Obufa Ndutịm Mbono Circuit
1 Man isọn̄ọ ida ke mbuọtidem ke ererimbot emi mînyeneke iwụk mi, ana nnyịn ibuọt idem ye Jehovah. Didie ke nnyịn ikeme ndiwụt mbuọtidem emi ke uwem ofụri usen nnyịn? Didie ke ndibuọt idem ye Jehovah otụk ọkpọkpọ uwem nnyịn ye eke ubon nnyịn? Didie ke enye an̄wam nnyịn ndibiọn̄ọ odudu ererimbot Satan? Ndutịm mbono circuit eke isua utom 2003 ọbọrọ mme mbụme emi. Ibuotikọ esie edi “Buọt Idem ye Jehovah, Nyụn̄ Nam Se Ifọnde.”—Ps. 37:3.
2 Nnyịn ibuọtke idem ye Jehovah sụk ke mme san̄asan̄a ini m̀mê mme ini oro iyomde n̄kpọ ke mbrenyịn. Nnyịn ibọbuọt idem ye enye ke uwem eke usen ke usen nnyịn. Ẹsọn̄ọ ẹwụt emi ke utịn̄ikọ ediberede oro, “Ẹbuọt Idem ye Jehovah Kpukpru Ini.” (Ps. 62:8) Nneme ikpehe inan̄ oro “Ndiwụt Mbuọtidem ke Jehovah” oyowụt nnyịn nte ikpoyomde inyụn̄ idade ntọt oro ọkọn̄ọde ke Bible isịn ke edinam man an̄wam nnyịn ndibọp ndọ oro okụtde unen, ndise mban̄a mme mfịna oro ẹdemerede ke ubon, nnyụn̄ nyụhọ mme udọn̄ n̄kpọ obụkidem nnyịn.
3 Ererimbot Satan odomo ndinyịk nnyịn man inyene ukwan̄ ekikere iban̄a se ifọnde ye se idiọkde onyụn̄ etịmede nnyịn man ikûfiọk se idide akpan n̄kpọ ye se mîdịghe. (Isa. 5:20) Utịn̄ikọ oro “Ẹkpeme Ẹbiọn̄ọ Ikpîkpu N̄kpọ eke Uwem” ye “Ẹsịn Se Idiọkde—Ẹdi Mme Anam Eti” ẹyesọn̄ọ ubiere nnyịn ndisọn̄ọ mmụm n̄kokon̄ idaha Jehovah n̄kama.—Amos 5:14.
4 Ke ini Jehovah edidade utịt ọsọk idiọk editịm n̄kpọ emi odude kemi, oyoyom mme asan̄autom Abasi ẹbuọt idem ye Enye ọyọhọ ọyọhọ. Ẹsio emi ẹwụt ke utịn̄ikọ an̄wa oro, “Edinyan̄a Nsio ke Ukụt Ererimbot Emekpere.” Ke oro ama ekebe, ẹyesịn udọn̄ ẹnọ nnyịn ndidụn̄ọde idem nnyịn ke ikpehe emi ọdọhọde “Nte Ẹyebat ke Afo Omodot Ndidu ke Obio Ubọn̄ Abasi?” Ẹyeberi ndutịm oro ye nsịnudọn̄ emi, “Ẹbuọt Idem ke Mme Un̄wọn̄ọ Jehovah.”
5 Akpan n̄kpọ udọn̄ ke kpukpru mbono esidi utịn̄ikọ baptism. Owo ekededi oro aduakde ndina baptism ekpenyene ndisian esenyịn oro etiede ibuot usọp usọp nte ekekeme man ẹkeme ndinam mme ndutịm oro ẹyomde.
6 Ke anana-iwụk ini emi, Jehovah edi n̄kukụre ata ebiet oro mbuọtidem ye nsọn̄ọnda ẹtode. (Ps. 118:8, 9, NW) Kpukpru nnyịn ikpakam isọn̄ọ mbuọtidem nnyịn ke enye ebe ke ndidu ke ofụri ndutịm mbono circuit emi.