Kot Mme Owo Mbono
1. Ini ewe ke iditọn̄ọ ndikot mme owo ẹdidụk akamba mbono isua emi?
1 Edieke akpabiatde ini ye okụk etem ata edinem udia ọnọ mme ufan fo m̀mê mbon ubon mbufo, ndi esịt ikpenemke fi ndikot mmọ ẹdidia udia oro? Kpasụk ntre, ẹbiat ediwak ini ẹmek ata ndinem ikọ Abasi ẹnọ nnyịn ke akamba mbono isua emi. Jehovah oyom nnyịn ida urua ita mbemiso ikade mbono nnyịn, ikot mme owo ẹdidụk mbono emi. Nso idin̄wam nnyịn isịn idem ikot mme owo mbono emi?
2. Nso idinam nnyịn isịn idem ikot mme owo ẹdi akamba mbono isua emi?
2 Edieke itiede ikere ufọn emi isibọde ito nti n̄kpọ emi Jehovah esikpepde nnyịn ke mbono, emi ayanam nnyịn isịn idem ikot mme owo ẹdidụk mbono emi. (Isa. 65:13, 14) Ọfọn iti n̄ko ke ndikot mme owo mbono kpukpru isua esinyene ufọn. (Se ekebe emi, “Ndikot Mme Owo Mbono Enyene Ufọn.”) Ndusụk mbon emi ikotde ẹyetiene nnyịn ẹdụk mbono emi, edi ndusụk ididụkke. Inamke n̄kpọ m̀mê owo ifan̄ ẹdidụk, nnyịn ndisịn idem n̄kot mme owo mbono emi ayada itoro ọsọk Jehovah onyụn̄ owụt adan̄a nte enye ọfọnde ido.—Ps. 145:3, 7; Edi. 22:17.
3. Didie ke idinọ n̄wedikot mbono isua emi?
3 Otu mbiowo esop kiet kiet ẹdibiere nte ẹdinọde n̄wedikot emi ke efakutom mmọ, ẹnyụn̄ ẹtịn̄ m̀mê ẹyenịm n̄wedikot ẹnọ mbon oro mîdụhe ke ufọk, mîdịghe, m̀mê ẹkeme ndinọ mme owo ke ini ẹkwọrọde ikọ ke ebiet emi mme owo ẹsinen̄erede ẹwak. Ke ini idemede n̄wedikot ke utịturua, imekeme ndidian enye ye magazine nnọ mme owo. Ke ini urua ita emi idikotde mme owo mbono emi okụrede, esịt eyenem nnyịn ke ini itide ke ima isịn ifịk ikot adan̄a ediwak owo nte ikekeme ite ẹditiene nnyịn ẹbọ nti item emi Jehovah ọnọde!