Nam Idatesịt Fo ke Utom Ukwọrọikọ Okpon
1 Idatesịt edibuana eti mbụk—nte afo emenyene enye ke utom ukwọrọikọ fo? Edieke nnyịn mîkpemeke, idiọk ererimbot oro nnyịn idude ekeme ndinam nnyịn ikop ndịk ndikwọrọ ikọ, anamde nnyịn itaba idatesịt nnyịn. Ndinam utom ke efakutom emi owo mînọhọ n̄kpan̄utọn̄ ekeme n̄ko ndinam idem emem nnyịn. Mme akpan usio-ukot ewe ke nnyịn ikeme ndinam man inam idatesịt nnyịn ke utom ukwọrọikọ okpon?
2 Nyene In̄wan̄-In̄wan̄ Ekikere: Ndinyene in̄wan̄-in̄wan̄ ekikere esinen̄ede an̄wam. Usụn̄ kiet ndinam oro edi nditie n̄kere akwa ifet oro nnyịn inyenede ndidi “mme anam-utom Abasi.” (1 Cor. 3:9) Jesus odu ye nnyịn n̄ko ke utom emi. (Matt. 28:20) Enye onyụn̄ ada udịm mme angel ọnọ nnyịn ibetedem. (Matt. 13:41, 49) Ntem, nnyịn inyene ndinịm ke akpanikọ nte ke Abasi ọnọ ukeme nnyịn ndausụn̄. (Edi. 14:6, 7) Ntre inamke n̄kpọ m̀mê ndusụk owo ẹnam n̄kpọ didie ẹban̄a utom nnyịn, nte mbon heaven ẹnamde n̄kpọ ẹban̄a edi n̄kpọ akwa idatesịt!
3 Tim Idem nte Ọfọnde: Eti ntịmidem etịp n̄ko esịn ke idatesịt nnyịn. Nditịm idem nnọ utom ukwọrọikọ iyomke ekese utom. Ada minit ifan̄ kpọt ndikere mban̄a akpan n̄kpọ oro edidade enyene nneme ke mme magazine eke ndondo emi m̀mê n̄wed oro ẹnọde ke ọfiọn̄ oro. Mek nneme kiet to “Se Ẹkpetịn̄de Ẹban̄a Mme Magazine,” ke Utom Obio Ubọn̄ Nnyịn. Kaban̄a ntọn̄ọikọ oro enyenede uforo, dụn̄ọde esịne-esịt eke January 2002, “Mme Ekikere Ẹnọde Kaban̄a Mme Nneme An̄wautom,” mîdịghe se ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible. Edieke mfan̄a oro mme enyeneufọk ẹsiwakde ndidemede ọsọn̄de fi, tịm ibọrọ oro edibọrọde mfan̄a mmọ onyụn̄ odụri ntịn̄enyịn ọnọ ibuotikọ oro edemerede udọn̄. Ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible edi ata n̄kpọ un̄wam ke ndinam emi. Ndida mme n̄kpọ un̄wam emi nnam utom ọyọnọ nnyịn uko oro iyomde man ikwọrọ ikọ ye idatesịt.
4 Bọn̄ Akam Ifịk Ifịk: Akam edi akpan n̄kpọ kaban̄a edinyene idatesịt oro ebịghide. Sia nnyịn inamde utom Jehovah, oyom nnyịn iben̄e enye spirit esie, emi mfri esie kiet edide idatesịt. (Gal. 5:22) Jehovah ọyọnọ nnyịn ukeme ndika iso n̄kwọrọ ikọ. (Phil. 4:13) Ndibọn̄ akam mban̄a utom ukwọrọikọ nnyịn ekeme ndin̄wam nnyịn ndinyene nnennen ekikere ke ini nnyịn isobode ndiọi idaha. (Utom 13:52; 1 Pet. 4:13, 14) Edieke ẹsịnde nnyịn ndịk ke idem, akam ekeme ndin̄wam nnyịn ndika iso uko uko ye ke idara.—Utom 4:31.
5 Yom Ifet: Edi akpanikọ, utom ukwọrọikọ nnyịn esinen̄ede akama idatesịt ke ini nnyịn ikemede ndikụt mme owo nnyụn̄ nnọ mmọ ikọ ntiense. Ndikpụhọde ndutịm fo nnam utom eke ufọk ke ufọk ke isio isio ini, eyedi ke utịt utịt uwemeyo m̀mê ke ntọn̄ọ ntọn̄ọ mbubịteyo, ekeme ndisụn̄ọ ke nditịm n̄kụt unen. Afo emesisobo ye mme owo kpukpru ini oro afo asan̄ade ke efak, akade ndidep n̄kpọ, odụkde bọs, m̀mê akade itie unọ idem nduọkodudu. Ntak mûtịmke ibio ibio ikọ utọn̄ọ nneme ndien ebem iso asan̄a ebịne mbon oro ẹtiede ufan ufan? Mîdịghe afo emekeme ndinam utom ke itie utom idịbi udia m̀mê ke ufọkn̄wed, ke ebiet emi afo enyenede nneme ke usen ke usen ye mbon efen. Afo emekeme ndinyene ifet ndinọ ikọ ntiense ebe ke ndikam ndemede ibuot nneme N̄wed Abasi oro edemerede udọn̄ ndusụk owo. Nti ekikere ẹdu ke akpa page ke esịne-esịt Utom Obio Ubọn̄ Nnyịn eke January 2002. Ekededi ke otu mme ukeme emi ekeme ndinam idatesịt owo ke utom ukwọrọikọ enen̄ede okpon.
6 Sia idatesịt an̄wamde nnyịn ndiyọ, edi akpan n̄kpọ didie ntem ndika iso nnyene enye! Ke ndinam ntre, nnyịn iyenyene akwa utịp ke ini utom oro owo mîdifiakke inam aba mi edisịmde utịt. Idotenyịn oro ke idemesie ekeme ndinam idatesịt nnyịn ke utom ukwọrọikọ okpon.—Matt. 25:21.