Nte Emetịm Idem Eben̄e Akwa Usọrọ Eke Spirit?
1. Nso ntịmidem ke ẹsinam ẹben̄e akwa usọrọ?
1 Akwa usọrọ oyom akwa ntịmidem. Oyom ẹdep n̄kpọudia, ẹtem udia oro enem, ekem ẹdeme ẹnọ mme owo. Oyom ẹnam ndutịm nte ẹdidemede udia oro. N̄ko, ana ẹtịm ebiet oro ẹdinịmde usọrọ emi. Isenowo ẹnyene nditịm idem n̄ko, akpan akpan edieke mmọ ẹnyenede ndinam anyan isan̄ man ekesịm ebiet oro ẹdinịmde usọrọ oro. Okposụkedi emi esiyomde ọkpọsọn̄ utom, owo isitịghi kpukpru emi ke ini ẹtiede ye mme ufan ye mbonubon ẹdia inem inem udia. Ke mîbịghike, Mme Ntiense Jehovah ke ofụri ererimbot ẹyesop idem ọtọkiet ke ikpọ ye n̄kpri otu ndidia akamba udia eke spirit oro mmọ ẹkeben̄ede idem ẹbet, kpa Mbono District “Edu ke Ukpeme!” Ndutịm aka anyan, ẹnyụn̄ ẹbon mme n̄kpọ ke itie ke itie. Ẹkot kpukpru nnyịn itiene idibuana. Nnyịn owo kiet kiet inyene nditịm idem n̄ko man itiene idu do inyụn̄ inen̄ede ibọ ufọn.—N̄ke 21:5.
2. Nso ke oyom inam man idu ke kpukpru ikpehe usọrọ eke spirit emi?
2 Nen̄ede Bọ Ufọn: Ndi amanam ndutịm man odu ke kpukpru ikpehe usọrọ eke spirit emi? Edieke oyomde, bem iso nam eteutom fo ọfiọk ke oyodụk kpukpru ikpehe mbono emi, ọtọn̄ọde ke akpa usen. Ndi amanam ndutịm aban̄a n̄kpọisan̄ ye ufọkidụn̄? Mbiowo ẹkpenyene ndikụt ke ẹse ẹban̄a mbon usọn̄, mbon n̄kpọnnam, ye mbon en̄wen emi ẹyomde un̄wam.—Jer. 23:4; Gal. 6:10.
3. Ntak emi nnyịn mîkpodụkke mbono oro owo mîdemeke nnyịn isịn?
3 Ẹyenịm ikpọ mbono ofụri ererimbot ke ndusụk itie. Ti ete ke ẹkot ndusụk esop ye ndusụk owo emi ẹtode idụt en̄wen ẹkedụk mme mbono emi. Ke ndinam ndutịm mben̄e emi, n̄kọk itieutom ẹnenịm ibat mbon oro ẹdikotde, ke ẹma ẹkekere ẹban̄a ibat n̄kpọitie ye ufọkisen oro ẹdude. Edieke mme asuanetop ẹdụkde mbono oro owo mîdemeke mmọ isịn, mme owo ẹyewak ẹkaha.
4. Nso idin̄wam nnyịn iben̄e idem ke usen kiet kiet inọ ikpehe edinam?
4 Tịm idem man abak esịm an̄wa mbono kpukpru usen man okokụt itie etie mbemiso ndutịm ọtọn̄ọde. Da esisịt ini mbemiso ikpehe edinam ọtọn̄ọde se ndutịm oro ẹmịn̄de-mịn̄. Emi ayan̄wam fi etịm esịt eben̄e mme utịn̄ikọ oro ẹdinọde. (Ezra 7:10) Ke ini etieibuot okpokoro ikpehe edinam ọdọhọde ke ikwọukwak ọmọn̄ ọtọn̄ọ, sụhọde tie kop inem ikwọ oro ekem ben̄e idem nditiene mbuana ke ikwọ ye akam ediberede.
5. Didie ke ubon nnyịn ekeme ndinen̄ede mbọ ufọn nto ndutịm emi?
5 Edieke mbonubon ẹtiede ọtọkiet ke ini edinam akade iso, mme ete ye eka ẹyekeme ndin̄wam nditọ mmọ ẹnen̄ede ẹkpan̄ utọn̄ ẹnọ ndutịm mbono. (Deut. 31:12) Ke ini ẹkotde mme itie N̄wed Abasi, ẹsịn udọn̄ ẹnọ kpukpru owo nditiene nse Bible mmọ. Emekeme ndinen̄ede nnọ n̄kpan̄utọn̄ edieke ewetde mbio mbio akpan n̄kpọ. Nte ini akade, mme n̄kpọ oro ekewetde ayanam eti mme akpan n̄kpọ ke utịn̄ikọ oro ẹkenọde. Fep idomo editie ntịn̄ ikọ sọt-sọt-sọt ke ini ikpehe edinam osụk akade iso m̀mê ediwọrọ an̄wa ndien ndien. Edieke enyenede urụk ukopikọ oro ẹkamade-kama ẹsan̄a, kûyak enye ọwọn̄ọde ntịn̄enyịn fo m̀mê eke mbon en̄wen ke ini edinam akade iso. Ke ini ikpehe edinam usen kiet kiet okụrede, nneme mme n̄kpọ oro ekenen̄erede ama ke mme edinam kiet kiet ye mbon en̄wen.
6. San̄asan̄a ifet ewe ke isinyene ke mme mbono nnyịn, ndien didie ke ikeme ndinen̄ede ndara utọ ifet oro?
6 Ke mbono district, nnyịn imesinyene akwa ifet ndidara san̄asan̄a itie ebuana ye nditọete nnyịn, kpa itie ebuana oro mbon ererimbot mînyeneke. (Ps. 133:1-3; Mark 10:29, 30) Ke ini nduọkodudu uwemeyo, ntak mûsan̄ake ukpere mbon oro ẹtiede ẹkpere fi unyụn̄ utọn̄ọ nneme ye mmọ? Emi edi kiet ke otu mme ufọn edida mfefere udia ndi efe mbono utu ke ndiwọrọ n̄ka itie unyamudia n̄kadia n̄kpọ. Kụt ete ke emetiene esịn udọn̄ ọnọ kiet eken.—Rome 1:11, 12.
7. Nso ntịmidem ke ikpanam iban̄a ọfọn̄ oro idisịnede?
7 Ọfọn̄: Odot ẹtịm ẹfiọk ke Jehovah ama owụk nditọ Israel ete ẹnam nyeriye ẹdian ke mben ọfọn̄idem mmọ ẹnyụn̄ ẹkịm awawa erebin ẹdian ke nyeriye oro. (Num. 15:37-41) Ọfọn̄ emi eketi mmọ nte ke ẹma ẹsio mmimọ san̄asan̄a ẹnịm man ituak ibuot inọ Jehovah. Mfịn, mme ọfọn̄ oro enyenede iso-bụt, emi isisịnede idụk mbono esinam ikpụhọde ikpọn̄ mbon ererimbot. Mmọ esinọ mbon oro ẹdade ẹse nnyịn ikọ ntiense idem ke ini iwọrọde ika itie unyamudia ke edinam ama akasuana. Ntre, nen̄ede tie kere utọ ọfọn̄ oro edisịnede.
8. Didie ke ikeme ndikwọrọ ikọ nnọ mbon en̄wen ke obio mbono?
8 Nọ Ikọ Ntiense: Edieke itịmde idem ọfọn, imekeme ndikwọrọ ikọ nnọ mme owo ke obio mbono. Eyenete kiet oro akasan̄ade ye n̄wan esie aka itie unyamudia ke edinam ama akasuana ama owụt anyamudia oro kad idiọn̄ọ mbono esie onyụn̄ obụp enye ete: “Ndi omokụt ediwak owo ẹdiande kad emi ke ọfọn̄ mmọ?” Enye ama ọbọrọ ke imokụt, edi ke imọ ifiọkke se kad oro adade aban̄a. Mmọ ẹma ẹtọn̄ọ nneme, ndien eyenete oro ama okot enye edi mbono oro.
9. Didie ke ikeme ndiwụt esịtekọm nnọ Jehovah, kpa Andikot nnyịn udia emi?
9 Okposụkedi emi edide nditọete nnyịn ẹdinọ kpukpru utịn̄ikọ, ẹnam ndụn̄ọde, ye mme nnamn̄wụt, Jehovah, kpa Ete nnyịn eke heaven edi Andinọ nnyịn akpakịp udia eke spirit emi kpukpru isua. (Isa. 65:13, 14) Iwụt esịtekọm inọ Andikot nnyịn udia emi ke ndidu kpukpru usen nnyụn̄ nnen̄ede ndia kpukpru udia eke spirit oro enye ọnọde nnyịn. Ndi omotịm idem edifọn edifọn man etiene adia udia eke spirit emi?
[Ekebe ke page 6]
Se Ẹtide Owo Ẹban̄a Mbono District
◼ Mme Ini Ndutịm: Ke usen mbita emi, ndutịm editọn̄ọ ke usenubọk ke n̄kanika ebede 9 ke minit 20. Ke ini ẹtọtde ikwọ ediberede, kpukpru nnyịn ikpenyene ndidu ke itie nnyịn man ndutịm ekeme nditọn̄ọ ke ido nte eyede. Ke Friday ye Saturday, mbono edisuana ke ayakde minit ition ndimia n̄kanika ition mbubreyo; ndien ke Sunday, ke n̄kanika inan̄ mbubreyo. Ke ikpọ mbono ofụri ererimbot, ẹditọn̄ọ edinam ke uwemeyo Thursday ke n̄kanika ebede kiet ke minit 20 ẹnyụn̄ ẹberi ke mbubreyo ke ayakde minit 15 ndimia n̄kanika 5.
◼ Itie Ubon N̄kpọisan̄: Mme adaidaha ẹyedu ke kpukpru an̄wa mbono ndiwụt mme owo ebiet oro ẹdibonde n̄kpọisan̄ mmọ. Mbọk ẹbere ye mmọ.—1 Cor. 14:40.
◼ Edimụm Itie Nnịm: N̄kukụre mbon oro ẹkemede ndimụm itie nnịm nnọ ẹdi mbon oro ẹsan̄ade ye mbufo ke n̄kpọisan̄ mbufo m̀mê mbon oro ẹdụn̄de ye mbufo.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itiembono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia, mme ọtọ-akpa, ye ọkpọsọn̄ mmịn ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt nsịn ke mme ekebe etịbe ke Ufọkmbono Obio Ubọn̄ nnyịn m̀mê ke itiembono kaban̄a utom ofụri ererimbot. Ẹkpenyene ndiwet “Watch Tower,” nte ikọ iba, ke babru ubọ okụk ekededi oro ẹnọde nte etịbe ke itiembono.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itiembono, mbọk ẹneme ye adaidaha oro odude ekpere, emi edisọpde an̄wam man ẹmen owo udọn̄ọ oro ẹka Itieutom Akpa Usọbọ oro mme ọnọ usọbọ emi ẹdotde, emi ẹdude ke itiembono ẹkemede ndise nte idem esie ọdiọkde eketre nnyụn̄ nnọ un̄wam.
◼ N̄kpọ Umụmikọ: Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itiembono, edi ẹkeme ndikama enye n̄kukụre ke usụn̄ oro mîdifịnake mbon efen.
◼ Ukpatn̄kpọ Nseknditọ: Owo ikpenyeneke ndida ukpatn̄kpọ nseknditọ ndi itiembono. Edi ekeme ndida n̄kpọitie nseknditọ oro ekemede ndinịm n̄kpere ete ye eka ndi.
◼ Drama: Idiwụtke ima edieke nditọete iban ẹbọbọde ikpọ bọkịt ke uwemeyo Sunday ke ini drama, sia emi mîdiyakke mbon oro ẹtiede ke edem ẹkụt se ikade iso. Ẹtịn̄ emi akpan akpan ke ntak ukeuke usụn̄ oro ẹbọpde Ufọk Mbono ye mme Ufọkmbono Obio Ubọn̄ oro ẹsidade ẹnịm mbono n̄ko.—1 Cor. 10:24.
◼ Ufuọn̄: Oyowụt mfọnido edieke iduọkde esisịt m̀mê itrede ndidọduọk ufuọn̄ nte perfume emi ọsọn̄de utebe mbak edifịna mbon oro ẹnyenede utọ udọn̄ọ nte ikọn̄ obun̄wek.—Phil. 2:4.
◼ Babru Follow-Up: Ke ini ẹnyenede ikọ ntiense ido nneme ye owo ekededi oro owụtde udọn̄ ke ini mbono, ẹkpenyene ndida babru Please Follow Up (S-43) ntọt. Mme asuanetop ẹkpenyene ndida babru Please Follow Up kiet m̀mê iba ndi mbono. Ẹkeme ndikpọn̄ babru oro ẹwetde n̄kpọ ẹyọhọ nnọ Itie Ubọ N̄wed man mmọ ẹnam n̄kpọ ẹban̄a, mîdịghe ẹnọ ewetn̄wed esop ke ẹma ẹkefiak ẹnyọn̄ esop mbufo.
◼ Itie Unyamudia ye Mme Anyam N̄kpọ: Yak nti edu fo ẹnọ enyịn̄ Jehovah ubọn̄ ke ini akade itie unyamudia. Iwụtke eti ibuot ndikedep n̄kpọ ke ini edinam osụk akade iso. Ọkpọfọn nnyịn idep se ededi oro iyomde mbemiso mbono ọtọn̄ọde m̀mê ke mbono ama asuana.
◼ Mme Ufọkidụn̄: (1) Ke ẹsịmde itiembono, ẹnam n̄kpọ nte mbon emi spirit Abasi adade usụn̄ ke ini ẹbọde ufọkidụn̄. (2) Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹdụn̄ ke ebiet oro ẹnọde mbufo. (3) Nditọete iren ikpenyeneke ndidu nsịm ufọt okoneyo m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo. (4) Edieke mfịna odude ke ebiet oro odụn̄de, sọsọp dọhọ itieutom oro ẹsede ẹban̄a ufọkidụn̄ ke ini osụk odude ke an̄wa mbono. (5) Edieke ẹnọde fi ufọkidụn̄ ke ufọkisen, tiene ndausụn̄ oro mme andise mban̄a ufọkisen oro ẹnọde. (6) Ẹtem udia n̄kukụre ke mme ebiet oro ẹnọde unyịme. (7) Ẹkûtem udia ke ini edinam osụk akade iso sia emi edi unana ediwụt esịtekọm nnọ mme n̄kpọ eke spirit.—Luke 10:38-42.