Fiak Ka Bịne Kpukpru Mbon Oro Ẹkewụtde Ọkpọkọm Esisịt Udọn̄
1 Ediwak nnyịn idu ke akpanikọ mfịn koro owo ama okụt ke imama etop Obio Ubọn̄ onyụn̄ enyene ime afiak ebịne nnyịn—iso-ọfọn ediwak ini—man ọkọri udọn̄ oro. Kpasụk ntre nnyịn ikpenyene ndifiak n̄ka mbịne kpukpru mbon oro ẹkewụtde ọkpọkọm esisịt udọn̄. Ke akpanikọ, ndinam mfiakn̄ka edi ubak utom ‘edinam mbet’ oro ẹkedọn̄de nnyịn.—Matt. 28:19, 20.
2 Diọn̄ọ Mbon Oro Ẹwụtde Udọn̄: Idem ọkpọkọm owo ibọhọ n̄wed, iso esie, uyo ikọ esie, m̀mê nte enye etịn̄de ikọ ẹkeme ndiwụt ke enye enyene udọn̄ ke ndusụk udomo ke etop Obio Ubọn̄. Ntem nnyịn imekeme ndinam mfiakn̄ka. Eyenete kiet ama esika ebịne owo kiet oro ekenyenede udọn̄ ke ofụri urua ition ye unana edinịm n̄wed. Ke ọyọhọ utịm ikotiokiet, owo oro ama ọbọ n̄wed, ndien ke akpatre ẹma ẹtọn̄ọ ukpepn̄kpọ Bible.
3 Ke ini okụtde ke owo enyene udọn̄, sọsọp fiak ka, ndusụk usen ifan̄ ke oro ebede. Kûnọ “andidiọk” ufan̄ ndiwabade se ọkọtọde ke esịt owo oro nsio. (Matt. 13:19) Domo ndinam se ọkọn̄wọn̄ọde edieke ekenịmde ini ndifiak n̄ka.—Matt. 5:37.
4 Ke Utom Efak: Ndi emesidomo ndifiak n̄ka ke ama okokụt owo oro okowụtde udọn̄ ke ini akanamde utom ke efak m̀mê ke ini ọkọnọde ikọ ntiense ido nneme? Ke utịt nneme fo, afo emekeme ndidọhọ ete: “Mmama nneme nnyịn emi. M̀mọ̀n̄ ke n̄keme ndikụt fi man ifiak inyene nneme efen?” Ke ini odotde, ndusụk mme asuanetop ẹsinọ owo oro enyenede udọn̄ nọmba urụk ukopikọ mmọ m̀mê ẹbọ owo oro esie. Edieke mme owo ẹsiwakde ndikụt fi anamde utom ukwọrọikọ ke akpan itie ke efak ediwak ini, mmọ ẹkeme ndima ndinọ fi nọmba urụk ukopikọ m̀mê adres mmọ. Idem ọkpọkọm mmọ inyịmeke nditịn̄ nte ẹkemede ndikụt mmimọ, afo emekeme ndisụk ndomo ndikọri udọn̄ mmọ edieke afiakde okụt mmọ ke efak ini efen.
5 Ke ini se ikọtọde inyụn̄ iduọkde mmọn̄ on̄wụmde mfri nte ọfọnde, emi esinam nnyịn ikop idatesịt. Kpasụk ntre, nnyịn imekeme ndikop ekese idatesịt ke ini inamde mfiakn̄ka inyụn̄ in̄wamde mme owo ndinam n̄kọri eke spirit. (1 Cor. 3:6) Nam edi ido fo ndifiak n̄ka mbịne kpukpru mbon oro ẹkewụtde ọkpọkọm esisịt udọn̄.