Didie ke Afo Ediwụt ke Amama Ufak?

1-2. N̄kpa emi Jesus akakpade afak nnyịn akpanam inam nso? Ntak-a? (2 Corinth 5:14, 15) (Se ndise n̄ko.)

OWO akpanyan̄a fi osio ke ufọk emi ọkọduọde efịk fi, ndi ukpọkọmke owo oro? Ekpededi idịghe afo ikpọn̄ ke ẹkenyan̄a, imenịm ke okposụk ebiere ndida inua fo n̄kọm enye man owụt enye ke afo udaha se enye akanamde ọnọ fi ke ekpri n̄kpọ.

² Ima itetịn̄ ke ibuotikọ emi ekebede ke nnyịn ke idem nnyịn ikemeke ndinyan̄a idem nsio ke ufụn idiọkn̄kpọ ye n̄kpa. Edi n̄kpa emi Jesus akakpade afak nnyịn ekeme ndinyan̄a nnyịn sia enye anam (1) yak ẹkeme ndifen mme idiọkn̄kpọ emi inamde, (2) ikeme ndidori enyịn ndifọn mma ke ini iso, ye (3) ikeme ndifiak ntie ke emem ye Abasi. Oro anam inyene idotenyịn ndidu uwem ke nsinsi ke obufa ererimbot emi Jehovah edimende idi. Imokụt ke ufak owụt ke Jesus ama mme owo; Jesus ọkọtọn̄ọ ndima mme owo anyan ini mbemiso enye edimana ke isọn̄ emi nte owo. (N̄ke 8:30, 31) Apostle Paul ekewet ete ke “ima Christ onụk nnyịn.” (Kot 2 Corinth 5:14, 15.) Oro ọwọrọ ke akpana ima emi Jesus amade nnyịn anam nnyịn isụk inam n̄kpọ ndiwụt ke nnyịn idaha n̄kpa emi enye akakpade afak nnyịn ke ekpri n̄kpọ.

3. Nte owo kiet kiet owụtde ke imama n̄kpa emi Jesus akakpade afak nnyịn ekeme ndidi isio. Ntak ekemede ndidi ntre?

³ N̄kpa emi Jesus akakpade afak fi ke ima-esịt akpanam anam nso? Nte afo edibọrọde mbụme oro ekeme ndikpụhọde ye nte owo en̄wen ọbọrọde. Se uwụtn̄kpọ mi. Yak idọhọ ke owo ita ẹyom ndika ukem itie, mmọ mbita ẹtọn̄ọ isan̄ ke nsio nsio obio emi mmọ ẹdude, edi idịghe ukem usụn̄ ke mmọ ẹdisan̄a ikesịm do. Ukem oro n̄ko ke edi ye nnyịn. “Usụn̄” emi afo edisan̄ade owụt ke amama nte Jesus akakpade afak fi etiene adan̄a nte afo enen̄erede ekpere Jehovah. Kama se itịn̄de oro ke ekikere nte isụk inemede iban̄a orụk owo ita emi: (1) Mbon emi ẹkpepde Bible ye nnyịn, (2) mme Christian emi ẹma ẹkena baptism, ye (3) mme erọn̄ emi ẹma ẹkeyo ẹkpọn̄ otu-erọn̄.

MBON EMI ẸKPEPDE BIBLE YE NNYỊN

4. Nso iwụt ke Jehovah okụt mbon emi ẹkpepde Bible ye ikọt esie?

⁴ Ekpedi ke ekpep Bible ye Mme Ntiense Jehovah, kere se iyomde nditịn̄ emi: Afo ndinyịme eti mbụk owụt ke esịne ke otu mbon emi Jehovah osụk odụride adian idem yak ẹdidi ufan esie. (John 6:44; Utom 13:48) “Jehovah edi andidụn̄ọde esịt.” Oro ọwọrọ ke enye okụt kpukpru se afo anamde man ekeme ndikpep n̄kpọ mban̄a enye, onyụn̄ enem enye ndikụt mme n̄kpọ emi afo okpụhọrede man ekeme ndidu uwem nte enye oyomde. (N̄ke 17:3; 27:11) Ufak anam afo ekeme ndidi ufan Jehovah. (Rome 5:10, 11) Kûda ufak ke n̄kpọ mbubru.

5. Didie ke mbon emi ẹkpepde Bible ye ikọt Abasi ẹkeme ndinam se ẹtịn̄de ke Philippi 3:16?

⁵ Didie ke afo emi osụk ekpepde Bible ye ikọt Abasi ekeme ndiwụt ke amama n̄kpa emi Jesus akpade afak fi? Usụn̄ kiet emi afo ekemede ndinam oro edi afo ndinam item emi apostle Paul ọkọnọde mbon Philippi. Enye ọkọdọhọ ete: “Ke udomo oro nnyịn ima ikanam n̄kọri, ẹyak nnyịn ika iso itịm isan̄a kpa ke ido emi.” (Phil. 3:16) Bible en̄wen esịn ufan̄ikọ oro ntem: “Ama-edi usụn̄ emi idụkde mi, inaha ituak ida, yak ika iso isan̄a ke esịt.” Ntre, kûyak n̄kpọ ndomokiet akpan fi ndika iso nsan̄a ke usụn̄ uwem emi, kpa nte itie Bible oro ọdọhọde.​—Matt. 7:14; Luke 9:62.

6. Ọkpọsọn̄ mbon emi ẹkpepde Bible ye nnyịn ndinịm n̄kpọ kiet emi Bible ekpepde, m̀mê nditre ndinam n̄kpọ emi Bible akpande, nso ke mmọ ẹkpenam? (Deuteronomy 30:11-14) (Se ndise n̄ko.)

⁶ Ọkpọsọn̄ fi ndinyịme n̄kpọ kiet emi ekpepde ke Bible ndondo emi, akpanam didie? Nam ndụn̄ọde ban̄a n̄kpọ oro nyụn̄ bọn̄ akam dọhọ Jehovah anam n̄kpọ oro an̄wan̄a fi. (Ps. 86:11) Edi ukpepn̄kpọ oro okposụk ọsọn̄ ndin̄wan̄a fi, sana enye oro yak kan̄a, edi kûtre ndikpep Bible. Nso edieke ọsọn̄de fi nditre n̄kpọ emi Bible ọdọhọde ke ifọnke? Ti ke tutu amama ke Jehovah ikemeke ndidọhọ mme owo ẹnam n̄kpọ emi okponde akan mmọ ke ini edide enye ọdiọn̄ọ ke mmọ ifọnke ima. Afo emekeme ndidu uwem nte Jehovah oyomde ẹdu. (Kot Deuteronomy 30:11-14.) Jehovah onyụn̄ ọn̄wọn̄ọ ke imọ iyan̄wam fi. (Isa. 41:10, 13; 1 Cor. 10:13) Ntre kûyak idem emem fi. Utu ke afo ndisịn ekikere ke mme n̄kpọ emi ẹsọn̄de fi, sịn ekikere ke kpukpru se Jehovah anamde ọnọ fi, akpan akpan nte enye ọkọnọde Eyen esie edikpa afak fi. Nte enen̄erede ama Jehovah aka, ntre ke afo edikụt ke “mme ewụhọ esie idobike owo mbiomo.”​—1 John 5:3.a

7. Nso ke mme uyen emi ete ye eka mmọ ẹdide Mme Ntiense Jehovah ẹkpekere ẹban̄a?

⁷ Ẹyak ineme iban̄a mme uyen emi mme ete ye eka mmọ ẹdide Mme Ntiense Jehovah. Mbufo n̄ko ẹsụk ẹdi mbon emi ẹkpepde Bible ye ikọt Abasi. Se idude edi ke mbufo ẹdi ata akpan mbon emi mme ete ye eka mbufo ẹkpepde Bible. Bible ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” (Jas. 4:8; 1 Chron. 28:9) Ẹma ẹnam n̄kpọ man mbufo ẹkeme ndikpere Jehovah, enye n̄ko ayanam n̄kpọ man ekeme ndikpere mbufo. Isidịghe Jehovah ama okụt mbufo enye ọdọhọ ke mbufo ẹsịne ke otu ikọt imọ, okụre ke oro. Jehovah odụri owo kiet kiet adian idem, sịm mbon emi mme ete ye eka mmọ ẹdide Mme Ntiense Jehovah. Nso inam yak Jehovah ada mbufo nte ufan? Ufak anam; enọ enye oro idịghe n̄kpọ emi mbufo ẹkpemende ẹbre mbre tutu amama. (Rome 5:1, 2) Ntre mbemiso mbufo ẹdụkde Editi isua emi, ẹnen̄ede ẹtie ẹkere ufọn emi n̄kpa Jesus anamde ọnọ mbufo. Ẹkụt didie? Ẹyak se mbufo ẹkerede anam yak mbufo ẹnam n̄kpọ en̄wen emi ẹkeduakde ndinam nnọ Abasi inamke n̄kpọ m̀mê n̄kpọ oro edi nso man mbufo ẹwụt ke ẹmema nte Jehovah akadade n̄kpa Eyen esie afak mbufo.b

MME CHRISTIAN ORO ẸMA ẸKENA BAPTISM

8. Didie ke mme Christian emi ẹma ẹkena baptism ẹwụt ke mmimọ imama ufak?

⁸ Ekpedi ama ana baptism, ọwọrọ amananam mme n̄kpọ owụt ke imọ imama ufak. Ama anam nsio nsio n̄kpọ man ekpere Jehovah onyụn̄ odu uwem nte enye oyomde. Ama anam ewụhọ Jesus emi ọdọhọde emen se afo enịmde ọkọkwọrọ ọnọ mbon en̄wen onyụn̄ anam mmọ ẹdi mbet imọ. Ama ayak idemfo ọnọ Jehovah onyụn̄ ana baptism. Ndi ẹkọbọ fi ke ntak emi anamde n̄kpọ ọnọ Jehovah? (2 Tim. 3:12) Afo ndisọn̄ọ nda nyọ owụt ke amama Jehovah, onyụn̄ ama nte enye akayakde Eyen esie edikpa afak fi.​—Heb. 12:2, 3.

9. Nso afia ke ana mme Christian emi ẹma ẹkena baptism ẹkpeme idem man mmọ ididụk?

⁹ Ekpedi ebịghi ekpri tọn̄ọ nte ikana baptism, enyene afia emi anade ikpeme idem man nnyịn ididụk. Nte ini akade imekeme ndifre se ufak anamde ọnọ nnyịn. Didie ke oro ekeme nditịbe? Kop uwụtn̄kpọ mme Christian ke Ephesus ke eyo mme apostle. Jesus emi ẹkenamde eset ama ọkọm mmọ nte mmọ ẹkesọn̄ọde ẹda ẹyọ. Edi enye ama ọdọhọ mmọ ete: “Mmenyene emi ndida mbiom fi, nte ke ọmọkpọn̄ akpa ima emi afo ekenyenede.” (Edi. 2:3, 4) Ikọ Jesus oro okowụt ke Christian ekeme nditọn̄ọ ndinam n̄kpọ Abasi ke nnam-didie, itoho enye esịt. Utọ Christian oro ekeme ndibọn̄ akam, odụk mbono esop, onyụn̄ aka ukwọrọ-ikọ edi esịt esie isịneke do, onyụn̄ anam nte nnam-mmehe n̄kpọ. Idịghe aba ima anam enye anam mme n̄kpọ oro. Edieke etiede fi nte ke unen̄ekede uma Jehovah aba nte ekesimade, ekeme ndinam nso?

10. Didie ke afo ekeme ‘nditie n̄kere’ mme n̄kpọ emi afo anamde owụt ke imọ ituak ibuot inọ Jehovah? Didie ke onyụn̄ ekeme ‘ndisịn idem ofụri ofụri’ ke mme n̄kpọ oro? (1 Timothy 4:13, 15)

¹⁰ Apostle Paul ọkọdọhọ Timothy yak enye ‘etie ekere’ mme n̄kpọ emi enye anamde owụt ke ituak ibuot inọ Abasi, onyụn̄ “[esịn] idem ke mmọ ofụri ofụri.” (Kot 1 Timothy 4:13, 15.) Da item oro nyụn̄ domo ndikere mme usụn̄ emi ekemede ndinam mme n̄kpọ emi anamde ọnọ Jehovah ke inemesịt man aka iso “[enyene] ifiopesịt ke spirit.” (Rome 12:11; se se ẹwetde ẹban̄a “Be aglow with the spirit” ke ufan̄ikọ oro ke nwtsty.) Ke uwụtn̄kpọ, emekeme ndinen̄ede ntịm idem nnọ mbono esop man ama odụk mbono esop afo ekeme ndinen̄ede n̄kpan̄ utọn̄. Mîdịghe emekeme ndidiomi ini emi editiede ikpọn̄ ikpep Ikọ Abasi ke ebiet emi odobode man ekeme ndinen̄ede n̄kere mban̄a se ekpepde, man enen̄ede adia ufọn. Ukem nte edide anam anam afo ọdọn̄ n̄kpri ifia ke ikan̄ onyụn̄ akabade ukan̄ sụn̄sụn̄ sụn̄sụn̄ man ikan̄ oro aka iso asak, emekeme ndinam mme n̄kpọ emi itịn̄de mi man ima emi afo amade kpukpru se Jehovah anamde ọnọ fi ye ufak nde afiak ada ikan̄. N̄kpọ en̄wen emi ekemede ndinam edi ndida mme urua oro mbemiso Editi ntie n̄kere mme ufọn emi adiade ke ntak emi afo edide Ntiense Jehovah. Imenịm ke oro ayan̄wam fi enen̄ede ama ufak emi anamde afo ye Jehovah ekeme ndidi ufan.

11-12. Ndi afo ndidi eketie etie enye idọn̄ke fi ndisịn idem nnam n̄kpọ Abasi ọwọrọ ke spirit Abasi ọkpọn̄ fi? Ntak ọbọrọde ntre? (Se ndise n̄ko.)

¹¹ Ekpedi edi etie etie enye idọn̄ke fi ndinen̄ede nsịn idem nnam n̄kpọ Abasi aba nte ekesinamde, kûyak idem emem fi, kûkere ke spirit Abasi ọkpọn̄ fi. Ti se apostle Paul ekewetde ọnọ mbon Corinth aban̄a utom esie. Enye ọkọdọhọ ete: “Edieke mmenamke ke edinyịme esịt, nsụk nnyenyene itie akama-ukpọhọde oro ẹyakde ẹsịn mi ke ubọk.” (1 Cor. 9:17) Ikọ esie ọkọwọrọ nso?

¹² Paul ama enyene mme n̄kpọ emi akanamde okûdọn̄ enye ndikwọrọ ikọ ndusụk ini. Kpa ye oro, enye ama ebiere ndika iso n̄kwọrọ ikọ kpa ye nte eketiede enye ke idem ebe oro. Afo emekeme ndibiere ndinam ukem oro. Biere ete ke imọ iyanam nnennen n̄kpọ ọkpọkọm idọn̄ke imọ ndinam. Ke ntak oro, bọn̄ akam dọhọ ‘Abasi anam utom ke esịt fo, man afo enyịme onyụn̄ anam.’ (Phil. 2:13) Ka iso sịn idem nam mme n̄kpọ emi ẹdinamde fi ekpere Abasi. Nen̄ede nịm ke nte ini akade ke mme n̄kpọ emi afo anamde ayanam n̄kpọ Abasi afiak ọdọn̄ fi ndinam onyụn̄ anam fi afiak ama Abasi nte ekesimade.

13. Didie ke ikeme ndidomo nse m̀mê nnyịn ke ‘idu ke mbuọtidem’?

¹³ Ke ini ke ini ọfọn idụn̄ọde idem ise nte 2 Corinth 13:5 etịn̄de. Itie oro ọdọhọ: “Ẹka iso ẹdomo ẹse m̀mê mbufo ẹdu ke mbuọtidem, ẹka iso ẹwụt se mbufo ẹdide.” Anam anam imekeme ndibụp idem nnyịn mme utọ mbụme nte: ‘Ndi n̄kpọ Abasi edi akpa ke uwem mi?’ (Matt. 6:33) ‘Ndi fịm emi nsede, ikwọ emi mbrede, ye n̄wed emi n̄kotde ẹwụt ke mmasua se idiọkde?’ (Ps. 97:10) ‘Ndi mmesinam se idinamde nditọ-ete ẹdu ke emem ẹnyụn̄ ẹdiana kiet?’ (Eph. 4:2, 3) Ini Editi edi ini emi isinen̄erede itie ikere ufak emi Jehovah ọkọnọde ke ibuot nnyịn. Ini Editi esinyụn̄ anam inyene ifet ndidụn̄ọde idem nnyịn nse, nnyụn̄ n̄kụt ete ke nnyịn idu uwem inọ Christ, idụhe inọ idem nnyịn.c

MME ERỌN̄ EMI ẸMA ẸKEYO ẸKPỌN̄ OTU-ERỌN̄

14. Nso ikeme ndinam ndusụk mme Christian ẹyo ẹkpọn̄ otu-erọn̄?

¹⁴ Ndusụk mme Christian emi ẹma ẹkenam n̄kpọ ẹnọ Jehovah ke ọfiọn̄ ifan̄ m̀mê idem ke ediwak isua ẹtre ndidụk mbono esop? Ntak-a? Mfịna ndusụk mmọ edi ke “editịmede esịt uwem emi” akan mmọ ubọk. (Luke 21:34) Eke mbon en̄wen edi ke se eyenete eketịn̄de m̀mê se eyenete akanamde akayat mmọ esịt. (Jas. 3:2) Eke ndusụk owo edi ke mmọ ẹma ẹnam akwa idiọkn̄kpọ inyụn̄ ikaha ikọdọhọ yak ẹn̄wam mmimọ. Inamke n̄kpọ m̀mê ewe ke otu oro edi mfịna okwommọ, nso ke afo ekeme ndinam ekpedi ama oyo ọkpọn̄ otu-erọn̄ Abasi? Nso ke ufak emi Jehovah ọkọnọde fi ke ima esịt ekeme ndinam yak afo anam?

15. Didie ke Jehovah owụt ke imọ imekere iban̄a mme erọn̄ emi ẹma ẹkeyo ẹkpọn̄ otu-erọn̄? (Ezekiel 34:11, 12, 16)

¹⁵ Kere nte Jehovah adade mbon emi ẹma ẹkeyo ẹkpọn̄ otu-erọn̄. Enye isịnke mmọ. Utu ke oro, enye esisan̄a oyom mme erọn̄ emi ẹma ẹkesop. Enye esibọk mmọ onyụn̄ an̄wam mmọ ẹfiak ẹnyọn̄ ẹbịne enye. (Kot Ezekiel 34:11, 12, 16.) Okûdi Jehovah ke anam ukem oro ọnọ fi? Imenịm ke enye ke anam oro! Afo ndikot ibuotikọ emi kan̄a kan̄a owụt ke isọn̄ esịt fo, ke afo oyom ndinam nnennen n̄kpọ. Jehovah ama okụt esịt fo onyụn̄ odụri fi esịn ke esop esie. Okûdi enye ke osụk odomo ndidụri fi mfiak nnyọn̄ ndi esop emi? Ekere didie?

16. Nso ikeme ndin̄wam erọn̄ emi ama okosop usụn̄ afiak ọnyọn̄ ebịne Jehovah? (Se ndise n̄ko.)

¹⁶ Ekpri ediye n̄wed emi ẹkotde Fiak Tiene Jehovah etịn̄ ikọ emi ọsọn̄ọde owo idem ete: “Nen̄ede nịm ke Jehovah ayadara fi ke ini afiakde ọnyọn̄ etiene enye. Enye ayan̄wam fi okûtịmede esịt, okûyat esịt ke ntak se mme owo ẹkenamde fi, onyụn̄ anam enyene edisana esịt man esịt ana fi sụn̄. Ndien emi ayanam afiak ekeme ndidiana ye nditọete ke esop nnam n̄kpọ Jehovah.” Ti n̄ko ke ọdọdọn̄ mbiowo ndin̄wam fi. Mmọ ẹkeme nditie “nte ebiet eke ẹdịbede ẹbọhọ ofụm ye ọtọ udak edịm.” (Isa. 32:2) Edieke edide afo amama nte Jehovah akanamde Christ edikpa afak fi, bụp idemfo ete, ‘Nso ye nso ke n̄keme ndinam idaha-emi man “[nnen̄ede] mme n̄kpọ” mbon ye Jehovah?’ (Isa. 1:18; 1 Pet. 2:25) Se uwụtn̄kpọ mi. Emekeme ndikodụk mbono esop ke Ufọkmbono Obio Ubọn̄. Emekeme ndidọhọ ebiowo kiet ke imoyom ẹn̄wam imọ ndien un̄wam emi ẹdin̄wamde fi ekeme ndisịne ndidọhọ owo edikpep Bible ye afo, edi ididịghe ke anyan ini. Nịm ke ama ọbọn̄ akam ọnọ Jehovah onyụn̄ anam mme n̄kpọ emi owụtde ke afo amama nte enye akayakde Eyen esie edikpa afak fi, Jehovah ọyọdiọn̄ fi.

NSO KE AFO EDINAM?

17-18. Nso eti n̄kpọ ke ikeme ndida ini emi odude mbemiso Editi isua emi nnam?

¹⁷ Jesus ọkọdọhọ ke ẹkenọ ufak “man owo ekededi eke ọbuọtde idem ye [imọ] okûtak edi enyene nsinsi uwem.” (John 3:16) Ufak ke Jehovah ada anyan̄a nnyịn osio ke utịp idiọkn̄kpọ ye n̄kpa. Yak owo nnyịn ekededi okûda ufak ke n̄kpọ mbubru. (Rome 3:23, 24; 2 Cor. 6:1) Mme usen emi ẹbemde Editi iso anam inyene ifet nditie n̄kere nte Jehovah ye Jesus ẹkewụtde ke imama nnyịn, ndien ima oro akpana anam nnyịn iwụt ke imama se mmọ ẹkenamde ẹnọ nnyịn.

¹⁸ Didie ke afo ediwụt ke amama nte Jesus akakpade afak fi? Se afo ọbọrọde ekeme ndidi isio ye se owo en̄wen edibọrọde. Edi nịm ete ke Jehovah ọyọdiọn̄ nsio nsio n̄kpọ emi afo anamde man ekeme ndisịne ke otu ediwak miliọn mbon emi ẹtuakde ibuot ẹnọ enye, emi ‘mîduhu uwem aba inọ idemmọ, edi ẹdude ẹnọ enye emi akakpade ọnọ mmọ onyụn̄ esetde.’​—2 Cor. 5:15.