmọ ndikpep Bible, ndien mbonubon mmọ ẹma ẹsikọbọ mmọ ata eti-eti. Mme ete ye eka ndusụk uyen ẹma ẹdọhọ mmọ ẹte, “Ẹtre ndikpep n̄kpọ ye Mme Ntiense Jehovah mîdịghe mbufo ẹkpọn̄ ufọk!” Mmọ ẹsọn̄ọ ẹda ye Jehovah. Ekpededi odu mbon emi ẹtrede ndikpep n̄kpọ ye Mme Ntiense Jehovah ke ntak se ete ye eka mmọ ẹtịn̄de, iwakke. Imenịm ke Jehovah enem esịt ye mbon emi ẹsọn̄ọde ẹda!

Ọkpọdiọk eti-eti edieke mmentịn̄ke n̄kpọ mban̄a mme asiakusụn̄ ofụri ini ye mme akpan asiakusụn̄ emi ẹkenamde n̄kpọ Abasi ke Quebec ke mme isua oro. Mmọ ẹma ẹsọn̄ọ ẹda ye Abasi. N̄wakn̄kan ke otu mmọ ẹketo nsio nsio itie ke Canada ẹdi do. Akana mmọ ẹkpep usem French ẹdiọn̄ọ. Edi ikụreke ke oro, akana mmọ n̄ko ẹkpep ẹdiọn̄ọ nte mbon n̄kan̄ oro ẹnamde n̄kpọ ye nte ẹkerede n̄kpọ. Ediwak ke otu usụn̄ emi ẹkenamde n̄kpọ do ẹnyụn̄ ẹkerede n̄kpọ ẹkedi nte ido ukpono Catholic ẹyomde.

Ẹma ẹsiwak ndinọ mme akpan asiakusụn̄ ẹka mme efakutom emi ẹdude ata nsannsan, emi mme asuanetop mîdụhe. Ke ntak emi ẹkesuade Mme Ntiense Jehovah do, ama ọsọn̄ mmọ ndikụt ufọk ndụn̄, ama akam etetịm ọsọn̄ mmọ ndikụt utom emi mmọ ẹkpesiode-sio usen ẹnam. Idem mbon emi ẹdọde ndọ obufa ẹma ẹsibuana ufọk ye owo inan̄, owo itiokiet, mîdịghe ye owo itiaita ẹdụn̄ man ẹbabuana okụk ufọk ẹkpe. Mmọ ikekemeke ndikpe ufọk ndụn̄ ikpọn̄. Mme asiakusụn̄ emi ẹkemade Abasi mi ẹma ẹsinam utom ọkpọsọn̄. Ke ini mmọ ẹtọn̄ọde ẹkpep owo Bible, mmọ ẹma ẹsinam ofụri se mmọ ẹkekeme man ẹkụt ibuot ke ukpepn̄kpọ oro. Idaha-emi mîyomke yak mme owo ẹtoto ebiet en̄wen ẹdin̄wam ke Quebec, ediwak ke otu mme asiakusụn̄ oro ẹka mme ebiet en̄wen man ẹken̄wam ke ebiet emi ẹyomde-yom mme ọkwọrọ-ikọ.

Ini emi ikanamde utom circuit, ke ini ikade esop, ima isidomo ukeme nnyịn ndisan̄a ye mme uyen ke mme usenubọk Saturday. Oro ama anam yak idiọn̄ọ mfịna emi mmọ ẹkenyenede. Idaha-emi ndusụk mme uyen oro ẹdu ke idụt en̄wen ẹnam utom nte mme isụn̄utom, ndusụk ẹnam utom en̄wen ẹnọ esop Abasi.

Ke eyo oro, ndusụk esop ikenyeneke okụk inọ nnyịn ikpe usụn̄ ika ikese esop en̄wen inyụn̄ idep udia idia. Ke ntak oro ndusụk ini okụk ama esisat nnyịn ke ekpat ke utịtọfiọn̄. Ke mme ini ntre, akana iberi edem ofụri ofụri ke Jehovah sia enye ikpọn̄ ọkọdiọn̄ọ nte n̄kpọ etiede ye nnyịn. Akananam Jehovah ikọtọhọ nnyịn edem ke isọn̄. Idem ekpedi didie, ima isikeme ndikpe usụn̄ n̄ka n̄kese esop en̄wen.

SE N̄KPEPDE NTO NDITỌ-ETE EN̄WEN EMI ẸSỌN̄ỌDE ẸDA YE ABASI

Mma ntetịn̄ mban̄a ufọn emi n̄kadiade nto se ẹkekpepde nnyịn ke Ufọkn̄wed Gilead ẹban̄a nte ikemede ndinam n̄kpọ ye mme ufọkutom usuan mbụk n̄kpọntịbe. Ke eyo oro ke Quebec, ima inyene ediwak ifet nditịn̄ nti n̄kpọ mban̄a Mme Ntiense Jehovah ke radio, ke TV, ye ke n̄wedmbụk n̄kpọntịbe. Ẹma ẹsiwak ndidọhọ mi nsan̄a ye Léonce Crépeault emi ekedide esenyịn emi asan̄ade-san̄a nte ami. Brọda oro ama ọfọn eti-eti ke ndinam n̄kpọ ye mbon emi ẹnamde utom ke ufọkutom usuan mbụk n̄kpọntịbe. Ke ini ikade ikosobo ye akamba owo emi anamde utom ke ufọkutom usuan mbụk n̄kpọntịbe, utu ke enye nditịn̄ ikọ nte owo emi ọdiọn̄ọde utom oro, enye ama esidọhọ: “Sir, ami ye owo emi nsan̄ade kiet ndi mi idi mme ọkwọrọ-ikọ. Nnyịn inen̄ekede idiọn̄ọ nditịn̄ ikọ ke TV ye radio, edi ẹdọhọ nnyịn idinam mme owo ẹdiọn̄ọ ẹban̄a akamba mbono emi Mme Ntiense Jehovah ẹdinịmde. Eyenem nnyịn eti-eti edieke an̄wamde nnyịn.” Ke ntak emi enye okosụhọrede idem, ediwak owo emi ẹnamde utom ke ufọkutom usuan mbụk n̄kpọntịbe ẹma ẹnyịme ndin̄wam nnyịn.

Nte ini akakade, n̄kọk itie-utom ẹma ẹdọhọ yak n̄kadiana ye Brọda Glen How emi ekedide kiet ke otu mme ekpe-ibet nnyịn, ise iban̄a mme mfịna emi ikọdiọn̄ọde ke mbon emi ẹnamde utom ke ufọkutom usuan mbụk n̄kpọntịbe ẹkeme ndima nditịn̄ mban̄a. Mma ndia ufọn nto se ẹkekpepde mi ke Gilead ye nte n̄kanamde utom ye Brọda Léonce. Ami ndikanam utom ye Brọda How ekedi ata n̄kpọ ukpono. Ke n̄kpọ ekededi emi aban̄ade ikpe emi ebehede esop Abasi, enye ama esitịn̄ ikọ ke ibuot esop Abasi ifeheke ndịk ndomokiet, edi se ikande oro edi ke enye ekedi owo Abasi. Enye ama ama Jehovah eti-eti.

Ke 1985, ẹma ẹnọ nnyịn ikanam utom ke circuit kiet emi odude ekpere ufọk ete mi ke n̄kan̄ edem usoputịn Canada, oro ama anam ikeme ndise mban̄a ete mi. Ọfiọn̄ ita ekebe, enye ama akpa. Ima ika iso inam utom ke nsio nsio circuit ke edem usoputịn Canada tutu esịm 1989 ini ẹkedọhọde nnyịn ididi mbonubon Bethel United States. Ama akpa nnyịn idem eti-eti. Nnyịn ndika Bethel ọkọwọrọ ke imọn̄ ikpọn̄ utom emi ikanamde ke se ikperede ndisịm isua 19. Ke mme isua oro, ufọk nditọ-ete emi idụn̄de ebe 100, ndien ibat ini emi nditọ-ete irenowo ye iban emi ẹfọnde ido ẹkotde nnyịn ufọk ebe utịm ike 1,000. Imenen̄ede ikọm kpukpru mbon emi ẹkenọde nnyịn ufọk mmọ idụn̄ ye mbon emi ẹkenyụn̄ ẹkotde nnyịn ufọk!

IMA IKANAM UTOM KE BETHEL UNITED STATES

Ini isịmde Brooklyn, ẹkenọ mi n̄kanam utom ke Itie-Utom Utịmutom. Ndisụk n̄kọkọm Abasi ke ukpep ẹkenọde mi do. Kiet ke otu n̄kpọ emi n̄kekpepde ekedi ndikụt ete ke mmọdiọn̄ọ kpukpru n̄kpọ emi aban̄ade n̄kpọ emi etịbede, yak n̄kûkere ke ekeme ndidi ekedi ntem mîdịghe ke ana-edi ekedi ntem. Ekem ke 1998, ẹma ẹnọ mi n̄kanam utom ye Itie-Utom Uwetn̄wed, nsụk ndodu ke itie-utom oro idaha-emi, ke nsụk n̄kpep ndiwet n̄wed. Ke ediwak isua, mma n̄n̄wam Brọda John Barr emi ekedide anam ndutịm Kọmiti Uwetn̄wed. N̄kabat nte ke edi n̄kpọ ukpono. Ndisụk mmama ukpep emi enye ọkọnọde mi ye kpukpru ini emi n̄kodude ye enye. Brọda oro ama enyene nti edu emi Christian ekpenyenede.

Enen̄ede enem mi ndinam utom ye nditọ-ete irenowo ye iban emi ẹnamde utom ke Itie-Utom Uwetn̄wed. Mmọ ẹsụhọde idem. Mmọ ẹsibọn̄ akam ẹdọhọ Jehovah an̄wam mmimọ ke utom emi enye ọnọde mmimọ inam. Ndien n̄kpọ ekededi emi mmọ ẹnamde ẹkụt ibuot, mmọ ẹsidiọn̄ọ ke spirit Jehovah anam, idịghe ndammana enọ mmimọ anam.

N̄kpọ en̄wen emi edide n̄kpọ ukpono ọnọ nnyịn edi nte ami ye Linda ikade ikese nditọ-ete nnyịn emi ẹsọn̄ọde ẹda ye Abasi ke idụt 110. Imokụt adan̄a nte mme isụn̄utom, mbon Kọmiti N̄kọk Itie-Utom, ye mbon eken emi ẹnamde utom ofụri ini ẹnọ Abasi ẹnen̄erede ẹma Jehovah. Imonyụn̄ ikụt nte mme asuanetop ke mme idụt oro, emi ẹmade Abasi, ẹsịnde idem ẹnam n̄kpọ Abasi ẹnyụn̄ ẹsọn̄ọ ẹda ye Abasi kpa ye emi ẹn̄wanade ekọn̄ ke edem mmọ, n̄kpọ ọsọn̄de ye mmọ, ẹnyụn̄ ẹkọbọde mmọ. Imenịm ke Jehovah ama mmọ eti-eti!

Ke ediwak isua emi ebede mi, Linda enen̄ede an̄wam mi nnam nsio nsio utom emi Abasi ọnọde mi. Enye edi owo ofụri owo, ndien enye esiyoyom mme usụn̄ ndin̄wam mbon en̄wen. Enye enen̄ede ọdiọn̄ọ ndimen Ikọ Abasi ndisịn ke nneme emi enye enemede ye owo ini enye anamde n̄kpọ idemesie. Enye an̄wam ediwak owo ẹkpep n̄kpọ ẹban̄a Jehovah onyụn̄ an̄wam ndusụk mbon emi ẹma ẹketre ndinam n̄kpọ Jehovah ẹfiak ẹtọn̄ọ ẹnam. Linda edi ata eti enọ emi Jehovah ọnọde mi! Nte ikponde owo ika, ntre ke enen̄ede enem nnyịn nte nditọ-ete nnyịn irenowo ye iban emi ẹdide mme uyen ẹn̄wamde nnyịn ikeme ndika isan̄, ẹnyụn̄ ẹn̄wamde nnyịn ke mme n̄kpọ eken.​—Mark 10:29, 30.

Mma mfiak n̄kere kpukpru se itịbede ke isua 80 emi ebede mi, mmọkọm Jehovah. Andiwet Psalm kiet ọkọdọhọ ete: “O Abasi, afo emekpep mi toto ke uyen mi, ndien tutu esịm emi ami ke mbụk mme utịbe utom fo.” Nsịn kpa ke uyo oro. (Ps. 71:17) Se nduakde ndinam edi oro adan̄a nte n̄kade iso ndu uwem.