Ndutịm Ubon—Utom An̄wautom Ubon
1 Jehovah esinem esịt ndikụt n̄kpri owo ẹtorode enyịn̄ imọ. (Ps. 148:12, 13) Ke eyo Jesus, ‘nseknditọ ye mmọ eke ẹwapde eba ẹma ẹnọ Abasi itoro.’ (Matt. 21:15, 16) Ntre n̄ko ke edi mfịn. Mme ete ye eka, didie ke mbufo ẹkeme ndin̄wam nditọ mbufo ẹkabade ẹdi ifịk ifịk mme anditoro Jehovah ke utom ukwọrọikọ Christian? Ini kiet efen, nte ẹkesiode ẹwụt ke ibuotikọ eke enyọn̄ emi, oro aban̄ade mme mbono esop, akpan n̄kpọ oro ẹyomde edi uwụtn̄kpọ oro mbufo ẹnịmde. Ete kiet eketịn̄ ke ibuot mme ete ye eka ke ini enye ọkọdọhọde ete: “Nditọ isinamke se afo ọdọhọde mmọ ẹnam; mmọ ẹsinam se afo anamde!”
2 Eyenete an̄wan kiet emi ete ye eka oro ẹbakde Abasi ẹkebọkde ama eti ete: “Akananam nnyịn idemekede idap ke usenubọk Saturday ibụp m̀mê nnyịn iyetiene ika utom ukwọrọikọ. Nnyịn ima isifiọk ke iyetiene ibuana.” Ukem ntre, afo emekeme ndinam nditọ fo ẹfiọk nte utom ukwọrọikọ edide akpan n̄kpọ ebe ke ndinam edi edinam ofụri ini nditiene mbuana ke utom an̄wautom nte ubon ke kpukpru urua. Ke usụn̄ emi, nditọ fo ẹyekpebe fi, ndien emi n̄ko ayan̄wam fi ndise edu, usụn̄ unam n̄kpọ mmọ, ye nte mmọ ẹnamde n̄kọri.
3 Ukpep Oro Akade-Ka Iso: Man nditọ ẹkop inem utom ukwọrọikọ, oyom ẹtịm mmọ idem man mmọ ẹtiene ẹbuana mfọn mfọn. Eyenete an̄wan oro ikokotde ito ke mbemiso ama ọdọhọ n̄ko ete: “Akananam nnyịn ikedịghe mbon oro inyụn̄ itienede-tiene ete ye eka nnyịn isan̄a ke utom mmọ. Nnyịn ima ifiọk ite ke imenyene udeme, idem ọkpọkọm edi edikọn̄ usụn̄ufọk nnyụn̄ nnọ n̄wedikot. Ebede ke eti ntịmidem mbemiso utom utịturua kiet kiet, nnyịn ima ifiọk se nnyịn iditịn̄de.” Emekeme ndinọ nditọ fo utọ ukpep oro ebe ke ndida esisịt ini ke urua kiet kiet ntịm mmọ idem nnọ an̄wautom, edide ke ini ukpepn̄kpọ ubon m̀mê ke ini efen.
4 Ndikwọrọ ikọ ọtọkiet nte ubon ọnọ fi ifet efen ndisịn akpanikọ ke esịt nditọ fo. Ete kiet emi ekedide ọkwọrọikọ ama esida eyen esie an̄wan ke ini enye ekesisan̄ade kilomita 10 aka ndisuan tract nnọ mme andidụn̄ obio-in̄wan̄ ke itịghede emi okodude ekpere. Enye ama eti inem inem ete: “Ekedi ke mme ini isan̄ oro ke ete mi ekesịn mi akpanikọ ke esịt.” (Deut. 6:7) Mbufo ndinam utom an̄wautom edi ubak ndutịm ubon eke urua ke urua akpakam ada edidiọn̄ ntre ọsọk mbufo.