Mme Mbụme Oro Mme Andikot Ẹbụpde

Ini ewe ke mme idụt ẹditan̄a “emem ye ifụre”?

Ima ineme ke “Mme Mbụme Oro Mme Andikot Ẹbụpde” emi odude ke Enyọn̄-Ukpemea emi ẹkesiode ke ndondo emi nte ke idibịghike, ke Jehovah eyesịn ‘ekikere esie’ ke esịt “nnụk duop oro” (ofụri ukara ererimbot). Ekikere esie oro edidi yak mmọ ẹnọ “ididuot idiọk unam,” oro edi, Esop Edidiana Mme Idụt, odudu ye ukara mmọ. Idiọk unam oro ke ẹkot n̄ko “mbiet idiọk unam.” (Edi. 13:14, 15; 17:3, 16, 17) Ekem “nnụk duop oro” ye idiọk unam oro emi ẹsụk ẹyakde odudu ẹsịn do ke ubọk ẹyesobo nsunsu ido ukpono ẹfep ke ofụri ererimbot. Ndi mme idụt ẹditan̄a “emem ye ifụre”b mbemiso ẹsobode nsunsu ido ukpono m̀mê ke ẹma ẹkesobo mmọ ẹfep?​—1 Thess. 5:3.

Se idude edi ke nnyịn idiọn̄ọke ata nnennen ini emi ẹditan̄ade “emem ye ifụre.” Ekpedi ima idiọn̄ọ kpukpru n̄kpọ iban̄a n̄kpọ emi, ufọn ikpodụhe nnyịn ndikama enyịn nse se ikade iso nnyụn̄ ndu ke ukpeme. Edi idịghe ini kiet m̀mê ikaba ke Jesus ọkọdọhọ mme mbet esie yak mmọ “ẹdu ke ukpeme.” (Matt. 24:42; 25:13; 26:41) Idaha-emi, ẹyak inen̄ede ise prọfesi emi Abasi ọkọnọde apostle Paul spirit Esie yak ewet ọnọ ẹsọk esop ke Thessalonica.

Paul ekewet ete: “Ini ekededi emi mmọ ẹdọhọde: ‘Emem ye ifụre!’ adan̄aoro nsobo ayabuat mmọ.” (1 Thess. 5:2, 3) Se nte mme n̄wed nnyịn ẹkesinamde ikọ Paul oro an̄wan̄a mi: Ẹyetan̄a “emem ye ifụre” ata esisịt ini mbemiso akwa ukụt ọtọn̄ọde. Ndien akwa ukụt editọn̄ọ ye nsobo emi ẹdisobode Akwa Babylon emi adade aban̄a kpukpru nsunsu ido ukpono ke ofụri ererimbot. Ndien ima idọhọ n̄ko ke ini emi ẹditan̄ade “emem ye ifụre” ediwụt ke akwa ukụt ọmọn̄ ọtọtọn̄ọ.

Edi ke ima ikafiak itịm ise n̄kpọ emi, etie nte enyene usụn̄ en̄wen emi ikemede ndinam enye an̄wan̄a. Akam ekeme ndidi ẹditan̄a “emem ye ifụre” ke ẹma ẹkesobo nsunsu ido ukpono ẹkụre. Ntak emi ekemede ndidi ntre? Ẹyak ise mme mbụme ifan̄ emi.

Didie ke nsunsu ido ukpono ẹnyene ubọk ke mme ekọn̄ emi mme idụt ẹn̄wanade? Bible ọdọhọ ete: “Ẹma ẹkụt iyịp . . . kpukpru mbon oro ẹkewotde ke isọn̄ ke esịt esie [“akwa akpara oro,” Akwa Babylon].” (Edi. 17:1, 5; 18:24) Ke mbụk ubonowo, nsunsu ido ukpono ẹnyịme yak ẹn̄wana mme ekọn̄, ndien ediwak ini mmọ ẹsidi ntak afai ye uwotowo. Ntre, se idodu emi, mmọ inamke emem ye ifụre odu, mmọ ẹkam ẹdi ntak ekọn̄ ye afai. Enye oro anam yak ẹbụp mbụme emi: Ndi n̄kukụre ini emi mme idụt ẹditan̄ade “emem ye ifụre” edi ke ẹma ẹkesobo Akwa Babylon ẹfep? Ekeme ndidi ntre, edi nnyịn itịn̄ke ikọn̄ ubọk ke esịt.

Nso iditịbe ẹma ẹtan̄a “emem ye ifụre” ẹma? Paul odọhọ ete: “Adan̄aoro nsobo ayabuat mmọ.” (1 Thess. 5:3) Nte ẹnamde ufan̄ikọ Bible emi an̄wan̄a ke nwtsty ọdọhọ ke se ‘Paul etịn̄de ke itie Bible emi owụt ke ata esisịt ini oyodu, ekpedi ayakam ododu, ke ufọt ini emi ẹditan̄ade “emem ye ifụre” ye nsobo emi ẹdisobode mbon emi ẹtan̄ade “emem ye ifụre” oro. Nsobo oro edidi ata usọp usọp ntem, ndien mmọ idikemeke ndibọhọ.’ Edieke mbon ukara ererimbot emi ẹditan̄ade “emem ye ifụre” ke ẹma ẹkesobo nsunsu ido ukpono ẹma, ikọ ọwọrọ ke nsobo emi ẹdisobode kpukpru mme idụt oro edidi ata usọp usọp ntem.

Ikọt Jehovah ẹdinam didie n̄kpọ iban̄a se ẹdọhọde ke eyetịbe ke ini iso oro? Paul ọdọhọ ete: “Nditọete, mbufo idụhe ke ekịm, emi akpanamde usen oro abuat mbufo nte inọ.” (1 Thess. 5:4) Se n̄kpọ mi ise: Edieke ẹditan̄ade “emem ye ifụre” ke ẹma ẹkesobo nsunsu ido ukpono ẹma, ọwọrọ ikọt Jehovah ẹyediọn̄ọ ke nsobo mme idụt ada ke enyịnusụn̄. Edi ke enyịn mme idụt, nsobo mmọ edidi nte inọ; edidi ata usọp usọp ntem, idụhe n̄kpọ ndomokiet emi edinamde mmọ ẹdiọn̄ọ ke ẹmọn̄ ẹsobo mmọ.​—1 Thess. 5:2

Enyene n̄kpọ kiet emi inen̄erede idiọn̄ọ. Ekpri ini ke iso, “nnụk duop oro” ye idiọk unam emi ẹkesụk ẹyakde odudu ẹsịn ke ubọk ẹyesobo nsunsu ido ukpono. Ini oro edidi ntọn̄ọ akwa ukụt. Imonyụn̄ idiọn̄ọ ke eyenyene ini emi mme idụt ẹditan̄ade “emem ye ifụre.” Ini ewe ke enye oro editịbe? Imeneme ini iba oro ekemede nditịbe. Akpa: Ekeme ndidi ẹditan̄a “emem ye ifụre” mbemiso ẹsobode nsunsu ido ukpono. Ọyọhọ iba: Ekeme ndidi ẹditan̄a “emem ye ifụre” ke ukara ererimbot ẹma ẹkesobo nsunsu ido ukpono ofụri ofụri ẹma. Eyedi se ibetde ikụt se iditịbede. Ediwak ini mme prọfesi Bible ẹsinen̄ede ẹn̄wan̄a owo ke ini mmọ ẹsude mîdịghe ke mmọ ẹma ẹkesu ẹma.​—Men John 12:16 domo.

Edi idaha-emi, se idide akpan n̄kpọ ikan idịghe ini emi ẹditan̄ade “emem ye ifụre,” akam edi nnyịn ndika iso nsọn̄ọ nda ye Abasi. Ana “itaba idap inyụn̄ inyene ikike” man ikeme ndinen̄ede mben̄e idem inamke n̄kpọ m̀mê ewe ke otu mme n̄kpọ emi isiakde do edibem iso itịbe.​—1 Thess. 5:6.