◼ Mme Ini Ndutịm: Ke usen mbita emi, mbono editọn̄ọ ke n̄kanika ebede 8 usenubọk ke minit 20. Kpukpru nnyịn ikpenyene ndidu ke itie nnyịn ke ini emi man mbono ekeme nditọn̄ọ ke ido nte eyede. Ke Friday ye Saturday, mbono edisuana ke ayakde minit ition ndimia inan̄ mbubreyo; ndien ke Sunday, ke ayakde minit duop ndimia ita.
◼ Mbono Ofụri Ererimbot: Ẹyenịm mbono ofụri ererimbot ke ndusụk idụt. Ti ete ke ẹkot ndusụk esop ye ndusụk owo emi ẹtode idụt en̄wen ẹkedụk mme mbono emi ke ẹma ẹkekere ẹban̄a ibat n̄kpọitie, itie ubon moto, ye ufọkisen oro ẹdude. Edieke mme asuanetop ẹdụkde mbono ofụri ererimbot oro owo mîkotke mmọ, mme owo ẹyewak ẹkaha. Edieke mûdukemeke ndika mbono oro ẹdemede esop mbufo ẹsin edi edikade en̄wen, mbọk yak okûdi mbono ofụri ererimbot.
◼ Itie Ubon N̄kpọisan̄: Mme adaidaha ẹyedu ndiwụt mme owo itie ndibon n̄kpọisan̄. Mbọk ẹtiene ndausụn̄ mbon oro ẹsede ẹban̄a nte ẹbonde n̄kpọisan̄.—1 Cor. 13:4, 5.
◼ Edimụm Itie Nnịm: N̄kukụre mbon oro ikemede ndimụm itie nnịm nnọ ẹkpedi mbon oro ẹdụn̄de ye nnyịn m̀mê mbon oro ẹsan̄ade ye nnyịn ke n̄kpọisan̄ nnyịn, m̀mê mbon oro nnyịn isụk ikpepde mmọ Bible. Ẹnịm san̄asan̄a itie ẹnọ n̄kani owo ye mbon n̄kpọnnam. Sia itie emi ẹnịmde mi mîkponke, owo kiet m̀mê iba oro ẹsede ẹban̄a n̄kani owo emi kpọt ẹkpetiene mmọ ẹtie.
◼ Drama: Nditọete oro ẹbọbọde akamba bọkịd oro ekemede ndikwi mbon oro ẹtiede mmọ ke edem ẹkpenyene ndikere mban̄a mbon en̄wen ke ndiyarade mmọ nnịm ke mme ini drama.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itie mbono man ẹkedep udia ke ini nduọkodudu. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt ke itie mbono kaban̄a utom ofụri ererimbot. Ẹkpenyene ndiwet “Watch Tower,” nte ikọ iba, ke babru ubọ okụk ke ban̄k, oro ẹnọde.
◼ Ibọk Usọbọ: Edieke edide afo emenyene san̄asan̄a ibọk oro esidade, mbọk kụt ete ke amakama enye awak ekem, koro owo mîdinyeneke orụk ibọk emi ke itie mbono. Ẹkpenyene ndiduọn̄ọ abiabon ye n̄kpọ ukịmibọk mbon oro ẹdọn̄ọde ikịm an̄wan n̄kụhọ ke ebiet oro ẹsiduọn̄ọde mme n̄kpọ oro ẹkemede ndinọ owo unan utu ke ndidọn̄ mmọ ke n̄kpọ udọn̄ mbio itie mbono ye eke itieidụn̄.
◼ Ikpaukot: Kpukpru isua, ikpaukot esinọ mme owo unan, akpan akpan n̄kokon̄ ikpaukot. Ntre ọkpọfọn afo esịne ukeuke ikpaukot oro ekemde fi, emi ediyakde fi asan̄a ifụre ifụre mbak ududa unan.
◼ Ukpatn̄kpọ Nseknditọ ye Mme Akpakaha: Owo ikpenyeneke ndida ukpatn̄kpọ nseknditọ ye mme akpakaha ndi itie mbono. Edi ẹkeme ndida n̄kpọitie nseknditọ oro ẹkemede ndinịm n̄kpere ete ye eka ndi.
◼ Perfume: Oyowụt mfọnido edieke iduọkde esisịt m̀mê itrede-tre ndiduọk perfume emi ọsọn̄de utebe mbak edifịna mbon oro ẹnyenede utọ udọn̄ọ nte ikọn̄ obun̄wek.—1 Cor. 10:24.
◼ Babru Please Follow Up (S-43): Ẹkpenyene ndida babru Please Follow Up n̄wet n̄kpọ mban̄a owo ekededi emi owụtde udọn̄, oro ẹkwọrọde ikọ ẹnọ ke ido nneme ke ini mbono. Mme asuanetop ẹkpenyene ndikama idem kiet m̀mê iba ndi mbono. Ẹmekeme ndiyak babru oro ẹma ẹkewet n̄kpọ ẹyọhọ nnọ Itieutom Unọ N̄wed mîdịghe ẹyak ẹnọ ewetn̄wed esop mbufo ke ẹma ẹkenyọn̄ọ mbono.
◼ Itie Unyamudia ye Mme Anyam N̄kpọ: Yak nti edu fo ọnọ enyịn̄ Jehovah ubọn̄ ke itie unyamudia. Sịne n̄kpọ ke usụn̄ oro owụtde ke afo edi asan̄autom Abasi. Iwụtke eti ibuot ndika n̄kedep n̄kpọ ke ini edinam osụk akade iso.
◼ Ufọkidụn̄:
Mbọk ẹkûbọ mme ubet ẹwak ẹkan se mbufo ẹyomde, ẹkûnyụn̄ ẹyak ẹdụn̄ ke ubet ẹwak ẹkan ibat oro ẹdọhọde ẹdụn̄.
Kûdọhọ ke iyomke ubet ufọkisen oro ẹkenịmde ẹnọ fi ibọhọke n̄kpọ etịbe, nyụn̄ sọsọp sian mbonutom ufọkisen edieke n̄kpọ etịbede, man ẹkeme ndiyak mme ubet oro nnọ mbon oro ẹyomde ufọkidụn̄. (Matt. 5:37) Ekeme ndidi owo idifiakke ikpọn̄ okụk oro akawakde ekpe inọ fi edieke ntọt oro ọdọhọde ke uyomke ubet oro aba mîyọhọke usen iba.
Men ukpatn̄kpọ umen mbiomo ke ufọkisen ke ini eben̄ede idem nditan̄ mbiomo fo, nyụn̄ men kenịm ndondo oro okụrede man mbon en̄wen ẹkpekụt ẹmen.
Ẹtem udia n̄kukụre ke mme ebiet oro ẹdọhọde ẹtem. Edieke itemde udia ke ini edinam osụk akade iso, emi ediwọrọ ke nnyịn iwụtke esịtekọm iban̄a n̄kpọ Abasi.
Kûmen mme n̄kpọ oro ẹnịmde ẹnọ mme andidụn̄ ufọkisen utọ nte, uyo, swid, tea m̀mê mmịn, ukan nte akpanade emen.
Ẹwụt mbun̄wụm spirit kpukpru ini oro ẹnamde n̄kpọ ye mme anamutom ufọkisen ye mbon Itieutom Unọ Ufọkidụn̄. Mmọ ẹse ẹban̄a ata ediwak isenowo, ntre mmọ ẹyema edieke ifọnde ido, inyene ime, inyụn̄ inam n̄kpọ ke eti ibuot.
Mme ete ye eka ẹkpenyene ndikpeme nditọ mmọ kpukpru ini ke ufọkisen, ke dọmitri, m̀mê ke itie ekededi.
Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄. Ẹdụn̄ ke ebiet oro ẹnọde mbufo. Irenowo ikpenyeneke ndidu tutu eyo ọsọn̄ m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo.
Edieke mfịna odude ke ebiet oro odụn̄de, sọsọp sian Itieutom Unọ Ufọkidụn̄ ke ini osụk odude ke an̄wa mbono man mmọ ẹn̄wam fi.
◼ Utom Unyịmesịt: Owo ekededi oro akpamade ndinọ idem unyịme unyịme ekpenyene ndika Itieutom Utom Unyịmesịt ke mbono. Nditọwọn̄ oro mîyọhọke kan̄a isua 16 ẹkeme ndinam utom ye ete m̀mê eka m̀mê owo oro akamade mmọ, mîdịghe ẹnam ye akwa owo emi ete m̀mê eka m̀mê owo oro akamade mmọ enyịmede.