‘Kop Nyụn̄ Kọrọ ke Se Ekpepde’
1 N̄wed Mme N̄ke owụt ọniọn̄ nte osiorode uyo ete: “Mbufo ẹkop: koro nyọdọhọ ata eti n̄kpọ: ndien ke n̄kụbọrede n̄kpọk-inua mi nyetịn̄ se inende. Item ye ata ọniọn̄ ẹdi okịm. . . . ẹkop ndien uyo mi: ndien ọfọfọn ye mmọ eke ẹkpemede usụn̄ mi. Koro owo eke okụtde mi okụt uwem, oyonyụn̄ ọbọ Jehovah mfọn.” (N̄ke 8:6, 14, 32, 35) Mme ikọ oro ẹnen̄ede ẹtịn̄ ẹban̄a item oro anade ebet nnyịn ke Mbono District “Mme Andikpep Ikọ Abasi.”
2 Ẹmedụn̄ọde se itie nditọete ofụri ererimbot oyomde, ndien ẹnam ndutịm mbono ndineme se ẹyomde oro. Item eke spirit ye nti ekikere oro ẹdinọde ẹyenọ nnyịn idatesịt edieke nnyịn ididade mmọ isịn ke edinam, ayanam imụm eti itie ebuana ye Jehovah ikama, onyụn̄ anam ika iso ke usụn̄ oro adade esịm nsinsi uwem. Ke akpanikọ, nnyịn imenyene eti ntak ‘ndikop nnyụn̄ n̄kọrọ ke se ikpepde.’—N̄ke 1:5.
3 Mbemiso Edinam: Man ibọ ọyọhọ ufọn ito se ẹnemede, nnyịn inyene nditie ke n̄kpọitie nnyịn nnyụn̄ nnyene nnennen idaha ekikere ke ini edinam ọtọn̄ọde. Emi oyom eti ọkpọkpọ ndutịm. Akpan n̄kpọ edi nditọn̄ọ ke ini. Babak de idap ke okoneyo mbemiso usen oro. Bak demede man ọnọ kpukpru owo ke ubon fo ini nditịm idem man ẹnyụn̄ ẹnyene se ẹdiade. Babak sịm itie mbono man afo ekeme ndikụt itie onyụn̄ ese n̄kpọ aban̄a ndusụk n̄kpọ oro ẹyomde mbemiso edinam ọtọn̄ọde. Edinam editọn̄ọ ke n̄kanika ebede 9 usenubọk ke minit 20 ke Friday ye ke n̄kanika 9 usenubọk ke Saturday ye Sunday.
4 Sia akpan uduak edisop idem edide nditoro Jehovah “ke otu mbon-esop,” ẹkpenyene ndiberede ikpehe kiet kiet ke usụn̄ oro ọnọde Abasi nnyịn ubọn̄. (Ps. 26:12) Ke ntak oro, ẹsịn udọn̄ ẹnọ kpukpru owo nditetie mbemiso ẹsiakde ikwọ ediberede. Emi odu ke n̄kemuyo ye item N̄wed Abasi oro: “Ẹnam kpukpru n̄kpọ ke nde ye ke ido nte eyede.” (1 Cor. 14:40) Nso ke oro ọwọrọ ọnọ nnyịn owo kiet kiet? Ke ini okụtde etieibuot okpokoro etiede ke mbot utịn̄ikọ ke ini ikwọ ukwak osụk akade iso, sọsọp da itie fo. Emi ayanam fi abuana ke ofụri esịt ke ikwọ oro ebererede ikpehe kiet kiet, adade itoro ọsọk Jehovah.—Ps. 149:1.
5 Ke Ini Edinam: Ezra ‘ama owụk esịt esie ndidụn̄ọde n̄wed ibet Jehovah, nnyụn̄ nnam.’ (Ezra 7:10) Didie ke nnyịn ikeme ndiwụk esịt nnyịn man ibọ item emi Jehovah ọnọde? Nte afo odụn̄ọrede ibuotikọ nsio nsio ikpehe oro ẹwetde ke ndutịm, bụp idem fo, ‘Nso ke Jehovah ada ndutịm emi asian mi? Didie ke n̄keme ndida ntọt emi nnam n̄kpọ ke ufọn mi ye ubon mi?’ (Isa. 30:21; Eph. 5:17) Ka iso ndibụp mme mbụme oro ke ofụri mbono oro. Wet mme akpan n̄kpọ oro odiomide ndida nnam n̄kpọ. Da ini ndineme mmọ ke akpatre ikpehe usen kiet kiet. Emi ayan̄wam fi nditi nnyụn̄ nnam ntọt oro.
6 Ndiwụk ntịn̄enyịn ke ediwak hour ke ini kiet ekeme ndidi n̄kpọ-ata. Nso ikeme ndin̄wam nnyịn ndibiọn̄ọ ntụhọ ediwọn̄ọde ntịn̄enyịn? Bọ ufọn to odudu oro enyịn enyenede. Ke akamba udomo, ntịn̄enyịn nnyịn esiwụhọ ke se nnyịn isede. (Matt. 6:22) Ke ntre, tre ndiyak ekikere etịmede fi ke kpukpru uyom oro ẹnamde. Wụk enyịn fo se etịn̄ikọ. Tiene kûbọde Bible fo ke ini ẹkotde itien̄wed Abasi, nyụn̄ yak Bible fo ana in̄wan̄ nte ẹnemede itien̄wed oro.
7 Ima Christian oyonụk nnyịn nditre nditịmede mbon efen ke adan̄aemi ndutịm osụk akade iso. (1 Cor. 13:5) Emi edi ‘ini ndidop’ uyo nnyụn̄ nnọ n̄kpan̄utọn̄. (Eccl. 3:7) Mmọdo, kûtịn̄ ikọ nte mîdotke kûnyụn̄ usan̄a ukanade. Sụhọde ubọk uka itie uken̄idem ebe ke ndibabak nnam ndutịm. Kûdia n̄kpọ m̀mê ndin̄wọn̄ n̄kpọ tutu ini oro ẹkenịmde, ibọhọke akpan mfịna nsọn̄idem abuana. Mbon oro ẹkamade urụk ukopikọ oro ẹkamade-kama ẹsan̄a, ukwak umụm n̄kpọ vidio, ye ukwak usio ndise ikpenyeneke ndida mme n̄kpo emi nnam n̄kpọ ke usụn̄ oro ẹdiwọn̄ọrede ntịn̄enyịn mbon efen. Mme ete ye eka ẹkpenyene ndinam ndutịm nnọ ofụri ubon mmọ—esịnede mme uyen—nditie ọtọkiet man mmọ ẹse ẹban̄a nditọ mmọ nte enende.—N̄ke 29:15.
8 Isua oko ebiowo oro esidụkde mbono ke ediwak isua ama ọdọhọ ete: “Ami n̄kere ke mbono emi ekedi n̄wọrọnda ke ntak efen. Ekpere ndidi kpukpru owo oro ẹkebuanade, esịnede n̄kpri nditọ, ẹkewet mme n̄kpọ. Ekedi n̄kpọ inemesịt ndikụt emi. Ẹma ẹda Bible ẹnam n̄kpọ ke eti usụn̄ ke ini mme etịn̄ikọ ẹkedọhọde ẹkụbọde ẹkot ndusụk itie.” Utọ eti n̄kpan̄utọn̄ oro enen̄ede odot itoro. Enye idaha ufọn isọk nnyịn ye ekemmọ mme andidụk mbono kpọt edi ke akande kpukpru ọnọ Akwa Anditeme nnyịn, Jehovah Abasi, ubọn̄.—Isa. 30:20, NW.