Ẹtịm “ke Nde ye ke Ido nte Eyede”
1 Man mbono district okụt unen, oyom ukeme ediwak owo. Mme anam-ndutịm mbono ẹtịm itie oro odotde ọkọrọ ye mme itieidụn̄. Mme owo ye mme otu ubon ẹnam ndutịm nte mmọ ẹdisan̄ade ẹka. Ndien mme esop ẹnọ idem unyịme unyịme ndinam utom ke ediwak itieutom oro ẹyomde man ẹnịm mbono oro. Uduak edi ndinam “kpukpru n̄kpọ ke nde ye ke ido nte eyede.”—1 Cor. 14:40.
2 Nte afo adianade ye mme anam-ndutịm mbono anam utom, ti ete ke ẹyom ẹnam ndutịm ke ediwak ọfiọn̄—ndusụk ini ke ediwak isua. Nditọete ke ediwak itie ikie ẹbiat ediwak ini nditịm mme n̄kpọ. Emi abuana ediyom mme n̄kpọutom ye edinọ mme anamutom unyịmesịt utom. Mbemiso ntịmidem emi osụn̄ọ ke mme edidiọn̄ eke spirit ọnọ kpukpru owo. Nso ke nnyịn ikeme ndinam man in̄wam?
3 Bere ye Mme Ndutịm Ufọkidụn̄: Edi akpan n̄kpọ kpukpru nnyịn ndibere ye mme ndutịm mbono. Ẹyom emi akpan akpan ke ini inamde ndutịm itieidụn̄ nnyịn. Ke ata ata usụn̄, ẹyom ediwak ufọkidụn̄ ke mbono kiet kiet. Ata ediwak nditọete nnyịn inyeneke ediwak okụk ndien ana ẹberi edem ke mme ufọkidụn̄ emi mîsọn̄ke urua. Ẹsịn akamba ukeme ndibiere mfọnn̄kan ekọmurua ufọkidụn̄ oro ẹkemede ndinyene. Nnyịn inyene ndiwụt ima ima edikere mban̄a mme udọn̄ mbon efen inyụn̄ itre ‘ndise n̄kpọ eke nnyịn, edi ikam ise n̄kpọ owo en̄wen.’—Phil. 2:4.
4 Nnyịn ndisọn̄ọ nyịre ketket ye mme ndausụn̄ mbono ke ndibọ mme ufọkidụn̄ edisụn̄ọ ke mme ufọn ofụri mbon oro ẹyomde ufọkidụn̄. Ndifụmi mme ndausụn̄ emi esikama mfịna. Didie ke edi ntre? Ke ini nnyịn iberede ye mme ekikere emi, mme enyene-ebiet ẹyebem iso ẹfiọk ibat ubet oro mmọ ẹma ẹkenọnọ. Emi an̄wam ke ndutịm mmọ ndien ekeme ndisụn̄ọ ke mmọ ndika iso nsụhọde urua ke ediwak isua ke iso. Edieke ediwak nnyịn mîyomke ufọkidụn̄ aba m̀mê inamde mme ndutịm efen, emi ayafịna mme enyene-ebiet ọkọrọ ye nditọete nnyịn iren ye iban emi ẹkpekeyomde itieidụn̄ ke ukem ebiet oro. Mme enyene-ebiet ẹkeme ndinam ibat ibat itieidụn̄ ẹdu ke mme mbono ini iso nnyịn, ẹkerede ẹte ke nnyịn idinamke nte nnyịn idọhọde. Ọfọn didie ntem ke ini nnyịn inamde se nnyịn ikọdọhọde, iyakde “Ih [nnyịn] edi Ih!”—Matt. 5:37, NW.
5 Kere Ban̄a Nti Utịp Emi: Ke ẹma ẹkekụre mbono kiet, etubom utom itienna kiet ama ọdọhọ ete: “Mmokụt nte ke Mme Ntiense Jehovah ẹnen̄ede ẹnam akpanikọ ke kpukpru se mmọ ẹnamde. Urua oko, mma nnyene owo 40 ke otu mmọ ke itienna mi, ndien mmọ ikesịnke mfịna ndomokiet. Ke edide isio, mmọ ẹdi n̄kukụre mbon oro ẹdide ẹdisian fi edieke mmọ ẹnyenede owo efen emi etienede odu ke [itieidụn̄] mmọ. Adan̄a nte mfiọkde, mmọ ẹdi mfọnn̄kan mbon ufọk oro afo ekemede ndinyene.” Nso utịbe utịbe n̄kpọ ke ekpedi ntem edieke kpukpru mbon oro ẹnọde nnyin ufọkidụn̄ ke ukpe-okụk ẹkpenyenede utọ nti edu oro! Nso ikọ ntiense ke oro ọkpọnọ ntem!
6 Etubom ufọkisen ama ọdọhọ ini kiet ete: “Ami n̄kemeke nditi nte akanam nnyenede utọ akwa otu oro ẹnen̄ede ẹnịm eti uwụtn̄kpọ edinịm ke akpanikọ mmọ ntre nte Mme Ntiense Jehovah. Nnyịn imodori enyịn ke mbufo ẹyefiak ẹdi.” Ikọ emi owụt nte ke eti edu uwem inọhọ nnyịn kpọt nduọkodudu edi ọnọ n̄ko ediwak owo ke ererimbot oro ẹkụtde nnyịn.
7 Mme Akpan Usụn̄ Oro Nnyịn Ikemede Ndidiana Kiet: N̄kpri n̄kpọ ẹdu oro nnyịn ikemede ndinam man ibere ye ndutịm mbono ke ndinam ndutịm unọ ufọkidụn̄. (1) Kûnam ndutịm efen edieke edide ama ọnọnọ babru Room Request. (2) Mme ete ye eka ẹkpenyene ndise mban̄a nditọ mmọ mbak mmọ ẹdikabade ẹdi nditọ nsọn̄ibuot. (3) Owo ikpenyeneke nditem udia ke esịt ufọk ibọhọke ẹnọ unyịme. (4) Ẹti ẹte ke mme enyene-ebiet ye mme enyene ufọkisen ẹsidori enyịn nnyịn ndinịm mme ibet mmọ.
8 Nte mme asan̄autom Jehovah Abasi, nnyịn imenyene ifet ndiwụt mme edu esie ke kpukpru n̄kpọ oro nnyịn inamde. Emi abuana edinam mme ndutịm nnọ nnyụn̄ ndụk mme mbono ke ebiet emi enyịn̄ Abasi abuanade. Ti ete ke enye “idịghe Abasi ndutịme, edi edi Abasi emem.” (1 Cor. 14:33) Ntem ẹyak nnyịn ibiere ite ke kpukpru mme andida nse ẹkụt edu emi aban̄ade Jehovah mi ke se mmọ ẹkụtde ke idem nnyịn—edu uwem nnyịn ye ukamaidem nte nnyịn inamde ndutịm inọ inyụn̄ idụkde Mbono District “Mme Andikpep Ikọ Abasi.” Mbon oro ẹnyenede esịt akpanikọ oro ẹdade ẹse ẹkpekam ẹdifiọk ẹte ke ẹtịm otu mbon esop Jehovah “ke nde ye ke ido nte eyede.”—Ps. 68:26.