Da Mme N̄kpọ Oro Ẹkemede Ndikụt ke Enyịn Kpep N̄kpọ
1. Didie ke Jehovah akada mme n̄kpọ oro ẹkemede ndikụt ke enyịn ekpep mme asan̄autom esie n̄kpọ ke eset, ndien nso ikedi utịp?
1 Ke ndusụk ini, Jehovah ama esida n̄kukụt ye ndap ọnọ akpan etop ẹsọk mme asan̄autom esie ke eset. Kere ban̄a n̄kukụt Ezekiel aban̄ade chariot Jehovah eke enyọn̄. (Ezek. 1:1-28) Kam kere nte eketiede Daniel ke idem ke ini enye akadabade ndap oro aban̄ade udịm udịm odudu ukara ererimbot. (Dan. 7:1-15, 28) Ndien nso kaban̄a aduai-owo-idem n̄kpọ oro ẹkeyarade ẹnọ apostle John “ke mme idiọn̄ọ” ẹban̄ade mme n̄kpọ oro ẹditịbede ke “usen Ọbọn̄”? (Edi. 1:1, 10) Jehovah ama ada in̄wan̄-in̄wan̄ ye okopodudu n̄kpọ oro mme prọfet oro mîdifreke ekpep mmọ n̄kpọ.
2. Nso ke ikeme ndida n̄kpep mbon efen akpanikọ Bible?
2 Edieke iyomde ndinam akpanikọ Bible an̄wan̄a mme owo ke usụn̄ oro mmọ mîdisọpke ifre, nnyịn imekeme n̄ko ndida mme vidio nnyịn n̄kpep mmọ n̄kpọ. Mme vidio nnyịn ẹneme ata ediwak ibuotikọ ẹnyụn̄ ẹnam nnyịn ibuọt idem ke Bible, esop Jehovah, ye mme edumbet oro ẹnamde nnyịn idu uwem nte mme Christian. Kere ban̄a usụn̄ ifan̄ oro ikemede ndida mme vidio nnyịn n̄kpep n̄kpọ. Emi ẹdi mme vidio oro nnyịn ikemede ndida n̄kpep mme owo n̄kpọ.
3. Nso ke afo ekeme ndida mmen eyen ukpepn̄kpọ Bible n̄wụt esop?
3 Ke An̄wautom: Ndi emesitịn̄ ọnọ eyen ukpepn̄kpọ Bible fo aban̄a nditọete Christian nnyịn emi ẹdude ke ofụri ererimbot? Wụt enye vidio Our Whole Association of Brothers. Nọ enye vidio emi ese mbemiso afiakde aka ndikpep enye n̄kpọ mîdịghe tie ye enye se vidio emi ke ini efen oro enịmde ukpepn̄kpọ Bible. Ekem neme mme mbụme ndụn̄ọde oro ẹdude ke Utom Obio Ubọn̄ Nnyịn eke June 2002.
4. Ewe n̄kpọutom oro ọnọde ukpep ke uyen Ntiense ekeme ndida n̄kpep mme owo n̄kpọ ke ufọkn̄wed?
4 Mme uyen, mbufo ẹmekeme ndidọhọ andikpep mbufo ke mmimọ ikpama ndiwụt nditọ ubet ukpepn̄kpọ mmimọ vidio oro Jehovah’s Witnesses Stand Firm Against Nazi Assault m̀mê Faithful Under Trials—Jehovah’s Witnesses in the Soviet Union. Dọhọ ke iyetịm mme mbụme oro idibụpke mmọ ke ubet ukpepn̄kpọ, adade mme mbụme oro ẹdude ke Utom Obio Ubọn̄ Nnyịn eke June 2001 m̀mê eke February 2003.
5. Nso ke mme ete ye eka ẹkeme ndida n̄kpep n̄kpọ ke mme ini ukpepn̄kpọ ubon?
5 Nditie ye Ubon ye Mme Ufan: Mme ete ye eka, ẹkere nte nditọ mbufo ẹkponde idahaemi tọn̄ọ nte ẹkesio vidio oro Young People Ask—How Can I Make Real Friends? Ntak emi mbufo mîfiakke ise vidio emi ini efen emi ẹnịmde ukpepn̄kpọ ubon? Utom Obio Ubọn̄ Nnyịn eke April 2002 enyene mme mbụme oro ẹkemede ndinam ẹnyene inem inem ye in̄wan̄-in̄wan̄ nneme.
6. Didie ke afo ekeme ndinyene inem inem ini ye mme ufan?
6 Ndi emenyene mme ufan ke esop oro oyomde ndikot ufọk? Mbubreyo oro ekeme nditie inem inem edieke ẹsede vidio Respect Jehovah’s Authority ọtọkiet, ẹnyụn̄ ẹnemede mme n̄kpọ oro ẹkpepde ẹto vidio oro, ẹdade mme mbụme oro ẹdude ke Utom Obio Ubọn̄ Nnyịn eke September 2004.
7. Mme ifet ewe ke afo ekeme ndida mme vidio nnyịn nnam n̄kpọ?
7 Mme Ifet Efen: Ke ewe usụn̄ efen ke afo ekeme ndida nsio nsio vidio 20 oro inyenede nnam n̄kpọ? Ndi afo ndiwụt owo oro afo esifiakde ekese kpukpru ini vidio kiet m̀mê iba ekeme ndinam enye anam n̄kọri ke n̄kan̄ eke spirit? Ndi emekeme ndiwụt vidio emi ke itie oro ẹsisede ẹban̄a mbon usọn̄ ye mbon n̄kpọnnam m̀mê nditọakpa ke n̄kann̄kụk mbufo? Nte mme vidio emi ẹyenyene ufọn ẹnọ iman, mme mbọhọidụn̄, ye nsan̄autom fo oro mîdịghe mme Ntiense? Mme vidio nnyịn ẹsidemede owo udọn̄, ẹkpep owo n̄kpọ, ẹnyụn̄ ẹnyene ufọn. Da mmọ kpep mbon en̄wen n̄kpọ.