Kûkpọn̄ Ima Emi Afo Ekenyenede ke Akpa
1 Jesus oro ẹnọde ubọn̄ ama ọdọhọ esop akpa isua ikie ke Ephesus ete: “Mmenyene emi ndida mbiom fi, nte ke ọmọkpọn̄ ima emi afo ekenyenede ke akpa.” (Edi. 2:4) Nte an̄wan̄ade, ediwak owo ẹma ẹkpọn̄ akpa ima oro mmọ ẹkenyenede ẹnọ Jehovah. Ke ini nnyịn ikekpepde akpanikọ, nnyịn ima ikọri ata akamba ima inọ Abasi ye mbọhọidụn̄, ndien emi ama anam isịn ifịk itan̄a obufa idotenyịn nnyịn. Nso idin̄wam nnyịn man ikûkpọn̄ ima oro ikenyenede ke akpa ikûnyụn̄ itek ke ifịk ke utom ukwọrọikọ?
2 Ọkpọkpọ Ukpepn̄kpọ ye Edidụk Mbono Esop: Ke ini ikọtọn̄ọde ndikpep akpanikọ, nso ikonụk nnyịn ndikọri ima nnọ Abasi ye mbọhọidụn̄? Ndi ikedịghe kpukpru se nnyịn ikekpepde iban̄a Jehovah ke N̄wed Abasi? (1 John 4:16, 19) Mmọdo, man ima nnyịn “ọdọdiọn̄ awak,” ana nnyịn ika iso ibọ nnennen ifiọk, inyụn̄ idụn̄ọde “ntotụn̄ọ n̄kpọ Abasi.”—Phil. 1:9-11; 1 Cor. 2:10.
3 Ke mme akpatre usen oro editịmede esịt ye mme n̄kpọ oro ẹwọn̄ọrede owo ntịn̄enyịn ẹyọhọde, ekeme ndinen̄ede nsọn̄ nditiene eti ndutịm ọkpọkpọ ukpepn̄kpọ. (2 Tim. 3:1) Ana nnyịn isio ini ke ndutịm nnyịn inịm ndida ndia udia eke spirit. Ndidụk mme mbono esop kpukpru ini n̄ko edi akpan n̄kpọ, akpan akpan nte nnyịn ‘ikụtde ite usen oro ke asan̄a ekpere.’—Heb. 10:24, 25.
4 An̄wautom: Ndibuana ifịk ifịk ke an̄wautom an̄wam nnyịn ndika iso mma Abasi nte ikamade ke akpa. Nte nnyịn ikwọrọde eti mbụk, nnyịn imesiti idem nnyịn mme ima ima un̄wọn̄ọ Jehovah, ndien emi esin̄wam nnyịn ndika iso nnyene nyayama idotenyịn ye ufiop ufiop ima. Man ikpep mme owo akpanikọ Bible, oyom nnyịn inam ndụn̄ọde man ifiọk mmọ ke idem nnyịn, ndien emi esisọn̄ọ mbuọtidem nnyịn.—1 Tim. 4:15, 16.
5 Odot inọ Jehovah kpukpru n̄kpọ, esịnede ima nnyịn. (Edi. 4:11) Kûyak ima fo ebịt. Sịn ifịk ke ọkpọkpọ ukpepn̄kpọ Bible, dụk mbono esop kpukpru ini, nyụn̄ sịn ifịk tan̄a eti mbụk man ọsọn̄ọ adan̄a ima emi afo ekenyenede ke akpa.—Rome 10:10.