Bet Jehovah

1. Nso idi ibuotikọ mbono, ndien ntak emi enye edide ekemini?

¹ Isaiah ekewet ete: ‘Jehovah edi Abasi edinen ido: ọfọfọn ọnọ kpukpru mmọ eke ẹbetde enye.’ (Isa. 30:18b) Ediwak mbụk Bible ẹdu ẹban̄ade nte Abasi ekebierede ikpe ọnọ mme asua esie onyụn̄ anyan̄ade mme anam-akpanikọ asan̄autom esie. Nso ke mme utọ mbụk oro ẹkpep mme andituak ibuot nnọ Jehovah mfịn? Nso ke nnyịn ikeme ndinam idahaemi man itịm idem inọ “akwa usen Jehovah emi enyenede ndịk”? (Joel 2:31, 32) Mbono District “Edinyan̄a Emekpere!” oro edide ayanam nnyịn ikere iban̄a mme mbụme emi inyụn̄ idụn̄ọde idem nnyịn. Enye ayan̄wam nnyịn ibet Jehovah.

2. Didie ke nnyịn ikeme ndiwụt esịtekọm mban̄a mbono district nnyịn?

² Ndi amanam ndutịm man ọbọ ufọn oto mbono usen ita emi? Ke uwụtn̄kpọ, nte afo amaka ebịne eteutom fo ndikeben̄e ini ndida ndụk mbono emi? Kûbiat ini ndinam emi. Bọn̄ akam ban̄a emi. Ekem nam eben̄e fo. (Neh. 2:4, 5) Ukem ntre, nnyịn ikpabiatke ini ndikụre ndutịm ẹban̄ade n̄kpọisan̄, ufọkidụn̄, ye mme n̄kpọ eken oro oyomde. Utọ eti ndutịm oro owụt ntotụn̄ọ esịtekọm oro nnyịn inyenede iban̄a ndutịm udia eke spirit Jehovah. Mbiowo ẹkpenyene ndidu ke edidemede ndin̄wam mbon oro ẹyomde un̄wam ẹnam ndutịm mbono mmọ, akpan akpan n̄kani owo ke esop.—Gal. 6:10.

3. Mme edu ewe ke ikọt Jehovah ẹkpewụt ke obio mbono?

³ Eti Edu Uwem Ọnọ Abasi Ubọn̄: Ke ini nnyịn isopde idem ọtọkiet ke akwa otu ke ikpọ mbono, eti edu uwem nnyịn esidi n̄kpọ ntiense ọnọ obio oro. Nso ke emi oyom oto nnyịn? Ke ini nnyịn idude ke dọmitri, ke ufọkisen, itie unyamudia, ye ke mme itie mbubehe en̄wen ke obio mbono oro, mme edu Christian nnyịn utọ nte anyanime, ifụre ifụre ido, mfara ke idem, ye eti ibuot ẹkpenyene ndinam mbon oro ẹdude ye nnyịn ẹkop idem inem. (Gal. 5:22, 23; Phil. 4:5) Kpukpru nnyịn ikpenyene ndiwụt ima oro ‘mînamke se mîdotke, mîyomke ufọn esiemmọ, mîyatke esịt.’ Idem ọkpọkọm mfịna edemede, nnyịn iyoyom ‘ndinam kpukpru n̄kpọ nnọ Abasi ubọn̄.’—1 Cor. 10:31; 13:5.

4. Didie ke mme ete ye eka ẹkeme ndin̄wam nditọ mmọ ẹdu uwem ke usụn̄ oro adade itoro ọsọk Jehovah?

⁴ Ke ẹma ẹkekụre mbono kiet, andise n̄kpọ mban̄a ufọkisen kiet ama enen̄ede okop n̄kpaidem aban̄a edu ye usụn̄ emi uyen nnyịn ekesịnede n̄kpọ tutu enye ọdọhọ ke imoyom “Mme Ntiense Jehovah ẹdidu ke ufọkisen imọ kpukpru ini.” Nso n̄kpọ idatesịt ke emi edi ntem! Emi edi utịp ukpep ye ntịn̄enyịn oro mbufo mme ete ye eka ẹnọde. Ikpowụtke eti ibuot mme ete ye eka ndisana nditọ mmọ nyak ye unana edise mmọ enyịn. Ẹkpenyene nditịm nse nditọwọn̄ enyịn kpukpru ini. (N̄ke 29:15) Eti edu uwem mmọ akpakam ada itoro ọsọk Jehovah onyụn̄ anam esịt esie adat!—N̄ke 27:11.

5. Didie ke nnyịn ikeme ndida ọfọn̄ ye ukamaidem nnyịn ntoro Jehovah?

⁵ Ọfọn̄ ye Ukamaidem Oro Odotde: Nnyịn owo kiet kiet imekeme nditịp n̄kpọ nsịn ke itoro oro ẹsinọde ke mbono ebe ke ndifep mme ido usịnen̄kpọ, mbanaidem, ye idet oro etiede n̄kon̄ine n̄kon̄ine, ebede ubọk, oro mîwụtke iso o-bụt, m̀mê etiede nsuahade nsuahade. Emi esịne ini oro ikade inyụn̄ inyọn̄de obio mbono, ye ke ini idụkde mme mbono. Nte mme asan̄autom Abasi, akpa n̄kpọ oro ebehede nnyịn edi enyịn̄ ye itoro Jehovah, idịghe n̄kpọ oro nnyịn imade m̀mê n̄kpọ oro ọnọde nnyịn inemesịt. Mme ibuot ufọk ẹnyene mbiomo ndikụt ke nte ubon mmimọ ẹkamade idem owụt nsụkidem ye eti ibuot kpukpru ini.—1 Tim. 2:9.

6. Ntak emi nnyịn ikpakamade idem ke usụn̄ oro owụtde ukpono ke ini nduọkodudu ukem nte ikakamade ke ini mbono okosụk akade iso?

⁶ Edi akpan n̄kpọ n̄ko ndikama idem ke usụn̄ oro owụtde ukpono ke ini iduọkde odudu ke dọmitri, ufọkisen, ufọkurua, ye ke mme itie unyamudia. Ọfọn isịne n̄kpọ ke usụn̄ oro odotde ke ini iwọrọde ikpọn̄ an̄wa mbono ke ikpehe edinam ama akasuana. Ndidian kad idiọn̄ọ mbono nnyịn esinọ nnyịn ifet ndinọ ikọ ntiense ido nneme.—2 Cor. 6:3, 4.

7. Didie ke nnyịn ikeme nditịp n̄kpọ nsịn ke eti ndutịm ye idatesịt mbono emi? (Se “Mme N̄kpọ Editi Mbono District.”)

⁷ Isaiah ama ebem iso etịn̄ ete: “Jehovah eyebet, man atua mbufo mbọm, oto oro n̄ko Enye ayadaha ke enyọn̄, man ọfọn ido ye mbufo.” (Isa. 30:18a) Esịtekọm oro iwụtde iban̄a mbọm ye mfọnido Jehovah oro owo mîdotke ekpenyene ndinụk nnyịn ndida edu uwem ye ukamaidem nnyịn n̄kpono enye nte nnyịn isopde idem ọtọkiet ke mme mbono nnyịn. Mbono District “Edinyan̄a Emekpere!” akpakam ọnọ Abasi nnyịn ubọn̄ onyụn̄ an̄wam nnyịn ndika iso mbet enye!

[Ekebe ke page 6]

Mme N̄kpọ Editi Mbono District

◼ Mme Ini Ndutịm: Ke Friday, ndutịm editọn̄ọ ke usenubọk ke n̄kanika ebede 9 ke minit 20, ndien ke Saturday ye Sunday, editọn̄ọ ke n̄kanika usụkkiet usenubọk. Minit ifan̄ mbemiso ikpehe edinam ọtọn̄ọde, etieibuot okpokoro eyetie ke mbot utịn̄ikọ ke adan̄aemi ẹbrede ikwọ Obio Ubọn̄ ndida ntọn̄ọ. Kpukpru nnyịn ikpenyene ndidu ke itie nnyịn ini oro man ndutịm ẹkeme nditọn̄ọ ke ido nte eyede. Ke Friday, ẹdiberi ndutịm ke mbubịteyo ke n̄kanika ebede ition ke minit ition; ke Saturday, ke ayakde minit 25 ndimia 5; ndien ke Sunday, ke ayakde minit 20 ndimia 4.

◼ Ẹdimụm Itie Nnịm: Ẹmekeme ndimụm n̄kpọitie nnịm nnọ mbon oro mbufo ẹsan̄ade n̄kpọisan̄ kiet m̀mê mbon oro ẹdụn̄de ufọk kiet.

◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itiembono man ẹkedep udia ke ini nduọkodudu uwemeyo. Mbufo ẹmekeme ndidia udia uwemeyo ke efe mbono. Mbọk ẹkûdehe itie oro ẹtiede, ẹkûnyụn̄ ẹbon mme efọk n̄kpọ ke isọn̄. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono. Mbọk ẹti ẹte ke idotke, ndien ana ẹfep edin̄wọn̄ ọkpọsọn̄ mmịn mbemiso mbono esop Christian ye ke ini ẹnamde mme utom ukara Abasi eken.

◼ Mme Etịbe: Ndidiomi mbono district esịne ekese ubiatokụk. Nnyịn imekeme ndiwụt esịtekọm ke ndinọ etịbe imaesịt kaban̄a utom ofụri ererimbot ke Ufọkmbono Obio Ubọn̄ nnyịn m̀mê ke itiembono. Ẹkpenyene ndiwet “Watch Tower” ke babru okụk ban̄k ekededi oro ẹnọde nte etịbe ke itiembono.

◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itiembono, mbọk ẹneme ye adaidaha oro odude ekpere, emi edisọpde ada owo udọn̄ọ oro aka Itieutom Akpa Usọbọ man owo oro odotde ekeme ndidụn̄ọde mfịna oro nnyụn̄ nnọ un̄wam.

◼ N̄kpọ Umụmikọ: Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itiembono, ndien ẹkeme ndikama enye n̄kukụre ke usụn̄ oro mîdifịnake mbon efen.

◼ Edisio Ndise: Edieke osiode ndise ke ini edinam osụk akade iso, mbọk kûdomo emịnen̄-mịnen̄ ikan̄.

◼ Mme Ukwak Ubọ Etop ye N̄kpri Urụk Ukopikọ: Ẹkpenyene ndinam mmọ ẹkûtịmede mbon efen.

◼ Babru Follow-Up: Ke ini ẹnyenede ikọ ntiense ido nneme ye owo ekededi oro owụtde udọn̄ ke ini mbono, ẹkpenyene ndida babru Please Follow Up (S-43) ntọt. Mme asuanetop ẹkpenyene ndida babru Please Follow Up kiet m̀mê iba ndi mbono. Babru oro oyodu n̄ko ke Itie Ubọ N̄wed ke an̄wa mbono. Ẹkeme ndikpọn̄ babru oro ẹwetde n̄kpọ ẹyọhọ nnọ Itie Ubọ N̄wed man mmọ ẹnam n̄kpọ ẹban̄a, mîdịghe ẹnọ ewetn̄wed esop ke ẹma ẹkefiak ẹnyọn̄ esop mbufo.

◼ Drama: Oyowụt ima edieke nditọete iban ẹtrede ndibọbọ ikpọ bọkịt ke usenubọk Sunday ke ini drama, sia emi mîdiyakke mbon oro ẹtiede ke edem ẹkụt se ikade iso. Oyom ẹnam emi akpan akpan ke ntak ukeuke Ufọk Mbono ye mme Ufọkmbono Obio Ubọn̄ oro ẹsidade ẹnịm mbono n̄ko.

◼ Dọmitri: Ke ẹsịmde itiembono, ẹwụt mbun̄wụm spirit ke ini ẹbọde ufọkidụn̄. Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹtem udia n̄kukụre ke mme ebiet oro ẹnọde unyịme. Ke ini edem, ẹma ẹkụt ndusụk owo ẹtemde n̄kpọ ke ini ikpehe edinam osụk akade iso. Emi edi unana ediwụt esịtekọm nnọ mme n̄kpọ eke spirit.—Luke 10:38-42.