“Ẹnam N̄kpọ Ẹnọ Jehovah ke Idatesịt”
1. Nso ikeme ndinen̄ede nnọ mme asan̄autom Jehovah idatesịt?
1 Apostle Paul ekewet ete: “Ẹdat esịt ke Ọbọn̄ kpukpru ini; nyọtọn̄ọ ntak ndọhọ, Ẹdat esịt.” (Phil. 4:4) Akwa ifet oro inyenede ndibuana eti mbụk nnyụn̄ n̄n̄wam mbon mbieterọn̄ ẹdi ẹdituak ibuot ẹnọ Jehovah edi se inen̄erede inọ idatesịt. (Luke 10:17; Utom 15:3; 1 Thess. 2:19) Nte ededi, nso ke nnyịn ikeme ndinam edieke ikụtde ite ke nnyịn isinyeneke idatesịt ndusụk ini ke utom ukwọrọikọ nnyịn?
2. Didie ke ndiwụk ekikere ke owo oro ọdọn̄de nnyịn utom ekeme nditịp nsịn ke idatesịt nnyịn?
2 Utom Emi Abasi Ọnọde: Ti ete ke utom ukwọrọikọ oto Jehovah. Ih, nso akwa ifet ke nnyịn inyene ntem ndidi ‘nsan̄a utom ye Abasi’ ke editan̄a etop Obio Ubọn̄ ye edinam mme mbet! (1 Cor. 3:9, NW) Christ Jesus odu ye nnyịn ke utom oro owo mîdifiakke inam mi aba. (Matt. 28:18-20) Mme angel n̄ko ke ẹbuana ifịk ifịk ke ẹnyụn̄ ẹnam utom ye nnyịn ke akwa idọk eke spirit oro adade itie idahaemi. (Utom 8:26; Edi. 14:6) N̄wed Abasi, ọkọrọ ye mme ifiọkutom ikọt Abasi ẹnọ in̄wan̄-in̄wan̄ uyarade nte ke Jehovah ke ọnọ utom emi ibetedem. Ke ntre, ke ini ikwọrọde ikọ, nnyịn inam emi nte mbon emi ‘Abasi osiode ọdọn̄ utom ke ebuana ye Christ, ke iso Abasi.’ (2 Cor. 2:17, NW) Nso okopodudu ntak idatesịt ke emi edi ntem!
3. Nso udeme ke akam enyene ke ndika iso nnyene idatesịt nnyịn ke utom Abasi?
3 Oyom akam man ika iso inyene idatesịt ke utom Abasi. (Gal. 5:22) Sia ikemede ndinam utom Abasi n̄kukụre ke odudu oro enye ọnọde, oyom nnyịn iben̄e enye spirit esie emi enye esiyakde ọnọ mbon oro ẹben̄ede enye, ke ntatubọk. (Luke 11:13; 2 Cor. 4:1, 7; Eph. 6:18-20) Ndibọn̄ akam mban̄a utom ukwọrọikọ nnyịn ayan̄wam nnyịn ndika iso nnyene nnennen ekikere ke ini mme owo mîmaha ndikpan̄ utọn̄ ke etop nnyịn. Emi ayan̄wam nnyịn ndika iso n̄kwọrọ ikọ uko uko ye ke idatesịt.—Utom 4:29-31; 5:40-42; 13:50-52.
4. Didie ke eti ntịmidem ekeme ndin̄wam nnyịn inen̄ede ikop idatesịt ke ndikwọrọ ikọ, ndien nso idi ndusụk akpan usụn̄ oro ikemede nditịm idem?
4 Tịm Idem Ọfọn: Akpan usụn̄ kiet ndika iso nnyene idatesịt ke utom ukwọrọikọ edi nnyịn nditịm idem ọfọn. (1 Pet. 3:15) Utọ ntịmidem oro ikpadaha ekese ini. Esida minit ifan̄ kpọt ndidụn̄ọde mme ekikere oro ẹnọde ẹban̄a nte ẹkpenọde mme magazine eke ndondo emi m̀mê nneme oro odotde kaban̄a mme n̄wed oro afo aduakde ndinọ. Ke oyomde ntọn̄ọikọ oro odotde, afo emekeme ndise ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible m̀mê n̄kani nsiondi Utom Obio Ubọn̄ Nnyịn. Ndusụk mme asuanetop Obio Ubọn̄ ẹkụt nte edide n̄kpọ un̄wam ndiwet mbio mbio nneme ke ekpri babru. Ke ini ke ini, mmọ ẹsitop enyịn ẹse mme babru emi man ẹti se mmọ ẹditịn̄de. Emi esin̄wam mmọ ndikan nnyekidem esinyụn̄ anam mmọ ẹkwọrọ ikọ ye uko.
5. Didie ke idatesịt esinọ nnyịn ye mbon en̄wen ufọn?
5 Idatesịt esisan̄a ye ediwak ufọn. Iso idatesịt esinam mme owo ẹma ndikop etop nnyịn. Idatesịt esisọn̄ọ nnyịn idem ndiyọ. (Neh. 8:10; Heb. 12:2) Ke akande kpukpru, utom idatesịt oro inamde ọnọ Jehovah ubọn̄. Ke ntre, ẹyak ika iso ‘inam n̄kpọ inọ Jehovah ke idatesịt.’—Ps. 100:2.