Ẹkpep Nditọ Mbufo Ẹtoro Jehovah
1. Nte nditọwọn̄ ẹkeme nditoro Jehovah?
1 Psalm 148:12, 13 esịn udọn̄ ọnọ nditọwọn̄ ‘nditoro enyịn̄ Jehovah.’ N̄wed Abasi ọdọn̄ọ ediwak uwụtn̄kpọ n̄kpri owo oro ẹkenamde ntre. Ke uwụtn̄kpọ, “Samuel [ama] anam n̄kpọ ke iso Jehovah, nte eyenọwọn̄.” (1 Sam. 2:18) “Ekpri eyen-an̄wan kiet” ama ọdọhọ n̄wan Naaman ke prọfet Jehovah emi odude ke Israel ekeme ndikọk akpamfia Naaman. (2 Ndi. 5:1-3) Ke ini Jesus okodụkde temple onyụn̄ anamde mme utịben̄kpọ, n̄kpri “nditọiren” ẹma ẹfiori ẹte: “Mbọk, nyan̄a Eyen David!” (Matt. 21:15) Didie ke mme ete ye eka ẹkeme ndikpep nditọ mmọ nditoro Jehovah?
2. Ntak edide akpan n̄kpọ mme ete ye eka ndinịm eti uwụtn̄kpọ nnọ nditọ mmọ?
2 Uwụtn̄kpọ: Ẹma ẹteme mme ete ke Israel ndibem iso mma Jehovah nnyụn̄ nsịn mbet esie ke esịt mmọ mbemiso ẹkpepde nditọ mmọ ndima Abasi. (Deut. 6:5-9) Edieke mbufo ẹsisịnde udọn̄ ẹnọ utom ukwọrọikọ, ẹnyụn̄ ẹnamde enye edi ubak ndutịm mbufo eke urua ke urua, nditọ mbufo ẹyenen̄ede ẹda utom emi nte akpan n̄kpọ ye nte n̄kpọ oro ekemede ndinọ uyụhọ.
3. Didie ke eyenete an̄wan kiet ọkọbọ ufọn oto uwụtn̄kpọ ete ye eka esie?
3 Eyenete an̄wan kiet ama eti ete: “Ke ini n̄kedide eyenọwọn̄, n̄kpọ oro ubon nnyịn ẹkesiwakde ndinam ama esịne edibuana ke utom an̄wautom kpukpru utịturua. Mma n̄kụt ke ete ye eka mi ẹnen̄ede ẹma utom ukwọrọikọ. Nte isụk ikọride, nnyịn ima ida utom ukwọrọikọ nte n̄kpọ oro ọnọde inemesịt.” Eyenete an̄wan emi ama akabade edi asuanetop oro mînaha kan̄a baptism ke ini enye ekedide isua itiaba ndien ọyọhọ isua 33 edi emi nte enye okodụk utom uyọhọ ini.
4. Nso ke ọwọrọ ndinọ nditọwọn̄ ukpep oro akade-ka iso?
4 Ukpep Oro Akade-Ka Iso: Ke ini ẹdude ke an̄wautom, ẹnam nditọ mbufo ẹtiene ẹbuana. Mmọ ẹkeme ndimia n̄kanika enyịnusụn̄ m̀mê ndikọn̄ usụn̄ufọk, ẹnọ enyeneufọk tract, m̀mê ẹkot itie Bible. Emi eyetịp esịn ke inemesịt mmọ onyụn̄ an̄wam mmọ ẹnyene mbuọtidem ke ukeme mmọ ndisuan etop Obio Ubọn̄. Nte mmọ ẹkọride ẹkpon, mmọ ẹyenam akwa n̄kọri ke utom ukwọrọikọ. Ke ntre, ẹn̄wam mmọ ẹnam n̄kọri ẹnyụn̄ ẹkere ẹban̄a mme utịtmbuba eke spirit.
5. Nso ke oyom man eyenọwọn̄ odot ndidi asuanetop oro mînaha kan̄a baptism?
5 Ẹneme ye mbiowo ke ndondo oro ẹkụtde ke nditọ mbufo ẹdot ndikabade ndi mme asuanetop oro mînaha kan̄a baptism, ye ke ini mmọ ẹdọhọde mbufo ke ikpama ndikabade ndi. Ndikabade ndi asuanetop ayanam mmọ ẹfiọk ke idem mmọ ke imenyene mbiomo nditoro Jehovah. Ẹti ẹte ke iyomke eyenọwọn̄ ọfiọk n̄kpọ nte akwa owo oro ama akana baptism mbemiso enye ekeme ndidot. Nte eyen fo ọfiọk mme akpan ukpepn̄kpọ Bible? Ndi enye odu uwem ekekem ye mme idaha ido uwem Bible? Nte enye oyom ndibuana ke an̄wautom onyụn̄ oyom ẹdiọn̄ọ imọ nte kiet ke otu Mme Ntiense Jehovah? Edieke edide ntre, mbiowo ẹkeme ndien ndidọhọ ke enye odot ndidi asuanetop oro mînaha kan̄a baptism.—Se Ẹtịm man Inam Uduak Jehovah, p. 79-82.
6. Ntak emi ọfọnde mme ete ye eka ndinọ nditọ mmọ ukpep-e?
6 Oyom ukeme man ẹkpep nditọwọn̄ ndida esịt mmọ ntoro Jehovah. Nte ededi, inyeneke n̄kpọ oro esinen̄erede ọnọ mme ete ye eka idatesịt nte ndikụt nditọ mmọ ẹnamde n̄kọri ke n̄kan̄ eke spirit. Se idide akpan n̄kpọ ikan edi ke Jehovah esikop inemesịt ke ini nditọwọn̄ ẹtan̄ade mme utịbe utom esie.