Ndutịm Ubon—Mme Mbono Esop
1 Edieke afo edide ete m̀mê eka oro edide Christian, afo oyom nditọ fo ẹkọri ẹdima ẹnyụn̄ ẹnam n̄kpọ Jehovah ndien, ke akpatre, ẹnyene nsinsi uwem ke obufa ererimbot oro Abasi ọn̄wọn̄ọde. Didie ke afo ekeme ndin̄wam mmọ ẹnịm utuakibuot Jehovah akpa ke uwem mmọ? Akpan usụn̄ kiet ndinam emi edi ke uwụtn̄kpọ oro afo enịmde. (N̄ke 20:7) Ke etide uwụtn̄kpọ eka esie emi edide andinịm ke akpanikọ, eyenete an̄wan kiet ọkọdọhọ ete: “Akananam nnyịn ikeyịkke m̀mê nnyịn iyaka mbono esop m̀mê idikaha.” Enye idifreke uwụtn̄kpọ emi tutu amama.
2 Nte ubon fo ọfiọk uduak mbono esop? Mme item oro nnyịn isibọde ke mme mboho emi ẹsinọ nnyịn odudu ndika iso nnam uduak Abasi, ndien itie ebuana oro nnyịn isinyenede ye nditọete nnyịn esinọ ata akwa nsịnudọn̄. (Isa. 54:13; Rome 1:11, 12) Nte ededi, akpan uduak mme utọ mbono esop oro edi man ẹnọ Jehovah itoro “ke otu mbon-esop.” (Ps. 26:12) Mme mbono esop Christian ẹnọ nnyịn ifet ndiwụt ima oro imade Jehovah nnyụn̄ n̄kpono enye.
3 “Ẹtịm Ẹkpeme”: Ndiwụt esịtekọm mban̄a eti uduak oro esinamde ẹnịm mme mbono esop oyonụk nnyịn ‘itịm ikpeme’ mbak nnyịn sụn̄sụn̄ idiyak mme n̄kpọ emi mîdịghe akpan n̄kpọ ẹnam inyene edu editaba mme mbono esop. (Eph. 5:15, 16; Heb. 10:24, 25) Ke ini anamde ndutịm ubon fo, emekeme nditọn̄ọ ke ndiwet mme ini oro ẹsinịmde mbono esop. Ekem kpeme mbak uduyak mme edinam efen ẹbiọn̄ọ ndutịm emi. Kụt ete ke ubon fo ada edidụk mme mbono esop nte ata akpan n̄kpọ.
4 Nte isinụkke nnyịn ndinam n̄kpọ ke ini ikotde iban̄a nditọete nnyịn oro ẹkande mme n̄kpọ ubiọn̄ọ man ẹkeme ndidụk mme mbono esop ọkọrọ ye n̄kpri ye ikpọ mbono? Okposụkedi afo mûdụhe ke ukem idaha oro, eyedi afo n̄ko emesisobo mme mfịna. Satan ke anam enen̄ede ọsọn̄ ikọt Abasi ndikpono Jehovah. Edi, nịm ete ke nditọ fo iditreke ndikụt ọkpọsọn̄ ukeme oro ubon mbufo esịnde ndidụk mme mbono esop. Ke ndinam ntre, afo ke akpanikọ emekeme ndinọ mmọ enọ eke spirit oro mmọ mîdifreke tutu amama.