Afo Ekpenyene Ndise Vidio No Blood—Medicine Meets the Challenge
Nte afo emetịm ọfiọk nsio nsio ibọkusọbọ ẹdude oro owo mîsịnke iyịp? Nte ọmọfiọk ndusụk ibọkusọbọ oro ẹkpenọde ke itie edikịm iyịp nsịn ke idem ye ufọn oro mmọ ẹnyenede? Se vidio emi, nyụn̄ da mme mbụme ẹtienede mi domo ifiọk fo se.—Tịm fiọk: Sia vidio emi esịnede n̄kpri itie oro ẹsiakde owo idem, mme ete ye eka ẹkpenyene ndiwụt mbufiọk ke ini ẹsede enye ye nditọwọn̄.
(1) Nso idi akpan ntak emi anamde Mme Ntiense Jehovah ẹsịn edikịm iyịp nsịn ke idem, ndien ẹkeme ndikụt akpan ntak oro ke ewe itie Bible? (2) Ke se iban̄ade ibọkusọbọ, nso ke nnyịn iyom? (3) Nso akpan unen ke mbon udọn̄ọ ẹnyene? (4) Ntak emi editre edikịm iyịp nsịn ke idem owụtde eti ibuot ye unen edibiere n̄kpọ nnọ idem? (5) Ke ini ekese iyịp ọwọrọde owo ke idem, ewe n̄kpọ iba ke mbiausọbọ ẹkpenam usọp usọp? (6) Mme n̄kpọndịk ewe ke ndikịm iyịp nsịn ke idem akama ọnọ nsọn̄idem owo? (7) Nso idi ndusụk n̄kpọutom oro mme asiak owo idem ẹnyenede ndida nsụhọde uwọrọiyịp ke ini usiakidem? (8) Nso ke afo okpoyom ẹtịn̄ ẹnọ fi kaban̄a usọbọ efen ekededi oro ẹnọde ke itie edikịm iyịp nsịn ke idem? (9) Nte ẹkeme ndinam akpan awak-n̄kukọhọ usiakidem ye unana edikịm iyịp nsịn ke idem? (10) Nso ke ediwak mbiausọbọ ẹnyịme ndinam nnọ Mme Ntiense Jehovah, ndien usụn̄ usọbọidem ewe ikeme ndikabade ndi idaha oro ẹtienede ke ndisọbọ kpukpru mbon udọn̄ọ ke ini iso?
Nte eyịghe mîdụhe, ọyọfọn ndise vidio No Blood emi ye nditọ ukpepn̄kpọ Bible ekededi, nsan̄a ndọ m̀mê mme iman oro mîdịghe Ntiense, nsan̄autom, mme andikpep, ye mme nsan̄a ufọkn̄wed oro ẹkemede ndibụp mme mbụme mban̄a idaha nnyịn kaban̄a iyịp. Ndinyịme usọbọidem ekededi oro ẹwụtde ke vidio emi edi ọkpọkpọ ubiere oro owo enyenede ndinam ye ntịn̄enyịn.—Se “Mme Mbụme Ẹtode Mme Andikot” ke nsiondi Enyọn̄-Ukpeme eke June 15 ye October 15, 2000.