Kpep Ndibak Abasi Nte Obadiah

Obadiah edi owo emi ekesede aban̄a mbonufọk idiọk Edidem Ahab. Idiọk edidem emi akayak mme owo ẹkpono abasi Baal ẹnyụn̄ ẹnam ndiọi edinam emi asan̄ade n̄kpọ ye ukpono abasi Baal ke ofụri Israel. Kpa ye oro, Obadiah ama ekpep ndibak Jehovah “toto ke uyen esie.” (1 Ndi. 18:1-13) Ini Jezebel emi ekedide ọbọn̄ an̄wan ọkọdọhọde yak ẹwot kpukpru mme prọfet Jehovah, Obadiah ama ọdiọn̄ọ ke ana inam n̄kpọ uko uko man utọ n̄kpọ oro iditịbe. Ndidịp prọfet kiet kpọt ekedi edue-ukot-akpa-itọn̄; kpa ye oro, Obadiah ama edịp prọfet 100 onyụn̄ ọnọ mmọ udia ini akan̄ ọkọsọn̄de ubọk! Mme nsunsu prọfet emi ẹkenamde n̄kpọ ẹnọ edidem ye ọbọn̄ an̄wan ẹma ẹwak eti-eti, kere ndien nte ọkọsọn̄de Obadiah ndidịp mme prọfet Jehovah, mme nsunsu prọfet oro inyụn̄ ikwe enye.​—1 Ndi. 18:19.

Nso ke nnyịn ikeme ndikpep nto Obadiah emi akabakde Abasi? Obadiah ama abak Ahab, edi Abasi ke enye akabak akan. Mbak Abasi oro akanam enye enyene uko anam n̄kpọ emi ekpekekemede ndida enye ibuot man ekpeme nditọ-ete esie. Edieke ẹkpande nnyịn ndinam n̄kpọ Abasi ke ebiet emi idụn̄de, nnyịn n̄ko imekeme ndinam n̄kpọ emi edin̄wamde nnyịn inyene mbak Abasi. Mbak Abasi emi ọyọsọn̄ọ nnyịn idem man ikeme ndin̄wam nditọ-ete nnyịn irenowo ye iban emi ẹnyenede mfịna.