Ndisop Idem Ọtọkiet Man Itoro Jehovah
1. Nso idi ibuotikọ mbono, ndien ntak emi Jehovah odotde se nnyịn itorode?
1 Jehovah enyene ata ọkpọsọn̄ odudu, ọniọn̄ esie inyeneke mbiet, unenikpe esie ọfọn ama, enye onyụn̄ edi uwụtn̄kpọ ima. Nte Andibot, Ọnọ-Uwem, ye Andikara Ekondo, enye ikpọn̄ odot ndibọ utuakibuot nnyịn. (Ps. 36:9; Edi. 4:10b; 15:3, 4) Mbono District “Ẹnọ Abasi Ubọn̄” eke isua emi ọyọsọn̄ọ ubiere nnyịn nditoro enye nte ata Abasi kierakiet.—Ps. 86:8-10.
2, 3. Didie ke eti ndutịm edin̄wam nnyịn ibọ ọyọhọ ufọn?
2 Oyom Eti Ndutịm: Man ibọ ọyọhọ ufọn ito usọrọ eke spirit oro Jehovah odiomide ọnọ nnyịn, eti ndutịm edi akpan n̄kpọ. (Eph. 5:15, 16) Nte afo amanam ndutịm okụre kaban̄a itieidụn̄ ye n̄kpọisan̄, onyụn̄ ọbọ unyịme nditre utom m̀mê ufọkn̄wed? Kûsịk mme akpan n̄kpọ emi unịm tutu ke ata idiọk ini. Edieke afo anamde ubịghi ndiben̄e unyịme nditre utom m̀mê ufọkn̄wed, afo emekeme nditaba ndusụk ikpehe edinam idatesịt emi. Oyom kpukpru nnyịn idụk kpukpru ikpehe edinam.
3 Biere ndisịm itie mbono ke eti ini kpukpru usen. Oro ayanam fi etie ke itie fo mbemiso ikwọ ediberede oyonyụn̄ an̄wam fi enyene nnennen idaha ekikere man ekeme ndibọ item oro ẹdinọde. Mbọk mụm itie nịm nọ mbonufọk fo ikpọn̄-ikpọn̄ ye mbon oro ẹsan̄ade ke ubomisọn̄ ye mbufo.
4. Ntak emi ẹdọhọde kpukpru nnyịn ida udia uwemeyo idi mbono?
4 Ẹdọhọ kpukpru owo ẹda udia uwemeyo mmọ ẹdi utu ke ndikpọn̄ itiembono n̄ka ndidep udia ke ini nduọkodudu uwemeyo. Afo ndibere ye ndutịm emi eyetịp esịn ke emem emem idaha onyụn̄ ọnọ ini efen efen ndibuana ye ekemmọ mme andinịm ke akpanikọ. (Ps. 133:1-3) Mbọk ẹti ẹte ke owo iyomke ẹda ọtọ-akpa ye ọkpọsọn̄ mmịn ẹdi itiembono.
5. Didie ke nnyịn ikeme nditọn̄ọ ndiwụk esịt nnyịn ke mbono emi?
5 Kpan̄ Utọn̄ Nyụn̄ Kpep N̄kpo: Ezra ama enen̄ede owụk esịt esie ndibọ ikọ Abasi. (Ezra 7:10) Enye ama esịn esịt esie ke mme ukpepn̄kpọ Jehovah. (N̄ke 2:2) Nnyịn imekeme nditọn̄ọ ndiwụk esịt nnyịn ke mbono, idem mbemiso ikpọn̄de ufọk ebe ke nditie n̄kere ibuotikọ mbono nnyụn̄ nneme enye ye ubon nnyịn.
6. Nso ikeme ndin̄wam nnyịn ndiwụk ntịn̄enyịn ke ndutịm? (Se ekebe.)
6 Ke akamba efe mbono, ediwak ndise ye uyom ẹkeme ndiwọn̄ọde ntịn̄enyịn nnyịn. Mme utọ n̄kpọ oro ẹwọn̄ọrede ntịn̄enyịn owo do ẹkeme ndisọp n̄wọn̄ọde ekikere nnyịn n̄kpọn̄ etịn̄ikọ. Ke ini oro etịbede, nnyịn iyataba mme akpan item. Mme ekikere oro ẹnọde ke ekebe oro etienede ẹkeme ndin̄wam nnyịn nditetịm nnọ n̄kpan̄utọn̄.
7, 8. Didie ke nnyịn ikeme ndiwụt edikere mban̄a nnọ mbon en̄wen, ndien nso ke mbon oro ẹnyenede mfịna ukop ikọ ẹkpenam man ẹbọ ufọn ọyọhọ ọyọhọ ẹto ndutịm?
7 Kere Ban̄a Mbon En̄wen: Ẹkeme ndida ukwak usio ndise ye ukwak umụm n̄kpọ vidio nnam n̄kpọ ke ini edinam, edi tie ke itie fo nam oro mbak udutịmede mbon en̄wen. Ana ẹsụhọde uyo urụk ukopikọ oro ẹkamade-kama ẹsan̄a ye ekpri ukwak ubọ etop mbak ẹditịmede mbon en̄wen. Mbon oro ẹnyenede mfịna ukop ikọ ẹkeme nditie n̄kpere ukwak utịn̄ikọ man ẹkeme ndibọ ufọn ọyọhọ ọyọhọ nto ndutịm. Owo ikpenyeneke ndifak ọkpọkpọ n̄kpọ ke ikan̄ ilektrik m̀mê ke ndutịm ukwak utịn̄ikọ itiembono.
8 Nnyịn idori enyịn didie ntem ndisop idem ọtọkiet man itoro Jehovah! Nnyịn ikpakam ibiere ndinọ enye ubọn̄ ebe ke ndidụk kpukpru ikpehe edinam, ke ndinọ ọyọhọ n̄kpan̄utọn̄, ye ke ndida se nnyịn ikpepde nsịn ke edinam.—Deut. 31:12.
[Ekebe ke page 3]
Ndikpan̄ Utọn̄ ke Mbono
▪ Tie kere mme ibuotikọ utịn̄ikọ
▪ Kụbọde mme itie N̄wed Abasi
▪ Wet mme n̄kpọ mbio mbio
▪ Wet mme akpan n̄kpọ oro edidade esịn ke edinam
▪ Dụn̄ọde se ekpepde