Akpan Ikot
1. Ini ewe ke iditọn̄ọ ndikot mme owo ẹdidụk akamba mbono 2014 emi?
1 Edieke afo akpabiatde ini, abiat okụk, onyụn̄ enen̄ede esịn ukeme nditem ata edinem udia nnọ mme ufan m̀mê mbonufọk fo, anaedi idem eyenen̄ede aduai fi ke ini okotde mmọ ete ẹdidia udia emi. Kpasụk ntre, ẹnam ekese utom man ẹkeme ndinyene udia eke spirit oro ẹdinọde nnyịn ke ikpọ mbono ye mbono ofụri ererimbot eke 2014. Urua ita mbemiso ikade mbono nnyịn, iyenyene ifet ndikot mme owo ẹdidụk mbono emi. Nso idin̄wam nnyịn inọ mme owo ikot emi ye nduaidem?
2. Nso idin̄wam nnyịn isịn ifịk ikot mme owo ẹdi mbono emi?
2 Edieke itiede ikere nte nnyịn ke idem nnyịn isibọde ufọn ito nti item emi Jehovah esinọde nnyịn ke mme mbono, emi ayan̄wam nnyịn isịn idem ikot mme owo ẹdidụk mbono emi. (Isa. 65:13, 14) Nnyịn ikpenyene nditi n̄ko nte ke ikot emi isinọde mme owo ke isua ke isua esinyene ufọn. Ndusụk mbon emi ikotde ẹyetiene nnyịn ẹdụk mbono emi. Inamke n̄kpọ m̀mê owo ifan̄ ẹdidụk mbono emi, ifịk oro isịnde ndikot mme owo ayada itoro ọsọk Jehovah onyụn̄ owụt nte enye ọfọnde ido.—Ps. 145:3, 7; Edi. 22:17.
3. Didie ke ẹdinọ n̄wedikot emi?
3 Otu mbiowo ẹdibiere nte esop ẹdinọde n̄wedikot emi ke ofụri efakutom mmọ, ẹnyụn̄ ẹtịn̄ m̀mê ẹyenịm n̄wedikot ẹnọ mbon oro mîdụhe ke ufọk, mîdịghe, m̀mê ẹkeme ndinọ mmọ ke ini ẹnamde an̄wan̄wa unọ ikọ ntiense. Ke ini idemede n̄wedikot ke mme utịturua, iyọnọ mme magazine n̄ko ke ini odotde ndinam ntre. Edieke akpa Saturday ke ọfiọn̄ odụkde ke urua emi ẹnọde n̄wedikot, idisụk inọ n̄wedikot utu ke nditọn̄ọ ukpepn̄kpọ Bible. Ke ima ikokụre ndinọ n̄wedikot emi, esịt eyenem nnyịn nte ke ima isịn ifịk ikot adan̄a ediwak owo nte ikekeme ite ẹditiene nnyịn ẹbọ nti item emi Jehovah ọnọde!