Nte Afo Emetịp Esịn ke Ndinam Ẹnyene Nnennen Ibatutom?
1 Ediwak mbụk Bible ẹsịne mme akpan ibat emi anamde ẹfiọk ata nnennen se iketịbede. Ke uwụtn̄kpọ, Gideon akada owo 300 kpọt akan mbonekọn̄ Midian. (Judg. 7:7) Angel Jehovah ama owot mbonekọn̄ Assyria 185,000. (2 Ndi. 19:35) Ke Pentecost 33 E.N., n̄kpọ nte owo 3,000 ẹkena baptism, ndien esisịt ini ke oro ebede, ibat mme andinịm ke akpanikọ ama ọdọk ekpere ndisịm owo 5,000. (Utom 2:41; 4:4) Mme mbụk emi ẹwụt in̄wan̄-in̄wan̄ nte ke mme asan̄autom Abasi ke eset ẹma ẹsịn ọkpọsọn̄ ukeme ndinịm ọyọhọ ye nnennen n̄wetnnịm n̄kpọ.
2 Esop Jehovah mfịn eteme nnyịn ete inọ ibatutom an̄wautom nnyịn kpukpru ọfiọn̄. Nnyịn ndibere ọyọhọ ọyọhọ ye ndutịm emi ayanam ẹkeme ndinọ utom ukwọrọikọ nnyịn eti ndausụn̄. Ibatutom ekeme ndiwụt ikpehe utom ukwọrọikọ oro oyomde ẹnọ ntịn̄enyịn m̀mê akpan ikpehe oro ẹyomde mme anamutom efen efen. Ke esop, ibatutom an̄wautom an̄wam mbiowo ndifiọk mbon oro ẹkemede nditat utom ukwọrọikọ mmọ ọkọrọ ye mbon oro ẹyomde un̄wam. Ndien ibatutom oro owụtde n̄kọri emi ẹnamde ke utom edikwọrọ Obio Ubọn̄ esidi n̄kpọ nsịnudọn̄ ọnọ ofụri otu nditọete Christian. Nte afo ke anam udeme fo nditịp nsịn ke ndinam ẹnyene nnennen ibatutom?
3 Mbiomo Fo: Ke ufọt ye ke utịt ọfiọn̄, nte esisọn̄ fi nditi se afo akanamde ke utom ukwọrọikọ? Ke edide ntre, ntak mûwetke ibatutom fo kpukpru ini oro abuanade ke an̄wautom? Ndusụk owo ẹsikama n̄wed usenọfiọn̄ m̀mê n̄wed oro ẹsiwetde n̄kpọntịbe eke usen eke usen ẹsịn. Mbon eken ẹsikama babru ibatutom an̄wautom. Ke ufọt ye ke utịt ọfiọn̄, yak ibatutom fo nọ esenyịn ukpepn̄kpọ n̄wed mbufo ke ini. Mîdịghe, edieke emekde, emekeme ndisịn ibatutom fo ke ekebe ibatutom ke Ufọkmbono Obio Ubọn̄. Edieke efrede ndinọ ibatutom fo, men enye ye unana ubiatini sọk esenyịn ukpepn̄kpọ n̄wed mbufo utu ke ndibebet enye edibụp fi. Nditịn̄ enyịn ntọt ibatutom fo owụt ukpono oro afo enyenede ọnọ ndutịm Jehovah ye ima ima edikere mban̄a oro afo enyenede ọnọ nditọete oro ẹdọhọde ẹbọ ẹnyụn̄ ẹdian ibatutom emi.—Luke 16:10.
4 Utom Esenyịn Ukpepn̄kpọ N̄wed: Nte ekpemerọn̄ oro ekerede aban̄a onyụn̄ odude ke edidemede, esenyịn ukpepn̄kpọ n̄wed enyene udọn̄ ke utom oro otu ukpepn̄kpọ n̄wed anamde ke ọfiọn̄. (N̄ke 27:23) Enye ọfiọk m̀mê asuanetop kiet kiet abuana mfọn mfọn ye ọyọhọ idatesịt ke utom an̄wautom kpukpru ini, onyụn̄ ọsọsọp ọnọ un̄wam edieke owo ekededi mîbuanake ke utom ukwọrọikọ ke ofụri ọfiọn̄. N̄kukụre se ẹsiwakde ndiyom esidi ekpri ikọ nsịnudọn̄, eti ekikere, m̀mê ndinyịme ndisan̄a ye owo oro ke an̄wautom.
5 Ke ọfiọn̄ okụrede, esenyịn ukpepn̄kpọ n̄wed enyene ndikụt ete ke kpukpru owo ke otu ukpepn̄kpọ n̄wed ẹbiom mbiomo mmọ ke nditọt ibatutom mmọ man oto do ewetn̄wed ekeme ndinọ nnennen ibatutom esop ẹsọk n̄kọk itieutom ke ọyọhọ usen itiokiet ke ọfiọn̄ oro etienede. Nte ọfiọn̄ ekperede ndikụre, ọkpọfọn esenyịn ukpepn̄kpọ n̄wed eti otu ukpepn̄kpọ n̄wed aban̄a emi, akpan akpan mbon oro mîkọnọhọ ibatutom eke ufọt ọfiọn̄, enye n̄ko enyene ndikụt nte ke mme babru ibatutom ẹdu ke itie ukpepn̄kpọ n̄wed. Edieke owo ekededi efrede nditọt ibatutom esie, enye ekeme nditi owo oro onyụn̄ ọnọ nsịnudọn̄ nte odotde.
6 Nditọt ibatutom an̄wautom ke eti ini etịp esịn ke ndinam ẹnyene ibatutom oro owụtde nnennen se ẹkenamde ke an̄wautom. Nte afo ayanam udeme fo ke nditọt ibatutom fo ke ini kpukpru ọfiọn̄?