Mme Ukpụhọde Oro Ẹnamde Ẹban̄a Edida Ufọkmbono Obio Ubọn̄ Ndian Ndọ ke Nigeria
1 Kiet ke otu akpan edinam oro esidade itie ke Ufọkmbono Obio Ubọn̄ eke Mme Ntiense Jehovah edi udian ndọ. (Gen. 2:24) Ke adianade ye edinam se ibet oyomde, enyene mme ndutịm esop oro anade mbon oro ẹmekde ndida Ufọkmbono Obio Ubọn̄ nnam ndọ mmọ, ẹtiene. Ibuotikọ emi eneme ndusụk ukpụhọde ke ndutịm oro ndusụk owo ẹkesitienede ke ini edem.
2 Ke Nigeria, Mme Ntiense Jehovah ẹkeme ndinam kiet ke otu ndọ iba emi: ndọ ido obio m̀mê ndọ ukara. Okposụkedi ukara ye N̄wed Abasi ẹnyịmede ndọ ekededi ke otu ndọ mbiba emi, edi akpan n̄kpọ ndifiọk nte ke mmọ ẹkpụhọde ye kiet eken. Didie ke mmọ ẹkpụhọde?
3 Ndọ Ido Obio: Ndọ ido obio ekeme ndikpụhọde ke nsio nsio itie. Nte ededi, ke Nigeria, odu ndusụk n̄kpọ oro esopikpe oyomde ẹnam man ndọ edi ndọ ido obio. Ndondo oro ẹnamde ndọ emi ebe ke ndikpe n̄kpọ ndọ nnyụn̄ nyak n̄wanndọ nnọ, eren ye n̄wan emi ẹkabade ẹdi ebe ye n̄wan ndien emi ekem ye ibet, onyụn̄ ekem ye N̄wed Abasi.
4 Okposụkedi ndọ ido obio enende idem ke ini owo mîsịnke enye ke n̄wed, oyoyom mme ọdọ ndọ emi ẹsịn ndọ mmọ ke n̄wed edieke mmọ ẹyomde ndinyene mme ifetutom efen efen ke esop. Ndisịn ndọ emi ke n̄wed ekpeme mme ọdọ ndọ ye nditọ mmọ. Ntre, mbiowo ẹkpenyene ndinen̄ede nsịn udọn̄ nnọ mme ọdọ ndọ Christian ndisịn ndọ ido obio mmọ ke n̄wed ke ndondo oro ẹkụrede ndọ oro. Ẹsiwak ndisịn ndọ emi ke n̄wed ke ukara n̄kann̄kụk oro ẹnamde ndutịm ndisịn ndọ ido obio ke n̄wed.
5 Ndọ Ukara: Ọyọhọ ndọ iba oro ẹnyịmede ke mbet Nigeria edi ndọ ukara. Ke ndọ ukara, eren ye n̄wan oro ẹyomde ndidọ ndọ ẹsinam un̄wọn̄ọ ke iso owo oro ẹnọde odudu ndidian utọ ndọ oro. Ke adianade do, ana ntiense iba ke nsụhọde n̄kaha ẹdu do, ndien mbon oro ẹyomde ndidọ ndọ ọkọrọ ye ntiense iba emi ẹyesịn ubọk ke n̄wed ke ini edinam oro. Owo iyomke unyịme ito mbonubon mbon oro ẹyomde ndidọ ndọ mi m̀mê ndiyom ẹkpe n̄kpọ ndọ ke ndọ enye emi. Edi ke Nigeria, ukara enyịme ẹda ndusụk Ufọkmbono Obio Ubọn̄ ẹnam ndọ ukara.
6 Ke Ini Ẹdiande Ndọ Ido Obio ye Ndọ Ukara Ẹnam: Ke ediwak isua idahaemi, edi ọsọ n̄kpọ ediwak Ntiense ndinam ndọ ido obio ndien ekem ẹfiak ẹnam ndọ ukara ke Ufọkmbono Obio Ubọn̄. Ndusụk mmọ ẹkeme ndikere ke inam emi man owụt ke imesịn ndọ ido obio mmimọ ke n̄wed. Nte ededi, edi akpan n̄kpọ nditi nte ke ndọ ido obio ye ndọ ukara ẹdi ata nsio nsio ndutịm oro N̄wed Abasi ye ibet enyịmede. Ntre ke nditịm ntịn̄, ediwụt ke owo anam ndọ iba edieke mbon oro ẹyomde ndidọ ndọ ẹnamde ndọ ido obio, ekem ẹfiak ẹka Ufọkmbono Obio Ubọn̄ ndinam ndọ ukara.
7 Akpan edumbet oro odude mi edi nte ke edieke ebiereikpe m̀mê owo ekededi oro ẹnọde odudu ndidian ndọ adiande owo iba oro ẹnyenede ifụre ndidọ ndọ, do ndọ oro enen ke iso Abasi ye ke esop Christian. Ndinam ‘ndọ ido ukpono’ ke ediwak ọfiọn̄ m̀mê isua ke ukperedem ediwọrọ n̄kpọ efen. N̄ko, edieke eren ye n̄wan ẹnamde ndọ ido obio, emi enen ke iso Abasi ye ke esop Christian. Ntem idotke, owo inyụn̄ iyomke eren ye n̄wan oro ẹma ẹkenanam ndọ ido obio ẹfiak ẹkenam ndọ ukara ke Ufọkmbono Obio Ubọn̄ oro ẹnọde unyịme ndida nnam ndọ ukara.
8 Ndida Ufọkmbono Obio Ubọn̄ Nnam Ndọ Ukara: Ẹtienede se ẹtịn̄de ke enyọn̄ emi, idotke eren ye n̄wan oro ẹma ẹkenanam ndọ ido obio ẹfiak ẹnam ndọ ukara ke Ufọkmbono Obio Ubọn̄. Edieke mmọ ẹyomde ẹnọ utịn̄ikọ ke Ufọkmbono Obio Ubọn̄, ẹkeme ndinam ndutịm mban̄a emi, edi owo ikpanamke ndutịm ndọ ukara eken utọ nte edisịn ubọk ke mme n̄wed oro ibet enyịmede. Oyom ọdọ ndọ kiet kiet ebiere utọ ndọ oro mmọ ẹyomde ndinam, edide eke ido obio m̀mê eke ukara. Akpan n̄kpọ oro anade ẹnyene ke ekikere edi ke ukara ye N̄wed Abasi ẹnyịme ekededi ke otu ndọ iba emi.
9 Ke ikerede iban̄a se ẹnemede mi, owo ididaha aba mme Ufọkmbono Obio Ubọn̄ ke Nigeria inam ndọ ukara edieke mme ọdọ ndọ ẹma ẹkenanam ndọ ido obio. Edieke mme ọdọ ndọ ẹnamde ndọ ido obio, do idiyomke ẹnam ndọ ukara ke itie usịn ndọ ke n̄wed. Edieke mme ọdọ ndọ oro ẹdide mme Christian ẹmekde n̄ko ndinam ndọ ukara ke itie usịn ndọ ke n̄wed (idịghe ke Ufọkmbono Obio Ubọn̄), oro edidi ọkpọkpọ mbubehe. Idịghe udiana ndutịm oro ekemde ye ibet do anam oro edi ndọ. Ke emi, ntak ndomokiet idụhe ndinam ndutịm nnọ utịn̄ikọ m̀mê usọrọ ndọ. Ke n̄kan̄ eken, idiyomke, idinyụn̄ idotke mbon oro ẹyomde ndidọ ndọ ndinam ndọ ukara ndien ekem ẹfiak ẹnam ndọ ido obio.
10 Utịn̄ikọ Bible: Edieke mme ọdọ ndọ oro ẹdide mme Christian ẹyomde ẹnọ ibio ibio utịn̄ikọ Bible aban̄ade ndọ ke ẹma ẹkenam ndọ ido obio m̀mê ndọ ukara ẹma, mmọ ẹkeme ndibọ otu mbiowo n̄kann̄kụk unyịme man ẹnọ utịn̄ikọ ndọ mmọ ke Ufọkmbono Obio Ubọn̄, edide ẹma ẹbọ ukara unyịme ndisidian ndọ do m̀mê owo ikọbọhọ. Ke ini ẹnamde emi, “ikpọfọnke ediwak usen” ẹbe mbemiso ẹnọde utịn̄ikọ oro. (w97-EF 4/15 p. 24, ikp. eki. 1) Ekpetịm ọfọn edieke ẹkpenọde utịn̄ikọ Bible ke Ufọkmbono Obio Ubọn̄ ke ukem usen oro ẹnamde ndọ ido obio m̀mê ndọ ukara, mîdịghe ke ndan̄nsiere. Edieke ediwak usen ẹbede tọn̄ọ nte ẹkenam ndọ tutu ẹsịm usen oro ẹdinọde utịn̄ikọ Bible, etie nte utịn̄ikọ oro iditịmke inyene ufọn. Utịn̄ikọ Bible ekpenyene ndiwụt uku ye ukpono. Enye ekpenyene ndikọn̄ọ ke N̄wed Abasi, esịne ufiop, onyụn̄ ọsọn̄ọ owo idem ke n̄kan̄ eke spirit, idịghe ke ufọn mme ọdọ ndọ kpọt edi n̄ko ke ufọn mme andidụk. Ke adianade do, ndutịm oro ẹnamde ẹnọ utịn̄ikọ oro ikpenyeneke ndinam mme owo ẹkere ke ọyọhọ ndọ iba ke ẹnam.
11 Kpukpru owo ke esop Christian ẹfiọk ke ndọ edi edisana ndutịm. Ke ntre, edide mbon oro ẹyomde ndidọ ndọ ẹmek ndinam ndọ ido obio m̀mê ndọ ukara, mmọ ẹnyene ndidomo ofụri ukeme ndinam ‘ih mmọ edi ih’ ke un̄wọn̄ọ oro mmọ ẹken̄wọn̄ọde ndinyịme ndidọ kiet eken. (Matt. 5:37; 19:6) Ke ini ẹdade ndọ ke n̄kpọ “ukpono” ntre, mme owo ẹyetoro enyịn̄ Jehovah ẹnyụn̄ ẹka iso ndinịm n̄kokon̄ edumbet Esie emi ẹban̄ade ndọ.—Heb. 13:4.